Read Ыдыктыг Библия, 2011 Иов 11 Bible Online

Иов 11 - Ыдыктыг Библия, 2011 bible

Иов 11

¹Наама чурттуг Софар мынча деп харыылаан:

²«Хөй сөзүң харыы чок артар бе, чечээргээң-биле агартынар сен бе?

³Сен чулчурууруңга, өске улус ыытташпас бе, кочулал кылырыңга, ай дээр кижи чок бе?

⁴„Мээң бодап турарым шын, Бурганның мурнунга арыг мен“ — дээр-дир сен.

⁵Таанда! Бурган сеңээ харыылап, аксы-сөзүн ажыткан болза!

⁶Ол сеңээ чажыт мерген угаанны ажыдарга, ооң аажок ханызын көрүп каар турган ийик сен [18]. Билип ал: Бурган кем-бурууңнуң чамдыызын кеземче чок арттырган-дыр.

⁷Бурганның чажыттарын дилеп тып ап, Күчүлүг Бурганны бүрүнү-биле билип ап шыдаар сен бе?

⁸Ооң мерген угааны дээрден бедик — аңаа чедер харыың бар бе? Алдыы орандан-даа ханы — канчап билип аар сен?

⁹Ооң хемчээли черден узун, далайдан калбак.

¹⁰Бир эвес Ол келгеш, кижини кара-бажыңче октапса, шүүгү чыылдырыпса, кым Ону доктаадырыл?

¹¹Ол хоозун улусту билир, бузут-бакты көрүп турар — ону анаа эрттирбес-даа.

¹²Черлик элчиген кижи төлү төрүвээн шаанда, хос баштыг кижи угаан кирбес.

¹³Сеткил-чүрээңге шын угланыышкын берип, Бурганче холуң сунар болзуңза;

¹⁴холуңда бачыдыңны ыңай октап, бузут-бакты аалыңдан сывырыптар болзуңза,

¹⁵бакка борашпаан арныңны көдүрүп, быжыг турар сен, коргуп-сүртевес сен.

¹⁶Ынчан биеэги човулаңыңны, шагда агып баткан суг дег, уттуптар сен.

¹⁷Сээң чуртталгаң дал дүъштен-даа чырык апаар, караңгыны даң хаяазы солуптар.

¹⁸Оожургай бээр сен, чүге дээрге идегел турар; камгалалдыг бооп, тайбың удуп шыдаар сен.

¹⁹Дыштанып чыдар сен — кым-даа сеңээ кыжанмас; хөй-ле улус сээң ээ көрнүүшкүнүң дилээр.

²⁰А бузуттугларның карактары имистелип өжер, оларга хоргадаар чер турбас, оларның идегели — эстип-хайлы бээр».