Read Ыдыктыг Библия, 2011 Иов 31 Bible Online

Иов 31 - Ыдыктыг Библия, 2011 bible

Иов 31

¹«Аныяк кысче туралап көрбес бооп карактарым-биле дугуржуп алган мен.

²Кижиге өрү дээрде Бургандан кандыг үүле, бедик кудайда Күчүлүг Бургандан кандыг үлүг-хуу онааттынганыл?

³Бачыт үүлгедикчизинге өлүм-чидим, бузуттуг хейге — узуткаашкын онаап каан эвес чүве бе?

⁴Бурган мээң оруктарымны көрбейн турар бе, мээң шупту базымнарымны санавайн турар бе?

⁵Мен меге-биле чурттап чораан мен бе, авыяас-опче буттарым далажып турган бе?

⁶Мени чөптүг чоруктуң деңзизинче салып кагзын, Бурган мээң кем-буруу чогумну билип алзын!

⁷Бир эвес базымнарым шын оруктан өскээр барып, чүрээм көрүжүм аайы-биле барып, холум хирге боражып турган болза,

⁸тарып каан дүжүдүмнү өске улус ажаап чизин, өзүмнеримни дазылы-биле тура тыртып каапсын!

⁹Бир эвес чүрээм өске кижи кадайынга хандыкшып, туралааш, ооң бажыңының чанынга кедеп орган болзумза,

¹⁰мээң кадайым өске кижиниң тараазын дээрбелезин, ооң-биле өске эрлер хойгашсын.

¹¹Чүге дээрге ындыг чорук — бужар үүлгедиг-дир, шиидер ужурлуг кемниг херек-тир;

¹²ол дээрге Тамыже дүжүрүп, хүлдендир чиптер, бар-ла чүвемни чүү-даа арттырбайн өрттедиптер от-тур.

¹³Бир эвес меңээ хомудалдыг чалчаларымның чаргылдажыр эргезин кызагдаан болзумза,

¹⁴Бурган шииткел кылып туруп кээрге, канчаптар мен, менден харыы негээрге, чүү дээр мен?

¹⁵Мени ием иштинге чаяап каан Бурган оларны база чаяап каан эвес бе? Шуптувусту уруг савазынга чаңгыс Чаяакчы ботталдырып каан!

¹⁶Ядамыктың дилээн күүседиринден ойталаан мен бе, дулгуяк херээженниң карактарының одун өжүрүп каан мен бе?

¹⁷Хлевимни чааскаан чип олурган мен бе, өскүс кижи-биле үлешпээн мен бе?

¹⁸Чок, аныяамдан-на өскүс кижиге ада дег чордум, чажымдан-на дулгуяк херээженче сагыш салып келдим.

¹⁹Бир эвес чанагаш доңуп өлүп чыдар кижиже азы хеп чок ядыы кижиже тоомча чок көрген болзумза;

²⁰ону хоюм дүгү-биле чылыглаваан болзумза, ол мени йөрээвээн болза;

²¹шииткел черинге деткимче алыр мен деп билир болгаш, өскүс кижиже холум көдүрген болзумза —

²²мээң эктим оорга сөөгүнден адырлып калзын, холум шенээнден сыйлып калзын!

²³Бургандан кээр кеземчеден коргуп турар мен, Ооң өндүр бедииниң мурнунга ындыг чүүлдер кылып диттикпес мен.

²⁴Бир эвес мен алдынга ынанып, эртинеге: „Сен — мээң чөленгиижим сен“ — деп турган болзумза;

²⁵бир эвес байлаамның эгээртинмезинге, холум хөйнү чыып алганынга өөрүп турган болзумза;

²⁶чырык хүннү көргеш, чайынналып көжүп чоруур айны көргеш, мөгейип,

²⁷сеткил-чүрээмниң ханызында дуурайлаттырып, оларга хүндүлел көргүзүп турган болзумза —

²⁸шиидер ужурлуг кемниг херектер үүлгеткеним ол, Дээди Өрүкү Бургандан ойталааным ол болур ийик.

²⁹Дайзынымның буурааны дээш өөрүп, ооң айыыл-халавы дээш байырлап турган мен бе?

³⁰Чок, дайзыным өлүр кылдыр каргыш салып, аксым-биле бачыт үүлгетпээн мен.

³¹Мээң аалымның улузу кажан-даа: „Ооң эът-чемин тоттур чигген болза!“ — дишпээн.

³²Чорукчулар даштыгаа хонуп көрбээн, эжиим оларга үргүлчү ажык турган.

³³Өске улус дег, бачыдымны чажырыпкан мен бе, бузут-багымны чажырып, хойлап алган мен бе?

³⁴Мөөң чондан корткаш, чаңгыс чер чурттугларымның бак көөрүнден сезингеш, ыыт чок барып, дашкаар үнмейн олурган мен бе?

³⁵О, мени оода кандыг-бир кижи дыңнаан болза! Мээң адым салган хомудалым бо-дур — Күчүлүг Бурган харыылазын! Негекчим дүрүг саазынга буруудадыышкынын бижизин —

³⁶мен ол дүрүгнү эктимге салып аар ийик мен, алдар-хүндүнүң дээрбээ дег, бажымга кедип аар ийик мен.

³⁷Базымнарым санын Бурганга ажыдып берип, ызыгууртан кижи дег бажым көдүрүп, Олче чоокшулаар ийик мен.

³⁸Бир эвес черим меңээ удур алгырып, шөлде андазын истери бачыттарымдан ыглап-сыктап турар болза;

³⁹бир эвес мен ооң дүжүдүн халаска чип, тараачыннарны кызып-кыйып турган болзумза,

⁴⁰кызыл-тас орнунга тенниг оотпак, арбай орнунга — бок үнүш өзүп үнзүн!» Иовтуң чугаа сөзү мооң-биле төнген.