Read Ыдыктыг Библия, 2011 Иов 9 Bible Online

Иов 9 - Ыдыктыг Библия, 2011 bible

Иов 9

¹Иов мынча деп харыылаан:

²«Мен билир мен: ол бүгү ылап-ла ындыг. Ынчалза-даа кижи амытан Бурганның мурнунга канчап агартынарыл?

³Кандыг-бир кижи Ооң-биле чаргылдажыр дээр болза, Ооң салган муң айтырыының чаңгызынга-даа харыылап шыдаар эвес.

⁴Мерген угаанныг-даа, күчү-күштүг-даа кижи Бурган-биле маргышкаш [13], менди арткан деп чүве турган бе?

⁵Ооң дагларны канчаар шимчедирин кым-даа билип шыдавас, килеңнээнде, оларны буза шаап кааптар.

⁶Бурган черни туружундан чылдырып, ону тургускан адагаштарны сириледип турар.

⁷Ол дужаарга, хүн үнмес, сылдыстарны таңмалап каарга, чырывас.

⁸Ол дээрлерни чааскаан чада салып, далайның бедик чалгыгларын базып турар.

⁹Ол Чеди-Хаан, Үш-Мыйгак, Үгер сылдыстарны, мурнуу чүктүң чырымалдарын чаяап каан.

¹⁰Ооң ажыл-херээ өндүр улуг, билип аары болдунмас, кайгамчык чүүлдери эмге-тикчок.

¹¹Ол мурнум-биле эртер болза, мен көрбес мен, чаным-биле эрте берзе, эскербес мен.

¹²Ол хунаап аарга, кым-даа эгидип шыдавас, кым-даа Аңаа: „Бо канчап бардың?!“ — дивес.

¹³Бурган Бодунуң килеңин соксатпас — Рахавтың [14] бараан болукчулары безин Ооң мурнунга кээп дүшкен!

¹⁴Мен канчап Аңаа харыылаар мен? Ооң-биле маргыжар сөстерни кайыын тывар мен?

¹⁵Актыг-даа болзумза, харыы тудуп шыдавас мен, Шииткекчимден өршээл дилеп, чанныр ужурлуг мен.

¹⁶Ол мээң кыйгымга харыылаар-даа болза, мени Ол дыңнаар деп бүзүревес мен.

¹⁷Ол менче казыргы дег хөме таварып келгеш, хей черге балыгларымны көвүдедир-дир;

¹⁸тыныш алыр арга бербес-тир, муңгагдал-биле мени долдурар-дыр.

¹⁹Хамык ужур күште болза, Ол — күчү-күштүг-дүр, а шынныг шииткелде болза, ону канчап чедип аар мен?

²⁰Актыг-даа болзумза, аксы-дылым бодумну буруудадыр, буруу чок-даа болзумза, Ол мени буруулуг деп көөр.

²¹Мээң буруум чок! Меңээ ам дөмей-ле, чуртталгамны херекке албас апардым, ол мээң хөңнүмге дээпти.

²²Бүгү чүве бир дөмей! Ынчангаш чугаалап тур мен: Бурган буруу чок-даа кижини, бузуттуг-даа кижини чок кылып турар.

²³Хенертен тавараан айыылга өлүртүп турар буруу чоктарның муңгагдалын Ол кыжырып каттырар.

²⁴Чер бузуттугларның эргезинге хүлээттинген, шииткекчилерниң караан Ол дуглап турар — а Ол эвес болза, өске кым деп?

²⁵Мээң хүннерим шапкынчыдан-даа дүрген маңнаар — эки чүүл көрбейн дезип чоруп турлар;

²⁶дүрген хемелер ышкаш, олчазынче шүүргедеп баткан эзир ышкаш, караш кыннырлар.

²⁷„Хомудалым уттуптайн, хөлүгүр хевирим өскертип, хүлүмзүрүүйн“ — дизимзе-даа,

²⁸чаа хилинчектен коргар-дыр мен. Мени агартпазыңны билир мен,

²⁹буруудап артар мен, ындыг болганда, хей черге күженген херээм чүл?

³⁰Хар суу-биле чунуп-даа алзымза, саваң-биле холум арыглап-даа алзымза,

³¹дөмей-ле Сен мени хир-бокче суптар сен — хевим безин менден ческинер.

³²Бурган дээрге кижи эвес-тир, канчап Ооң-биле маргыжар мен, канчап Ооң-биле кады шииткел черинче баар мен.

³³Бистиң аравыста эптештирикчи чок, холун ийилдиривисче салыптар кижи чок;

³⁴Бурган мени девидетпезин дээш, Ооң мергезин менден чайладыптар кижи чок.

³⁵Чүгле ынчан коргуп-сүртевейн чугаалап шыдаар ийик мен; бодум буруулуг эвес мен дээрзин чугаалаар ийик мен [15]».