Read Ыдыктыг Библия, 2011 Псалтирь 105 Bible Online

Псалтирь 105 - Ыдыктыг Библия, 2011 bible

Псалтирь 105

¹Аллилуйя! Дээрги-Чаяакчыга өөрүп четтириңер; Ол ачылыг-дыр, Ооң энерели кезээ шагда үстүп төнмес-тир.

²Дээрги-Чаяакчының күчү-күжүн чугаалап шыдаар, Ооң макталга төлептиг шупту ажыл-херээн медээлеп шыдаар кижи бар бе?

³Чөптүг чорукту сагып чоруур, үргүлчү шын чүве кылып чоруур улус амыр-чыргалдыг.

⁴Дээрги-Чаяакчы, Бодуңнуң чонуңче ээ көрнүп тура, мени бодап кел: Бодуңнуң камгалалыңдан меңээ хайырла —

⁵Сээң шилип алган улузуңнуң аас-кежиин көрүп алыйн, Сээң чонуңнуң өөрүшкүзү-биле өөрүп-хөглээйн, Сээң өнчүң болур чон-биле кады чоргаарланып көрейн.

⁶Ада-өгбевис-даа, бис-даа бачытты үүлгеткен-дир бис, кем-бурууну, бузутту кылган-дыр бис.

⁷Ада-өгбевис Египетке Сээң кайгамчык чүүлдериңни угаап билбээн, Сээң өндүр улуг энерелиңни уттупкан, Кызыл далай чанынга Сеңээ удурланган.

⁸Ынчалза-даа Бурган Бодунуң ат-алдарын бодааш, Бодунуң күчү-күжүн көргүзер дээш оларны камгалап каан.

⁹Дээрги-Чаяакчы Кызыл далайга дужаарга, далай кургап калган; Ол ада-өгбевисти терең ээремнер таварты, кургаг черлеп дег, эрттире берген;

¹⁰оларны көөр хөңнү чок улустуң холундан камгалап, дайзынның холундан адырып каан.

¹¹Оларның дайзыннарын суг хөме аптарга, чаңгызы-даа амылыг артпаан.

¹²Израильчилер Ооң сөстеринге бүзүреп, Ону мактап ырлажы бергеннер.

¹³Олар үр болбайн, Ооң ажыл-херектерин уттуп, чагыгларын манап албайн барганнар;

¹⁴ээн кургаг ховуга аажок чем чиксей бергеннер, Бурганны аңаа шенеп турганнар.

¹⁵Ол ынчан оларның дилээн күүсеткен, ындыг-даа болза, оларже арып-дорар аарыг ыдыпкан.

¹⁶Олар турлаанга Моисейге база Дээрги-Чаяакчының ыдыктап кааны Ааронга адааргай бергеннер.

¹⁷Чер ойлуп кире бергеш, Дафанны ажырыпкан, Авиронну бүгү талалакчылары-биле кады хөөп алган.

¹⁸Оларның бөлүүнче от өөскүп кыпкаш, буруулуг улусту чалбыыш өрттендир чипкен.

¹⁹Израильчилер Хорив дагның чанынга бугажык дүрзүзү шуткуп кылып алгаш, аңаа мөгейип,

²⁰боттарының алдарлыг Бурганын оът-сиген чиир мал дүрзүзүнге орнапканнар.

²¹Египетке өндүр улуг үүле-херек кылып турган Бурганны — боттарының Камгалакчызын уттупканнар.

²²Олар Хаамның черинге [90] — кайгамчык чүүлдер, Кызыл далай чанынга — коргунчуг чүүлдер кылып турган Бурганны уттупканнар.

²³Дээрги-Чаяакчы израильчилерни узуткаар деп барган, ынчалза-даа Ооң шилип алганы Моисей чонга болчуп, оларны узуткавас кылдыр, Дээрги-Чаяакчының килеңин чайладыпкан.

²⁴Оон израильчилер Ооң сөзүнге бүзүревейн, күзенчиг черни тоовайн барганнар.

²⁵Олар боттарының чадырларынга Дээрги-Чаяакчының үнүн тооп дыңнавайн, хыйланып турганнар.

²⁶Ол ынчан даңгыраглап: «Оларны ээн кургаг ховуга чок кылып каар мен,

²⁷оларның үре-салгалын чоннар аразынга узуткап каар мен, өске чер-чурттарга тоо быдарадып каар мен» — деп турган.

²⁸Олар Фегор дагның бурганы Ваалга мөгейип, амы-тыны чок дүрзүлерге салган өргүл эъди чип,

²⁹ажыл-херектери-биле Дээрги-Чаяакчыны килеңнедип турганнар. Ынчан оларның аразынга айыыл-халап өөскүп үнген.

³⁰А Финеес киржи берип, шииткел үндүрерге, айыыл-халап соксай берген.

³¹Бурган ол дээш Финеести салгалдан салгал дамчып, кезээ мөңгеде чөптүг-шынныг кижи деп санаан.

³²Израильчилер Мериваның суунуң чанынга Бурганны хорададып алганнар, Моисей ынчан олар дээш айыылга таварышкан:

³³олар ооң сеткил-сагыжынга килеңни оттуруптарга, ол бодунуң аксы-сөзүн тудуп шыдавайн барган.

³⁴Олар Дээрги-Чаяакчының узутказын дээни чоннарны узуткавааннар,

³⁵харын өске чоннар улузу-биле холужуп, оларның ёзу-чаңчылдарынга өөренип,

³⁶оларның дүрзү-бурганнарынга мөгейгеш, дузакка туттурганнар.

³⁷Олар оолдар, кыстарын буктарга өргүл кылдыр салып турганнар.

³⁸Ханаанның дүрзү-бурганнарынга өргүл кылдыр салган оолдар, кыстарының кем чок ханын төп, ол черни бужартадып кааннар.

³⁹Кылган ажыл-херектери-биле боттарын бужартадып, үүлгеткен херектери-биле самыыралга алзып турганнар.

⁴⁰Дээрги-Чаяакчының килеңи Бодунуң чонунче кыптыгып, Бодунуң өнчүзү болур улустан хөңнү калып,

⁴¹израильчилерни өске чоннар улузунуң холунга хүлээдип берген, а демгилери оларны эдилеп эгелээн.

⁴²Дайзыннары дарлап-бастырга, израильчилер оларның кадыг холунга кыстыртып алганнар.

⁴³Дээрги-Чаяакчы оларны хөй катап камгалаан, а олар аңаа удур үймээн үндүрер чөрүү сагыштыг турганнар, Ол ынчан оларны бузуттары дээш берге байдалга киирип каан.

⁴⁴Ынчалза-даа Дээрги-Чаяакчы израильчилерниң кыйгызын дыңнап, оларның кызагдадып алганын көрүп турган.

⁴⁵Олар-биле чарган чагыг-керээзин бодап, Бодунуң өндүр улуг энерелинден оларны кээргеп,

⁴⁶израильчилерни тудуп алгаш барган бүгү чоннарның оларга ээ-хайыралыг болур сагыжын оттурупкан.

⁴⁷Дээрги-Чаяакчы, Бурганывыс, бисти камгалап көр; Сээң ыдыктыг адыңны мактаар кылдыр, Сээң мактал-хүндүң-биле чоргаарланыр кылдыр, өске чоннар аразындан бисти бөлүп чыып көр.

⁴⁸Израильдиң Бурганынга — Дээрги-Чаяакчыга кажан-даа, кезээ мөңгеде алдар! Бүгү чон: «Ындыг-ла болзунам!» деп чугаалазын. Аллилуйя!