Read Ыдыктыг Библия, 2011 Иов 27 Bible Online

Иов 27 - Ыдыктыг Библия, 2011 bible

Иов 27

¹Иов бодунуң чугаазын уламчылаан:

²«Меңээ чөптүг шииткел көргүспээн Бурганның ады-биле, сеткилимни качыгдал-биле долдурган Күчүлүг Бурганның ады-биле даңгыраглап тур мен:

³мээң амы-тыным үзүлбээнде, Бурганның хайырлаан тыныжы думчуум үдүнден үнмээнде,

⁴мээң аксымдан меге сөстер черле үнмес, мээң дылым меге чүве чугаалавас.

⁵Силернии шынныг деп кажан-даа чугаалавас мен, дириг чорааш, буруу чогумдан ойталавас мен;

⁶бодумнуң актыымдан салдыкпайн туттунар мен, арын-нүүрүм мени чурттап эрткен үем дээш буруудатпас [51].

⁷Дайзыным бузуттуг кижи деп, удурланыкчым — чөптүг эвес кижи деп санаттырзын.

⁸Бурган Оон ойталаан кижиниң амы-тынын үзүп кааптарга, төнчүзү кээрге, ол кижи чүү чүвеге идегээрил?

⁹Аңаа кызагдал таваржырга, Бурган ооң алгы-кышкызын дыңнаар бе?

¹⁰Күчүлүг Бургандан ол таалал алыр бе, Ону үргүлчү кыйгырар бе?

¹¹Бурганның күштүг холунуң дугайында мен силерге чугаалап берейн, Күчүлүг Бурганның оруктарын чажырбаайн.

¹²Ооң кадында бо бүгүнү шуптуңар көрбейн тур силер бе? Ынчаарга чүге хоозун чүве чулчуруур силер?

¹³Бузуттуг кижиге Бурганның берген хуу-салымы бо-дур, кызагдакчының Күчүлүг Бургандан алыр чүвези бо-дур [52]:

¹⁴ооң ажы-төлү өзүп-көвүдээн-даа болза, хылыш чемижи апаар, ооң үре-салгалы тоттур чемненмес;

¹⁵а дириг артканнарының бажын хамчык аарыг чиптер, дулгуяк кадайлары оларның ажыын ажып ыглашпас.

¹⁶Ындыг кижи доозун дег хөй мөңгүннү, дой-довурак дег эңмежок хепти чыып-даа алза,

¹⁷ооң чыып алган хевин чөптүг кижи кедер, мөңгүнүн кем-буруу чок кижи үлүг кылдыр алыр.

¹⁸Ооң бажыңы ээремчигей дузаа дег [53] хээрек, таңныыл кижиниң шөлде чадыры дег быжыг эвес;

¹⁹ол бай кижи бооп удуп чыдып аар, а оон ол-ла: эртен караан ажыдыптарга, куруг калган боор!

²⁰Коргуушкун ону үер суу дег хөме аптар, шуурган ону дүне када хадып аппаар;

²¹казыргы-хат алгаш баар, ону турган черинден тура тыртып, хадып аппаар;

²²олче кээргел чок хөме халдап келгеш, хая көрбейн дезеринче албадаптар.

²³Улус ону көргеш, адыш часкаар база ол каяа-даа турда, ону кыжырыыр».