Read Ыдыктыг Библия, 2011 Иов 14 Bible Online

Иов 14 - Ыдыктыг Библия, 2011 bible

Иов 14

¹«О, херээженден төрүттүнген кижи! Ооң назыны кыска, качыгдал-биле пөккен болур.

²Чечек ышкаш частып келгеш, оңуп каар, хөлеге ышкаш ыңай болгаш, чиде хона бээр.

³Сен ындыг кижиже топтап көрүп тур сен бе? Сен мээң-биле чаргылдажыр деп тур сен бе?!

⁴°Арыг эвес чүүлден арыг чүүлдү кым боттандырарыл? Кым-даа эвес!

⁵Кижиниң назынын доктаадып каан-дыр, Сен ооң чурттаар айларын санап кааш, ооң ажа баспас кызыгаарын салып каан болганыңда,

⁶көрүжүңнү оон чайладып, аңаа дыштан хайырла, хөлечик дег, ол бодунуң ажыл хүнүн төндүрзүн.

⁷Ыяшка безин идегел турар болгай: ону ужуруп-даа каарга, ол дирлип кээр, чаш өзүмнер катап үнүп кээр.

⁸Чер иштинге ооң дазылдары кырып калган, төжээ довурак-биле шыптынып, өлү берген-даа болза,

⁹сугнуң амданын апкаш, ол ногаарарып, чаа тараан ыяш дег, будукталып эгелээр.

¹⁰А кижи өлүп каарга, күжү ону кааптар, ооң тыны үстүп каарга, ол ам кайдал?

¹¹Хөлдүң суунуң тырттына бээри дег, хемниң соглуп, кургап каары дег,

¹²кижи база чыдыпканда, туруп келбес, дээрлер чиде бербээн шаанда, одунмас — уйгузу сергеп, тура халывас.

¹³О, Сен мени өлүглер оранынче дүжүрүпкеш, Сээң килеңиң соксагыже, чажырып турган болзуңза! Оон мени сактып кээр хуусааңны доктаадып каан болзуңза!

¹⁴Өлген кижи дирлип кээр бе? Күш-ажыл албанының бүгү хүннеринде дыштаныр үемни манаар ийик мен.

¹⁵Сен ынчан кыйгырар ийик сен, а мен харыылаар ийик мен, чүге дээрге Бодуңнуң чаяалгаңны чоктаар сен.

¹⁶Сен ынчан мээң базымнарымны санаар ийик сен, а бачыттарымны истеп тыварын соксадыр ийик сен.

¹⁷Мээң кем-буруумну дүрүп шыгжап, таңмалап, үүлгеткен херектеримни дуглай чугайлап каар ийик сен.

¹⁸Ынчалза-даа дагның үүрмектелип, бустуру дег, хаяның туружундан шимчеп-чылары дег,

¹⁹сугнуң даштарны чуй шаап, үрээри дег, үерлээш, хөрзүннү арыда шавары дег, кижи амытанның идегелин Сен ынчаар узуткаар-дыр сен.

²⁰Сен ону төнчүзүнге чедир кызагдаар сен, ол чоруй баар; ооң арын-шырайын өскерткеш, ыңай чорудуптар сен.

²¹Ажы-төлүнүң хүндүледип чоруурун-даа ол кижи билбес, оларны хомудадып-даа турар болза, ол эскербес.

²²Чүгле ооң мага-бодун бодунуң аарышкызы хинчектээр, ооң сеткили боду дээш качыгдаар».