Read Ыдыктыг Библия, 2011 Иов 18 Bible Online

Иов 18 - Ыдыктыг Библия, 2011 bible

Иов 18

¹Шуах чурттуг Вилдад мынча деп харыылаан:

²«Чугааларыңар кажан төнерил? Боданып көрүңер — оон чугаалажыылы.

³Мал-маган дег болуп, силерниң карааңарга мелегейлер бооп көзүлген херээвис чүл?

⁴Сен килеңнээш, бодуңну хинчектеп тур сен. Сен дээш чер ээнзирээр бе азы хая-даш турган туружундан шимчээр бе?

⁵Бузуттуг-бак кижиниң чырыы өжүп каар, ооң одундан чаштанчы безин артпас;

⁶ооң аалында чырык дүмбей бооп хуулар, ооң чырыткызы өже бээр.

⁷Ооң базымнары күжүн чидириптер, бодунуң-на бодалдары ону ужур шааптар.

⁸Ооң буттары какпаже киир базар, четкиже хөме кылаштай бээр;

⁹дузак ооң ээжээнден тудуп аар, хендир ооң мага-бодун ораай шааптар;

¹⁰черде аңаа чажыт какпа салып каан, кокпада ону ая манап турар.

¹¹Ындыг кижини чер болгандан коргуушкун сүртедип, ыңай-бээр дезип маңнаарынче албадап турар.

¹²Аштан ооң күжү кошкай бээр, айыыл-халап ооң чанында манап турар.

¹³Өлүмнүң дун төлү ооң мага-бодун хемирер, кежин оюп-дежип, чиптер.

¹⁴Идегеп турган аалындан ону ушта тырткаш, Коргуушкуннар хаанынче [27] аппаар.

¹⁵Хары улус ооң аалынга чурттай бээр [28], ооң чурттаан черинче изиг күгүр кудуптар.

¹⁶Бузуттуг-бак кижиниң адаанда дазылы кадып каар, үстүнде будуктары кургап каар.

¹⁷Ооң дугайында сактыышкын чер кырындан чиде бээр, кудумчуларга улус ооң адын уттуптар.

¹⁸Амылыглар оранынга ол артпас кылдыр, ону чырыктан дүмбейже сывырып чорудуптар.

¹⁹Чонунуң аразынга ооң ажы-төлү, үре-салгалы артпас, ооң чурттап турган черинге чоок кижилери артпас.

²⁰Ооң салым-хуузун дыңнааш, барыын чүкте улус коргар, чөөн чүкке база сүрээдеп сирилээр [29].

²¹Бузуттуг-бак улустуң оран-савазы, Бурганны билбес улустуң чурттаар чери ындыг үүлеге таваржыр».