Read Ыдыктыг Библия, 2011 Иов 39 Bible Online

Иов 39 - Ыдыктыг Библия, 2011 bible

Иов 39

¹«Хаяларга чуңмаларның төрүүр үезин билир сен бе, ивилерниң төрүп турарын көрген сен бе?

²Оларның каш ай боос чоруурун санаан сен бе, кажан төрүүрүн билир сен бе?

³Олар ынчан олура аарак, чаш төлүн төрүп, боттарының хилинчээнден адырлып аар;

⁴оларның төлдери хову-шөлге күш кирип, өзүп-доругар, а оон аваларын кажан кезээде каапкаш баар.

⁵Черлик элчигенге кым хосталга бергенил, ооң дужаан кым чежип кааныл?

⁶Мен ону ховуга чурттадып каан мен, кужурлуг чурттаар чер кылып берген мен.

⁷Хоорайның хөлзээзинин ол кыжырыыр, сүрүкчүнүң алгы-кышкызын дыңнап көрбээн;

⁸ол дагларга оъттап чоруур, ногаан оът-сиген дилеп тып алыксаар.

⁹Черлик буга сеңээ бараан болуксаар бе, сээң мал чемгерер чериңге хонар бе?

¹⁰Сээң шөлүңнү аңдарзын дээш, ону андазынга кожуп шыдаар сен бе?

¹¹Ооң аажок улуг күжүнге идегээр сен бе, бодуңнуң ажылыңны аңаа бүзүрээр сен бе?

¹²Ол ээп келгеш, сээң тарааңны шаңга чыып бээр деп ынаныр сен бе?

¹³Страус куш чалгыннарын өөрүшкүлүг часкап турар, ынчалза-даа ооң чалгыннары шиленниң чүглери-биле деңнешпес.

¹⁴Кыс страус чуургаларын элезинге чылыдыр салып кааш, оларын каапкаш баар;

¹⁵кандыг-бир кижиниң буду чуура базып, черлик аң-мең таптап кааптарын бодавас.

¹⁶Ол бодунуң төлдеринге, өскениинге дег, каржы, ооң күжениишкини хей боорундан сезинмес,

¹⁷чүге дээрге Бурган аңаа мерген угаан бербээн, угаанныг кылдыр чаяап кагбаан.

¹⁸Ынчалза-даа ол куш көдүрүлгеш, маңнап ыңай болза, аъттыг кижини белени-биле ажып каар.

¹⁹Аътка күштү сен берип, ооң мойнун чел-биле шып каан сен бе?

²⁰Ону шартылаа дег халып-шураар кылып каан сен бе? Ооң хаарыктаары коргунчуг.

²¹Аът өөрүп, черни дуюу-биле казып тур, бар шаа-биле тулчуушкунче чүткүп тур;

²²айыылды ол коргуш чогу-биле шоодар, хылыштан-даа дезип маңнавас;

²³ооң быктында саадак шыңгыраан, узун, кыска чыдалар кылаңнашкан.

²⁴Ол хөлзээн чүткүлүнден довурак чип, труба этсирге, чаңгыс черге туруп шыдавас,

²⁵ооң үнүн дыңнааш-ла, киштептер, баштыңнарның алгы-кышкызын, аг-шеригниң кыйгызын, тулчуушкун даажын ырактан эндевес.

²⁶Хартыганың кылыйтыр ужуп, чалгыннарын мурнуу чүкче хере салыры — сээң мерген угааның ачызында бе?

²⁷Эзирниң кылыйтыр ужуп үнгеш, бедик черге уя тудуп аары — сээң сөзүң ёзугаар бе?

²⁸Ол куш хаяда чурттап, хонуп турар, ооң шивээзи — дагның чалымы;

²⁹оортан ол олчазын харап көөр, ооң карактары дыка ырадыр көрүп турар.

³⁰Эзир төлдеринге хан ижиртир, өлүрүп алган олчазынче ужар».

³¹Дээрги-Чаяакчы Иовка оон ыңай мынча дээн:

³²«Бо маргыжыкчы Күчүлүг Бурган-биле чөрүжүп турар де?! Бурганны чемелеп турар кижи Аңаа харыы тутсун!»

³³Иов Дээрги-Чаяакчыга мынча деп харыылаан:

³⁴«Мен чөгенчиг-дир мен. Сеңээ чүү деп харыылаайн? Аксымны холум-биле дуглаайн.

³⁵Бир катап чугаалаан мен — ам харыылап шыдавас мен, оон база катап чугаалаан мен — ам ыыттавас мен».