Read Ыдыктыг Библия, 2011 Иов 4 Bible Online

Иов 4 - Ыдыктыг Библия, 2011 bible

Иов 4

¹Теман чурттуг Элифаз мынча деп харыылаан:

²«Чугаа-сөзүм сеңээ анчыг бооп чадавас, ындыг-даа болза, ыыттавайн баар арга бар бе?!

³Сен бодуң хөй улусту билиндир сургап, суларап калган холдарны күш киирип турдуң.

⁴Илдигип кээп дүшкен улусту сээң сөстериң көдүрүп турду, тептиккен улусту быжыглап турдуң.

⁵А ам айыыл-халап сени таварыырга, харыксырап калдың, ол сеңээ дээптерге, сагыш-сеткилиң дүвүреди.

⁶Бургандан коргуушкун сеңээ чөленгиишти, а оруктарың кем-буруу чогу — идегелди берип турар эвес бе?

⁷Сактып кел: буруу чок кижи өлүр ийик бе, чөптүглер узуткаткан бе?

⁸Мен көөрүмге, хай-бачыт аңдарып, човалаң тарып турар улус оозун ажаап аар-дыр.

⁹Олар Бурганның тыныжындан өлүп каар-дыр, Ооң килеңиниң эзининден чиде бээр-дир.

¹⁰Арзылаңнар алгызы, ырланган үнү дыңналып турза-даа, оларның дижин тура тыртып кааптар;

¹¹араатан аң олча тыппаанындан өлүп каар, арзылаңчыгаштар тарай маңнажы бээр.

¹²Чажыт сөс меңээ билдингир апарды, мээң кулаам сымыранган сөс дыңнап кагды:

¹³дүвүренчиг дүнеки көстүүшкүннер аразында, улус улуг уйгузунче дүлүнген үеде,

¹⁴коргуушкун болгаш сирилээшкин мени хөме ап, сөөктерим сириңейни берди.

¹⁵Бир сүлде мурнум-биле эрте берди [4], бажым дүгү дораан адыя берди.

¹⁶Ол кээп туруп алды, а кым боор деп танывадым — чүгле тода эвес хевир-дүрзү мурнумда турду. Ыржым өттүр бир-ле үн дыңнап кагдым:

¹⁷„Кижи амытан Бургандан шынныг [5] боор бе, Чаяакчызындан арыг боор бе?

¹⁸Бурган Бодунуң чалчаларынга безин бүзүревес-тир, Бодунуң төлээлериниң безин четпестерин көрүп каар-дыр.

¹⁹А дойдан туткан, довурак-доозунда турар бажыңнарда чурттаан [6], үзүт-ховаган ышкаш чылча базып каап болур кижилер дугайында чугаалаан-даа ажыы бар бе?

²⁰Олар эртен бар, а кежээ чок апаар — шуут чиде бээри эскертинмес.

²¹Оларның оран-савазын быжыглаан багларны үзе тыртып каапкан. Улус мерген угаан чедип албайн өлүп каар“».