Read Ыдыктыг Библия, 2011 Иов 15 Bible Online

Иов 15 - Ыдыктыг Библия, 2011 bible

Иов 15

¹Теман чурттуг Элифаз мынча деп харыылаан:

²«Мерген угаанныг кижи хей-хоозун сөстер-биле харыылаар бе, бодунуң иштин изиг хат-биле долдурар бе?

³Ол утка чок сөстер-биле, ажык чок чугаа-биле удурланыр бе?

⁴Бургандан коргуушкунну ыңай октапкан-дыр сен, Аңаа мөргүүрү чүү-даа эвес деп бодаар-дыр сен.

⁵Кем-бурууң сени ол чугааларга өөредип каан-дыр, авыяас-кажар сөстерни шилип алган-дыр сен.

⁶Сени мен эвес, бодуңнуң аксы-сөзүң буруудатты, бодуңнуң-на чугааларың сеңээ удур херечилеп тур.

⁷Азы баштайгы кижи бооп төрүттүнген сен бе, тейлерни тургуспаан турда, чаяаттынган сен бе?

⁸Бурганның чөвүлелинге турган сен бе, Ооң мерген угаанын сиңирип алган сен бе?

⁹Бистиң билбезивис чүнү билип алган сен, угаап шыдавазывыс чүнү угаап билген сен?

¹⁰Бистиң аравыста буурул баштыг-даа, кырган-даа улус — сээң ачаңдан улуг назылыглар бар-дыр.

¹¹Сеңээ Бургандан келген аргалал, сеңээ чугаалаан чымчак сөстер эвээш болду бе?

¹²Сеткил-чүрээң сени кайнаар тыртып тур, чүге сээң карактарың килеңден кыптыгып тур? [23]

¹³Бурганга хорадаар-дыр сен, аксыңдан ындыг сөстер үнүп турар-дыр.

¹⁴Кижи амытан деп кымыл, ол канчап арыг боорул, херээженден төрүттүнген кижи канчап актыг боорул?

¹⁵Бир эвес Бурган ыдыктыг төлээлеринге безин бүзүревес, Ооң караанга дээр безин арыг эвес көстүр болза,

¹⁶бузут-бакты суг ышкаш ижип турар, чүдек-бужар, шаарланчак кижи төрелгетенде чүү боор!

¹⁷Сеңээ тайылбырлап берейн, мени дыңна, бодумнуң көргенимни чугаалап берейн;

¹⁸мерген угаанныгларның медеглээни, ада-өгбезинден дыңнааш, чажырбаан чүвезин чугаалаайн.

¹⁹(Чер-чуртувусту чүгле оларга берген, оларга даштыкы кижи салдар халдатпаан.)

²⁰Бузуттуг кижи бүгү назынында хилинчек көөр, кызагдакчы санныг чылдарда чурттаар;

²¹ооң кулаанга коргуушкуннуң алгы-кышкызы дыңналыр, амыр-тайбың чурттап орда, узуткакчы аңаа чедип кээр;

²²дүмбей черден үнүп кээринге ол бүзүревес, хылыш ону манап турар.

²³Ол аъш-чем дилеп тояап, „Кайыын тып аарыл?“ деп бодап чоруур [24], дүмбей караңгы үе ам дораан кээрин ол билип каар.

²⁴Түрегдел биле кызагдал ону коргудуп, дайынга белен хаан ышкаш, ону ажып турар —

²⁵чүге дээрге ол Бурганга удур холун аннып, Күчүлүг Бурганга удурланып,

²⁶аар, быжыг дозуг-камгалал туткаш, Аңаа удур турамыы-биле халдап үнген-дир.

²⁷Бузуттуг кижи бодунуң арнын, мага-бодун чагландырып алган-даа болза,

²⁸хоозураан хоорайларга, буступ кээп дүжер четкен, кагдынган бажыңнарга чурттай бээр.

²⁹Ооң эт-хөреңгизи, бай-байлаа бүдүн артпас, кошкулу чер кырынга өзүп-көвүдевес.

³⁰Ол караңгыдан камгаланып шыдавас, будуктарын чалбыыш чиген ыяш дег апаар, Бурганның тыныжы ону хадып аппаар [25].

³¹Ынчаар будалган кижи хоозун чүүлге хей-ле идегээр, ооң шаңналы чүгле хоозун чүүл боор болгай.

³²Ол хуусаа бетинде кадып каар, ооң будуктары бүрүленмес —

³³ол, виноград сывы дег, бышпаан каттарын дүжүр октаар, олива ыяжы дег, ооң чечектери тоглап каар.

³⁴Бургандан ойталаан улустуң чыыжы үре-түңнел чок боор, хээли алыр улустуң аалдарын от чиптер.

³⁵Хай-бачыт-биле иштелген улус бузут-бакты төрүп алыр, оларның ишти кара сагышты быжыр бодап чоруур».