Read Ыдыктыг Библия, 2011 Иов 12 Bible Online

Иов 12 - Ыдыктыг Библия, 2011 bible

Иов 12

¹Иов мынча деп харыылаан:

²«Силер чок болзуңарза, мерген угаан турбас, ындыг кончуг кижилер-дир силер!

³А менде база, силерде дег, угаан бар, силерден чүм-биле-даа дорайтаваан мен. Силерниң чугаалап турар бүгү чүвеңерни кым билбезил!

⁴Ооң мурнунда Бурганны кыйгырарымга, Ол харыылап-даа турган болза, мен ам эш-өөрүмге кочу-шоот апардым, мен, актыг, кем-буруу чок кижи, кочу-шоотка кирдим.

⁵Амыр-шөлээн улус айыылга таварышканнарны бодалында бак көөр, быжыг туруштуг улус тендиш дээннерни кыжырыыр [19].

⁶А дээрбечилерниң аалдары амыр-менди, Бурганны килеңнедип турарлар тайбың чуртталгалыг — Ооң холу оларны камгалап турар.

⁷Дириг амытаннардан айтыр — тайылбырлап бээрлер, дээрниң куштары сеңээ чугаалап бээр;

⁸черден билип ал — ол тайылбырлап бээр, далайның балыктары сеңээ медээлеп бээр.

⁹Дээрги-Чаяакчының холу ынчалдыр кылып каанын оларның кайызы билбезил?

¹⁰Ооң холунда — бүгү дириг амытанның тыны, кижи бүрүзүнүң тыныжы.

¹¹Дылдың аъш-чем амданын шенээри дег, кулак сөстерни ылгап дыңнап турар эвес бе?

¹²Мерген угаан — кырганнарда бе, узун назын угаан-сарыылга чедирер бе?

¹³Мерген угаан биле күчү-күш — Бурганда, арга-сүме биле угаан-сарыыл — Бурганда!

¹⁴Ооң үреп каан чүвези катап тургустунмас. Ооң хоругдап каан кижизи хосталып шыдавас.

¹⁵Ол сугларны тырттылдырыптарга, соглуп каарлар, а аксыптарга, чер кырын хөме аптарлар.

¹⁶Күчү-күш, мерген угаан Ооң-биле кээр, мегечи-даа, мегелеттирген-даа кижи Ооң эргезинде.

¹⁷Ол дээди дүжүметтерни бодал чок кылып [20], черниң шииткекчилерин — мелегей улус кылып каар;

¹⁸хааннарның эрге-дужаалын дүжүрүп, оларның белин чалчаның союндаа-биле шарып каар;

¹⁹Бурганның бараалгакчыларын бодал чок кылып{*}, шыдалдыг улусту чыттыр шааптар;

²⁰бүзүрелдиг улустуң чугаазы үнмес кылып, ирейлерниң угаанын ышкындырып каар;

²¹ызыгууртаннарны бак ат-биле бүргеп, күчүлүг улустуң курун чежип, кошкадып каар.

²²Бурган дүмбейниң ханызын ажыдып, караңгыны чырыкче үндүрүп турар;

²³чоннарны көвүдедип база чок кылып, аймактарны тарадыр көжүрүп база бөлүп турар;

²⁴чоннуң баштыңнарының угаанын баларадып, орук-чирик чок, ээн черге азып-тояарынче албадап турар.

²⁵Оларны караңгыда, чырык чокта суйбандырып чорудуп, эзирик улус дег, тендиңейндир кылаштадыр».