Read Ыдыктыг Библия, 2011 Иов 38 Bible Online

Иов 38 - Ыдыктыг Библия, 2011 bible

Иов 38

¹Ынчан Дээрги-Чаяакчы Иовка шуурган иштинден мынча деп харыылаан:

²«Билиг чок сөстер-биле Мээң бодалымны карартыр хире кым сен сен?

³Ёзулуг эр дег, куржанып белеткенип ал; Мен айтырайн, а сен Меңээ харыыла.

⁴Мен чер-делегейни үндезилеп турумда, сен каяа турдуң? Билир болзуңза, харыыла.

⁵Билир-ле боор сен аа: ооң хемчээлин кым айтып кагжык, хемчээр хендирни ооң кырынга кым хере тыртчык?

⁶Ооң үндезиннери чүү чүведе туттунуп турарыл, ооң тавааның дажын кым салганыл?

⁷Ол үеде эртенги сылдыстар өөрүп-байырлап, Бурганның бүгү оолдары өөрүшкүлүг алгыржып турган болгай.

⁸А далай төрүттүнгеш, аттыгып үнерге, кым ону хаалга-биле хаап кааныл?

⁹Мен ону булуттар-биле шуглап, дүмбей-биле ораап каан мен;

¹⁰ооң кызыгаарын доктаадып, дээктерлиг хаалганы тургузуп каан мен;

¹¹„Маңаа четкеш, оон ыңай барбас сен, сээң турамык чалгыгларың маңаа доктаар“ — дээн мен.

¹²Сен кажан-бир шагда эртенге дужаал берген сен бе, даңга турар чер айыткан сен бе?

¹³Даң черниң ужу-кыдыын хөме апкаш, бузуттугларны черден дүжүр силгипсин деп айыткан сен бе?

¹⁴Даң хаяазының ачызында черниң хевири таңмага бастырган дой дег өскерлип, шокар хеп дег апаар.

¹⁵А бузуттуглардан чырыкты хунаап аар, күчүлелдиң холун сыйып каар.

¹⁶Далайның үнген дөстеринге четкен сен бе, аажок ханы ээремниң дүвүнге кылаштаан сен бе?

¹⁷Өлүглер оранының эжиктери сеңээ көскү апарган бе, дүмбей караңгының хаалгазын көрген сен бе?

¹⁸Черниң делгемин эргий көрген сен бе? Ол бүгүнү билир болзуңза, меңээ чугаалап бер.

¹⁹Чырыктың чурттап турар черинче орук кайыл, караңгының турар чери кайдал?

²⁰Сен оларның черинче барган сен бе, бажыңынче баар орукту билир сен бе?

²¹Билбейн канчаар сен! Оларның үе-чергези-дир сен — назының ындыг узун болгай!

²²Харның дээрде шыгжамырынче кирген сен бе, долунуң шыгжамырларын көрген сен бе?

²³Оларны дүвүрээзинниг үеге дээш, дайын-чаа, тулчуушкунга дээш курлавырлап каан мен.

²⁴Кандыг орук-биле чырык аңгыланып тарап [69], чөөн чүктүң хады чер кырында тарап турарыл?

²⁵Кым-на чайыктарга дээрге үттер дежип берип, чаңнык-диңмирээшкинге орук айтып берип турарыл?

²⁶Кым чурттакчы чок черлерни, кижи чок ээн кургаг ховуну суглуг болдуруп,

²⁷черлик ховуну суггарып, ногаан оът-сигенни өстүрүп турарыл?

²⁸Чаъстың адазы бар бе? Шалыңның дамдыларын кым төрүдүп турарыл?

²⁹Кымның хырнындан дош үнүп турарыл, кым дээрниң хыраазын божуп турарыл?

³⁰Ындыг өйде суглар дашталдыр доңуп, дүп чок ээремниң кыры көжүй бээр болгай.

³¹Сен Үгер сылдысты кожуп каан сен бе, Үш-Мыйгактың дужаан кошкадып шыдаар сен бе?

³²Өөр сылдыстарны үезинде чырыдып үндүрүп, Чеди-Хаанны кожа сылдыстары-биле углап башкарып шыдаар сен бе?

³³Дээрлерниң дүрүмнерин билир сен бе, черге оларның чагыргазын доктаадып шыдаар сен бе?

³⁴Булуттарга дыңналдыр алгырып шыдаар сен бе? Элбек суглар сени хөме алыр бе?

³⁵Чаңныктар сээң дужаалың ёзугаар ужуп чоруптар бе, сеңээ: „Белен бис!“ — дээр бе?

³⁶Кым чүректи мерген угаанныг кылып кааныл, кижини угаан-сарыылдыг кылып кааныл? [70]

³⁷Булуттарны санаптар хире мерген угаанныг кым барыл, дээрниң хууңун кым дүжүр октаптарыл?

³⁸Доозун-довурак ынчан малгаш апаар, борбак малгаштар чыпшынчы бээр ийик.

³⁹Арзылаң төлдерин тоттуруп алзын дээш, аңаа олча тудуп берген сен бе?

⁴⁰Ооң төлдери үңгүрүнде чаштынып чыдар азы чокпак үнүш аразында кедеп чыдар болгай.

⁴¹Кускуннуң төлдери чиир чүве тыппайн, Бургандан дуза дилеп кыйгырып, ыңай-бээр ужуп чоруп турда, кым оларга аъш-чем чорудуп бээрил?»