Read Ыдыктыг Библия, 2011 Псалтирь 101 Bible Online

Псалтирь 101 - Ыдыктыг Библия, 2011 bible

Псалтирь 101

¹Харыксырай бергеш, Дээрги-Чаяакчының мурнунга бодунуң хомудалын чугаалап турар түрегдээн кижиниң мөргүлү. [1]

²Дээрги-Чаяакчы, мөргүлүмнү дыңна, дуза дилээн кыйгым Сеңээ четсин.

³Айыыл-халап хүнүнде менден хая көрүнме, кулааңны менче ээктир, кыйгырган хүнүмде дүрген харыыла.

⁴Амыдыралым ыш дег эстип читти, сөөктерим одагда оттуг кезек дег өрттенип калды.

⁵Чүрээм оът-сиген дег саза бастырып, кадып калды, аъш-чем чиир безин хөңнүм чок апарды.

⁶Човууртап тур мен, сөөктерим эът-кежимге чыпшына берди.

⁷Ээн куруг черлерде куш-биле дөмей апардым, бузундуларда чурттаан үгү дег болу бердим.

⁸Уйгум келбестеп, сери кырында чааскаанзыргай бора-хөкпеш дег орар-дыр мен.

⁹Дайзыннарым хүннү бадыр мени бак сөглээр-дир, мени кочулаан улус мээң адым-биле карганыр-дыр.

¹⁰Хүлдү аъш-чем кылдыр чип, суксунумга карак чажын холуп келдим.

¹¹Сээң килеңнеп хорадааныңдан ынчалдыр болганы ол — Сен мени өрү көдүргеш, дүжүр октаптың.

¹²Назыным хөлеге дег чидип бар чыдыр, оът-сиген ышкаш када бердим.

¹³А Сен, Дээрги-Чаяакчы, дүжүлгеңге кезээ мөңгеде саадаар сен, улус Сени салгалдан салгал дамчып сактып чоруур.

¹⁴Сен туруп келгеш, Сионга ээ-хайыралың көргүзер сен — ону өршээр үе келген-дир, ындыг үе-шаг ол-дур.

¹⁵Сээң чалчаларыңга Сионнуң даштары эргим болгай, ооң довураа дээш безин хараадап турарлар болгай.

¹⁶Ол үеде бүгү чоннар Дээрги-Чаяакчының адын, чер-делегейниң шупту хааннары алдарлыг Сени аажок хүндүлээр-дир.

¹⁷Дээрги-Чаяакчы Сионну катап тургузар, Ооң өндүр чырыы чайынналып көстүп кээр.

¹⁸Чаржынчыг түреңги улустуң мөргүлүн Ол хүлээп аар, оларның чалынганын тоовайн барбас.

¹⁹Ол бүгүнүң дугайында улус келир салгалга бижип, арттырып каар, ынчан Дээрги-Чаяакчының чаяап каар чону Ону алгап-мактаар.

²⁰Чүге дээрге Дээрги-Чаяакчы Бодунуң ыдыктыг кудайындан черже көрген, дээрлерден черже хайгаарап көрген.

²¹Ол хоругдаткан кижиниң човуурун дыңнап каарын, өлүр четкен улусту хостаарын күзээн.

²²[22-23] Ынчан чоннар биле күрүнелер Дээрги-Чаяакчыга бараан болур дээш шупту чыглып кээп, Сионга Дээрги-Чаяакчының адын алгаар, Иерусалимге Ону мактаар.

²⁴Ол мээң күжүмнү орук ара төндүрдү, назынымны кыскалатты.

²⁵Мен ынчан: «Бурганым, назыным орту чедип чорда, мени алгаш барба» — дидим. А Сен мөңге чурттаар сен.

²⁶Үе-дүпте чер-делегейни үндезилеп тургустуң, дээрлер база Сээң холуңнуң чаяалгазы.

²⁷Чер биле дээр чиде-даа бээрге, Сен артып каар сен, олар шупту хеп ышкаш элеп каар; оларны Сен тон ышкаш солуп кааптарыңга, солуттунуп, чиде бээрлер.

²⁸А Сен биеэги хевээр сен, Сээң назының төнчү чок.

²⁹Сээң чалчаларыңның ажы-төлү бо черге амыдырап артар, оларның үре-салгалы Сээң хайгааралың адаанга бут кырынга быжыг турар.