Read Ыдыктыг Библия, 2011 Иов 16 Bible Online

Иов 16 - Ыдыктыг Библия, 2011 bible

Иов 16

¹Иов мынча деп харыылаан:

²«Мен ол ышкаш чүүлдү хөйү-биле дыңнаан мен; силер шупту аргалал эвес, човалаң эккелдиңер!

³Хоозун чугааның төнчүзү бар бе? Ынчаар харыылаарынче сени чүү албадап тур?

⁴Силер мээң орнумга турган болзуңарза, мен база силер ышкаш чугаалаар ийик мен — силерге удур чалчырап, бажымны чемелелдиг чаяр ийик мен;

⁵силерни аксы-сөзүм-биле „быжыктырып“, эрним шимчеткеним-биле „аргалаар“ ийик мен.

⁶Чугааланырымга-даа, аарышкым намдавас, ыыттавазымга-даа, оожургавас.

⁷Бурган мээң чилчиимни шуут үстү, чоок кижилеримни чок кылып каапты.

⁸Меңээ удур херечилел кылдыр Ооң холу мени тудуп алган, арып баксырааным база меңээ удур херечи бооп, мени арнымга чемелеп тур.

⁹Дайзыным менче кезе кайгап тур, Ол килеңнеп, өжээргээш, мени үзерлеп-чазарлап, диштерин менче кыжырадып тур.

¹⁰Улус мени чидиг дылы-биле дорамчылап тур, базымчалап, чаагымче дажып тур, меңээ удур шупту каттыжып алдылар.

¹¹Бурган мени бак улуска хүлээдип берген, бузуттугларның холунче киир октапкан.

¹²Мен дүвүрел чок турдум, а Ол мени чуура шаапкан, мойнумдан сегирип алгаш, буза шаап, Бодунуң согуннарынга кара кылдыр тургузуп алган.

¹³Ооң согуннары кайыын-даа ужуп кээп тур; Ол мээң бүүректеримни кээргел чок өттүр адып, өдүмнү черже төп тур;

¹⁴күштүг дайынчы дег, менче хөме халдап, улай-улай балыглап-ла тур.

¹⁵Мен качыгдалдың хевин кедип алдым, алдар-адым довуракка боражып чыдыр.

¹⁶Ыы-сыыдан арным кыза берди, карактарымны дүмбей дуглап тур.

¹⁷А мээң холдарым шын эвес чорук кылбаан, мээң мөргүлүм арыг!

¹⁸О, чер, мээң ханымны чажырба, мээң алгы-кышкым уттундуруп, чиде бербезин!

¹⁹А ам безин дээрде мээң Херечим бар, Ол меңээ өрүтен болчуп кээр.

²⁰Эш-өөрүм мени кочулап тур, а караам чажы Бурганның мурнунда аккан.

²¹Ийи кижи аразында херекти дег, Бурган биле кижиниң аразында чаргыны чарып болур турган болза!

²²Санныг чылдарым эрте бээр болгай, эглип келбес орукче чоруй баар мен».