Read Ыдыктыг Библия, 2011 Иов 41 Bible Online

Иов 41 - Ыдыктыг Библия, 2011 bible

Иов 41

¹Левиафанның мурнунга чөгелиң төнер; ооң чүгле хевирин көргеш, кээп дүжер сен.

²Ону хөлзедиптер болзуңза, ол каржы-дошкун-на! [73] А кым Мээң мурнумга туруп шыдаарыл? [74]

³Меңээ удур туржуптар кижи бар бе, ону эки аажылаар мен. Чырык черде бүгү чүве — Мээңии-дир!

⁴Левиафанның мага-бодунуң кезектериниң, оларның күчү-күжүнүң, кайгамчык тургузуунуң дугайында ыыттавайн барбас мен.

⁵Кым ооң хевин ушта тыртып шыдаарыл, ооң ийи каът куяк шывыын өттүр шанчарыл? [75]

⁶Кым ооң аксының хаалгазын ажыдып шыдаарыл? Ооң дээрбектелчек диштериниң коргунчуун!

⁷Ооң өндүр-чаагай одуругланчак дозуг-камгалалдарын, таңма-биле дег, адырлыр аргажок кылдыр кожуп каан;

⁸оларны сырый каттыштырган — аразындан агаар безин эртпес;

⁹бирээзин өскезинге чыпшыр идип каан — аңгылаары болдунмас кылдыр тудуштурган.

¹⁰Левиафан азырыптарга, чаңнык кызаш дээр, ооң карактары даң хаяазының херелдери дег;

¹¹ооң аксындан чаштанчы оттар кызаңнап, тарадыр ужуп турар.

¹²Ооң думчуунуң үттеринден ыш-бус, одаг кырында хайынган паштан дег, бургураан;

¹³ооң тыныжы көстер одун өөскүткен, аксындан чалбыыш чалынналган.

¹⁴Ооң мойнунда күш чажыртынган, коргуушкун ооң мурнунда маңнап чоруур.

¹⁵Ооң эът-бодун быжыг кылдыр тудуштуруп каан — шуткуп каан дег, чайгылыш дивес;

¹⁶ооң чүрээ даш дег, дээрбе дажы дег кадыг.

¹⁷Ол туруп кээрге, күштүг-шыырактар безин [76] корга бээр, ооң халдаашкынын дозуп шыдавайн аткаарлап эгелээр.

¹⁸Аңаа хылыш күш четпес, узун-чолдак чыдалар, согун-даа аңаа дыынмас;

¹⁹демирни ол сиген деп, хүлерни — ирик ыяш деп санаар.

²⁰Ча-согун ону дезеринче албадавас, шывадаан даштар аңаа тараа тогланчызы дег болур.

²¹Моңну ол тараа сывы деп санаар, чыданың сыгыды аңаа каттырынчыг.

²²Ооң хырны — чидиг бузундулар дег, ол малгашты кежи-биле илииртээр.

²³Левиафан далайны пашта суг дег бургурадып, хайынган үс дег мылдырадыптар.

²⁴Ооң соонга чырып турар ис артып каар, сактырга, суг кыры агара берген дег боор.

²⁵Чер кырында аңаа дөмей дириг амытан чок: ону коргуш чок кылдыр чаяап каан;

²⁶бүгү улуургак чүвеже ол тиилелгелиг көөр, ол — чоргаар бүгү дириг амытаннарның хааны».