Read Ыдыктыг Библия, 2011 Иов 5 Bible Online

Иов 5 - Ыдыктыг Библия, 2011 bible

Иов 5

¹«Кый деп көр, кым сеңээ харыылаар-дыр? Дээрниң ыдыктыг төлээлериниң кайызын дуза дилеп кыйгырар сен?

²Мелегей кижини килеңнээчели өлүмге чедирер, а кенен кижини изиглээшкини узуткап каар.

³Көрген мен: мелегей кижи турумчуп чурттай берген болур, ынчалза-даа ооң бажыңын хенертен каргыш таварыыр [7].

⁴Ооң ажы-төлүнге болчур кижи чок, оларны хоорайның төп шөлүнге дарлап-бастыр, а камгалаптар кым-даа чок болур.

⁵Оларның дүжүдүн өске — аштаан кижи сыырыптар, тенниг хараган аразында үнгенин безин арттырбас, а суксаан кижи оларның эт-хөреңгизин ажырыптар.

⁶Хай-халап черден үнүп келбес, човалаң хөрзүнден өзүп келбес-ле болгай;

⁷а кижи, чаштанчының өрү ужары дег, човалаңны боду төрүүр [8].

⁸А мен бодум Бургандан дуза дилеп кыйгырар мен, ажыл-херээмни Аңаа бүзүреп дагзыр мен.

⁹Ооң ажыл-херээ өндүр улуг, билип аары болдунмас, Ооң кайгамчык чүүлдери эмге-тикчок.

¹⁰Бурган черже чаъс чагдырып, шөлдерни суггарып турар;

¹¹базындырганнарны бедикче үндүрүп, ыглап-сыктааннарны камгалалче өрү көдүрүп турар;

¹²кажарларның бодалдарын үрей шаап, оларның холунче чедимче кирбес кылып турар;

¹³мерген угаанныг дирткеннерни оларның-на кажары-биле тудуп, оптугларның сүмелерин будулдуруп турар:

¹⁴чырык хүндүс-ле оларны караңгы бүргей аптар, дал дүъште, дүне дег, суйбанып чоруурлар.

¹⁵Бурган ядыы күжүрнү хылыштан, дайзыннарының аксындан, күштүглерниң холундан камгалаар.

¹⁶Ынчаарга түреңги кижиде идегел бар, а бузут-бак аксын хаап аар.

¹⁷Бурганның чемелеп турар кижизи амыр-чыргалдыг! Күчүлүг Бурганның эдип-чазаар сургаалын хүлээвейн барба:

¹⁸Ол сени балыглаза-даа, балыыңны Боду шарып бээр, Ол сопса-даа, Ооң-на холдары экиртип каар.

¹⁹Алды айыыл-халаптан Ол сени камгалаар, чедиги-даа айыыл сеңээ дегбес;

²⁰аш-чут үезинде сени өлүмден, дайын үезинде — хылыштан адырып каар;

²¹нүгүлдүң кымчызындан чайлай бээр сен, хоозурал кээринден кортпас сен.

²²Хоозурал биле аш-чутту кочулаар сен, черлик аң-араатандан кортпас сен;

²³шөлде даштар-биле тайбың керээзи чарар сен, черлик аң-мең сээң-биле эп-найырал тудар.

²⁴Сээң аалыңга чаагай чорук келгенин билип аар сен, хой кажаазынче көөрүңге, четпес чүүл чок боор [9];

²⁵хөй санныг үре-салгалдыыңны көрүп каар сен, салгакчыларың чер кырында оът-сиген дег боор.

²⁶Четчип бышкан назыныңда чевегже кире бээр сен, үезинде ажааган тараа бажы дег боор сен.

²⁷Илередип билип алган чүүлүвүс ол-дур — ылап-ла ындыг! Дыңнап алгаш, бодуң шиңгээдип ал».