Read Ыдыктыг Библия, 2011 Иов 29 Bible Online

Иов 29 - Ыдыктыг Библия, 2011 bible

Иов 29

¹Иов бодунуң чугаазын уламчылаан:

²«О, эрткен үемни эгидип алган болзумза, Бурганның мени камгалап чорааны хүннерни;

³ынчан Ооң чырыткызы мээң кырымга чырып турган, Ооң чырыы мени дүмбей өттүр эдертип аппаар турган!

⁴О, биеэги четчип-бышкан хүннеримни! Ынчан Бурган-биле найыралым аалымны камгалап,

⁵Күчүлүг Бурган мени ынчан кагбаан турган, а ажы-төлүм мени хүрээлеп турган;

⁶ынчан оруумга сүт агып чыткан, хаялар меңээ олива үзүн аксып берип турган.

⁷Мен ынчан хоорай хаалгазынче баргаш, төп шөлде олудумга саадаптар турдум —

⁸мени көрүп кааш, аныяктар орук чайлап бээр, а кырганнар көдүрлүп келгеш, турар турган.

⁹Даргалар чүве чугаалаарындан тырттынып, аксын адыжы-биле дуглап аар турган;

¹⁰ат-сураглыгларның үнү үнместеп, дылы таалайынга чыпшына бээр турган.

¹¹Мени дыңнааннар „амыр-чыргалдыг сен“ дээр, мени көргеннер — мактаар турган чүве,

¹²чүге дээрге ыглап-сыктаан түреңги кижини, деткимче чок өскүстү камгалап турган мен.

¹³Өлүп чыткан кижи мени йөрээп турган, дулгуяк херээженниң чүрээ мээң ачымда өөрүп-байырлап турган;

¹⁴шынныг чорукту хеп дег, чөптүг чорукту тон биле бөрт дег кедип чораан мен.

¹⁵Согурларга карак бооп, аскак-бүскектерге буттар бооп турган мен;

¹⁶ядыыларга ада бооп, танывазым-даа кижиниң чаргызын чаржып берип турган мен;

¹⁷бузуттуг-бак улустуң азыг-диштерин сый шанчып, оларның аксында олчазын ушта тыртып турган мен.

¹⁸Бодап кээримге, бодумнуң уямга мөчүүр ышкаш бооп, чуртталгам хүннери элезин дег эмге-тикчок кылдыр сагындырар турду;

¹⁹дазылдарым сугга чедип турар, будуктарымга шалың хонуп аар,

²⁰алдар-хүндүм элеп читпес, күш-шыдалым хере тыртып каан ча дег кылдыр сагындырар турду.

²¹Улус мени ыыт чок дыңнап, арга-сүмемни манап аар турду;

²²мээң сөстерим оларны суггарар, чугаам төнерге, немээр чүвези чок боор турду.

²³Чаъсты ышкаш, мээң чугаамны манаар, часкы чайыкты дег, аксы-биле дозуп аар турдулар;

²⁴оларга хүлүмзүрүүрүмге, бүзүреп чадап каар [56], арын-шырайым чырып кээрге, өөрүүр турдулар.

²⁵Мен оларга орук айтып, баштыңы бооп турдум, бодунуң шерииниң аразында хаан дег, качыгдааннарга аргалакчы дег чурттап чордум».