Read Ыдыктыг Библия, 2011 Псалтирь 104 Bible Online

Псалтирь 104 - Ыдыктыг Библия, 2011 bible

Псалтирь 104

¹Дээрги-Чаяакчыга өөрүп четтириңер, Ооң адын адап, мактаңар, өске чоннарга Ооң ажыл-херектерин медээлеңер;

²Ону алгап ырлаңар, Аңаа ырлап бериңер; Ооң кылган бүгү кайгамчык чүүлдерин чугаалап бериңер.

³Ооң ыдыктыг ады дээш чоргаараңар; Дээрги-Чаяакчыже чүткүп чоруур улустуң сеткил-сагыжы өөрүп-хөглезин.

⁴Күчүлүг Дээрги-Чаяакчыны эдериңер, Ооң-биле үргүлчү кады турар дээш чүткүңер.

⁵[5-6] Дээрги-Чаяакчының чалчазы Авраамның үре-салгалы, Иаковтуң салгалы, Бурганның шилип алган улузу! Ооң кылган кайгамчык чүүлдерин, Ооң көскү демдектерин, Ооң аксындан үнген шын шииткелдерин сактып чоруңар.

⁶

⁷Ол дээрге бистиң Бурганывыс, Дээрги-Чаяакчы-дыр: бүгү чер-делегейде Ооң шын шииткелдери бар.

⁸Ол Бодунуң берген чагыг-керээзин — чоннуң муңгу салгалынга чедир чагаан сөзүн кезээ мөңгеде утпас.

⁹Ол ону Авраам-биле чаргаш, Исаакка Бодунуң даңгыраан берген.

¹⁰Ол ону Иаковка дүрүм-хоойлу кылдыр доктааткаш, Израильге мөңге чагыг-керээ кылдыр быжыглаан:

¹¹«Сеңээ өнчү кылдыр ханаан черни бээр мен».

¹²Өгбелеривис аажок эвээш санныг, көңгүс хөй эвес турда, олар Ханаанга өскээртен келген улус турда,

¹³олар бир чондан өске чонче, бир күрүнеден өске аймактың күрүнезинче көжүп чоруп турда,

¹⁴Бурган оларны дарлаар арганы кымга-даа бербейн, хааннарны олар дээш чемелеп:

¹⁵«Мээң шилип алган улузумга дегбеңер, Мээң медээчилеримге багай чүве кылбаңар!» — деп турган.

¹⁶Дээрги-Чаяакчы чер кырынче ашты бадырып, тараалыг бүгү үнүштү узуткап каан.

¹⁷Ол Египетче бир кижини өгбелеривисти мурнай чорудупкан: Иосифти кул кылдыр саттырыпкан.

¹⁸Иосифтиң буттарын кинчилер бектеп, демир дөңгү ооң мойнун боой кызып алган —

¹⁹Иосифтиң баш удур чугаалаан сөзү боттанмааже, ындыг турган. Дээрги-Чаяакчының сөзү Иосифти ынчалдыр шенээн.

²⁰Фараон Иосифти эккелдирип алган, чоннарның чагырыкчызы ооң кинчи-бегин адыртып, хостааш,

²¹бодунуң ордузунуң дээргизи кылдыр база бодунуң эдилээн бүгү байлаан аайлап-башкарар кижи кылдыр томуйлап каан.

²²Иосиф ынчан хаанның дүжүметтерин бодунуң туралааны-биле башкарып [88], баштыңнарны мерген угаанга өөредип турган.

²³Израиль ынчан Египетке чедип келген, Иаков Хаамның черинге [89] көжүп келген турган.

²⁴Бурган Бодунуң чонун эңдере өстүрүп-көвүдеткеш, ооң дайзыннарындан артык күштүг кылып каан.

²⁵Бурган ол дайзыннарның чүректерин Ооң чонун көөр хөңнү чок кылып каарга, олар Ооң чалчаларынга удур кара сагышты бодаар апарган.

²⁶Дээрги-Чаяакчы Бодунуң чалчазы Моисей биле шилип алган кижизи Ааронну айбылап чорудупкан.

²⁷Олар Хаамның{*} чериниң чурттакчыларының аразынга Ооң сөстерин ёзугаар көскү демдектер болгаш кайгамчык чүүлдерни көргүскен.

²⁸Ол дүмбей караңгыны чорудуп, чер кырын караңгыладыпкан, Ооң сөзүнге кым-даа удурланып шыдаваан.

²⁹Дээрги-Чаяакчы дайзыннарның суун ханче хуулдуруп, оларның балык-байлаңын кырып каапкан.

³⁰Оларның черинге, хааннарның ордузунга безин бөзүр-пагалар имиңейни берген.

³¹Ооң чугаалаан сөзү-биле оларның черин бир кылдыр ызырар сээктер, хүлчүктер үглей ужуп келген.

³²Дээрги-Чаяакчы чаъс орнунга долуну чагдырып, оларның чуртунче кызаңнааштарын дүжүрген;

³³оларның виноградын, фига чимистерин дүжүр шаап, ээлээн девискээринде ыяштарның шуптузун сыйып каапкан.

³⁴Дээрги-Чаяакчының чугаалаан сөзү-биле сан-түң чок мөөң шартылаа болгаш шерги үглей ужуп келгеш,

³⁵оларның черинде бүгү оът-сигенни, шөлдеринде үнген дүжүттү сыырыпкан.

³⁶Дээрги-Чаяакчы оларның черинде дун төл бүрүзүн — оларның эң үнелиг эртине-байлаан — узуткап каан.

³⁷Бурган израильчилерни ук черден алдын-мөңгүннүг үндүре берген, оларның аймактарының аразында арай деп калгып чоруур кижи чок болган.

³⁸Египет чон израильчилерден коргуп-сүртээн болгаш, оларның чоруй барганы дээш өөрээн.

³⁹Дээрги-Чаяакчы оларга шывыг кылдыр булутту чада салып берген; оруун дүне от-биле чырыдып берип чораан.

⁴⁰Оларның дилээ-биле Ол матпадактар чорудуп берип, дээрден баткан тараа-биле оларны тоттуруп турган.

⁴¹Хаяны хаптарга, суг аттыгып үнүп, ээн кургаг ховуга хем агып бадып эгелээн.

⁴²Бурган Бодунуң чалчазы Авраамга берген ыдыктыг аазаашкынын утпайн чораан болгай.

⁴³Ол Бодунуң чонун, шилип алган улузун Египеттен үндүрүп эккээрге, олар өөрүп-хөглеп турган.

⁴⁴Оларга өске чоннарның чурттаан черлерин берген, олар өске аймактарның өнчүзүн салгап алган.

⁴⁵Ынчангаш Дээрги-Чаяакчының чону Ооң айтыышкыннарын сагызын, Ооң дүрүм-хоойлузун кадагалап арттырзын. Аллилуйя!