Read Ыдыктыг Библия, 2011 Иов 2 Bible Online

Иов 2 - Ыдыктыг Библия, 2011 bible

Иов 2

¹Бир-ле хүн Дээрги-Бурган-Чаяакчының оолдары катап база Ооң мурнунга турар дээш чедип келген, оларның аразынга буруудадыкчы турган. Буруудадыкчы база Дээрги-Чаяакчының мурнунга туруптарга,

²Ол оон: «Сен кайыын келдиң?» — деп айтырган. Буруудадыкчы Дээрги-Чаяакчыга: «Мен чер-делегейни эргип кезип чордум» — деп харыылаан.

³Дээрги-Чаяакчы аңаа: «Мээң чалчам Иовту эскердиң бе? Чер кырында өске ындыг кижи бар бе — ол кем-буруу чок, чөптүг, Бургандан коргар болгаш бачыттан хая көрнүп чоруур кижи чүве. Ол Меңээ шынчы чоруун быжыг кадагалап чоруур хевээр-дир, а сен Мени Иовту кем-буруу чокка-ла узуткап каар кылдыр күткүп турдуң чоп» — дээн.

⁴Буруудадыкчы Аңаа: «Кеш орнунга кеш! Амы-тыны дээш кижи бодунда бар-ла чүвени бериптер.

⁵Ынчалза-даа Бодуңнуң холуң-биле ооң сөөк-даяанга, эът-бодунга дээптер болзуңза, ол Сени арныңга албан бак сөглээр!» — деп харыылаан.

⁶Дээрги-Чаяакчы буруудадыкчыга: «Ол боду ам сээң холуңда-дыр че, чүгле амызын үспе» — дээн.

⁷Буруудадыкчы Дээрги-Чаяакчыдан ыңай чорупкаш, Иовка таваңгайындан эгелээш, тейинге чедир коргунчуг оюлганнар чыпшырып каан.

⁸А Иов качыгдалдан хүлге олуруп алгаш, ириңин сивирери-биле сава бузундузу тудуп алган.

⁹Кадайы аңаа: «Сен Бурганга шынчы чорууңга быжыг хевээр сен бе? Бурганны бак сөглепкеш, өлү бер!» — дээн.

¹⁰Иов аңаа: «Сээң чугааң сээдең кадай чугаазы-дыр! Таанда-ла бис Бургандан чүгле эки чүве хүлээп аар, а багай чүве хүлээп албас улус бе?» — деп харыылаан. Ол бүгү болуп турза-даа, Иов бодунуң аксы-сөзү-биле бачыт үүлгетпээн.

¹¹Иовту тавараан бүгү хай-халап дугайында ооң үш эжи дыңнап кааш, кижи бүрүзү бодунуң чуртундан: Элифаз — Темандан, Вилдад — Шуахтан болгаш Софар — Наамадан олче чорупкан. Олар Иовка кады барып, ооң-биле кады хараадап ыглажыр, ону аргалаар дээш ужуражып келген.

¹²Иовту ырактан көрүп кааш, танывайн барганнар. Олар ынчан качыгдалдан ишкирнип ыглажып, боттарының хевин ора соп, доозун-довуракты дээрже чажып, баштарынче уруп эгелээн.

¹³Чеди хүн, чеди дүн дургузунда эжи-биле кады черге олурганнар. Ооң кедергей хилинчектенип турарын көргеш, оларның кайызы-даа аңаа чаңгыс сөс-даа чугаалаваан.