Read Ыдыктыг Библия, 2011 Иов 42 Bible Online

Иов 42 - Ыдыктыг Библия, 2011 bible

Иов 42

¹Иов Дээрги-Чаяакчыга мынча деп харыылаан:

²«Мен билир мен: бүгү чүве Сээң эргеңде, чүнү-даа бодап аарыңга, Сеңээ болдунмас чүве чок.

³Билиг чок сөстер-биле Сээң бодалыңны баксырадыр хире кым мен? Ийе, мен билбес чүвем дугайында, меңээ билдинмес кайгамчык чүүлдер дугайында чугаалап турдум.

⁴Мени дыңнап көрем, чугаалап көрейн; Мен айтырайн, а Сен меңээ харыылап көрем.

⁵Сээң дугайыңда мооң мурнунда чүгле дыңнап турган мен, а ам карактарым Сени көрүп тур.

⁶Ынчангаш бүгү сөстеримден ойталап тур мен, доозун-довурак, хүлде олуруп алган, буруум миннип тур мен».

⁷Дээрги-Чаяакчы Иовка чугаазын дооскаш, Теман чурттуг Элифазка мынча дээн: «Сеңээ база сээң ийи эжиңге Мээң дугайымда Иов чалчам ышкаш шынын чугаалавааныңар дээш килеңим кыптыгып тур.

⁸Ынчангаш чеди бугажык биле чеди кошкардан ап алгаш, Мээң чалчам Иовка баргаш, ол малды бодуңар дээш бүрүн өрттедир өргүл кылдыр салыңар, а Мээң чалчам Иов силер дээш мөргүзүн. Мен ооң мөргүлүн хүлээп алыр мен — оон башка силерни бужар сөстериңер дээш кезедир мен, чүге дээрге силер Мээң дугайымда Иов чалчам ышкаш шынын чугаалавадыңар».

⁹Ынчан Теман чурттуг Элифаз, Шуах чурттуг Вилдад болгаш Наама чурттуг Софар баргаш, Дээрги-Чаяакчының оларга дужааганын ёзугаар кылган. Дээрги-Чаяакчы Иовтуң мөргүлүн хүлээп алган.

¹⁰Иов эш-өөрү дээш мөргүп дооскан соонда, Дээрги-Чаяакчы аңаа эки чолду эгидип берген: ооң мурнунда турганындан ийи катап хөйнү хайырлаан.

¹¹Иовтуң бүгү эр, кыс ха-дуңмазы, бүгү биеэги таныш өөрү чедип келгеш, ооң бажыңынга кады чемненип дойлаан. Олар Дээрги-Чаяакчының олче ытканы бүгү хай-халап дээш ону кээргеп, аргалап турган. Кижи бүрүзү Иовка бир кесита [77] биле бир алдын сырга берген.

¹²Дээрги-Чаяакчы Иовтуң чуртталгазының арткан чылдарында аңаа, биеэги чылдарынга бодаарга, оон-даа хөй ачы-буян хайырлаан. Ол ам 14 000 хой-өшкүлүг, 6000 тевелиг, 1000 эжеш шарылыг болгаш 1000 кыс элчигенниг апарган.

¹³Ол чеди оолдуг, үш кыстыг болган.

¹⁴Бирги уруун Эмима деп, ийигизин — Кассия деп, үшкүзүн — Керен-Гаппух деп адап алган [78].

¹⁵Бүгү чер-делегейде Иовтуң уруглары дег кайгамчык чараш кыстар турбаан. Ачазы оларга акылары-биле өнчү үзүп берген.

¹⁶Ол бүгүнүң соонда чыл чурттап, бодунуң ажы-төлүнүң ук-салгалын дөрткү салгалга чедир көрген.

¹⁷Иов кыраан назынында, чуртталгазынга пөгүп, мөчээн.