Read Ыдыктыг Библия, 2011 Псалтирь 106 Bible Online

Псалтирь 106 - Ыдыктыг Библия, 2011 bible

Псалтирь 106

¹Дээрги-Чаяакчыга өөрүп четтириңер; Ол ачылыг-дыр, Ооң энерели кезээ шагда үстүп төнмес-тир.

²[2-3] Дээрги-Чаяакчының камгалап кааны, дайзынның холундан адырып кааны, өске чурттардан — чөөн болгаш барыын чүктерден, соңгу чүктен болгаш далайдан бээр — чыып эккелгени бүгү улус ынча деп чугаалазын.

⁴Израильчилер ээн кургаг ховуга улчуп-тояап, чурттакчылыг хоорайга таварышпайн чораан.

⁵Аштап-суксап, амы-тыны хылдың кырында чораан.

⁶Ынчан олар кызагдаткаш, Дээрги-Чаяакчыдан дуза дилеп кыйгырган — а Ол түрегделден оларны камгалап,

⁷чурттакчылыг хоорайга чеде берзиннер дээш, дорт орук-биле эдертип чорупкан.

⁸Олар Дээрги-Чаяакчыга Ооң энерелдии дээш, кижи төрелгетенге кылган кайгамчык чүүлдери дээш өөрүп четтирзин!

⁹Ол суксаан кижини хандырган, аштаан кижини буян-биле тоттурган болгай.

¹⁰Израильчилер демирге бектедип алгаш, дүмбей караңгыга качыгдап олурганнар.

¹¹Олар Бурганның сөстерин тооп дыңнавайн барган, Дээди Өрүкүнүң күзел-соруун хүлээп көрбээн.

¹²Дээрги-Чаяакчы оларның тура-хөөнүн албадалдыг ажыл-биле чаажыктырарга, могап турупканнар, а оларга дузалажыр кижи тывылбаан.

¹³Олар кызагдаткаш, Дээрги-Чаяакчыдан дуза дилеп алгырган, Ол ынчан оларны түрегделден адырып каан;

¹⁴оларны дүмбей караңгыдан үндүре бергеш, кинчи-бегин үзе шаап каапкан.

¹⁵Олар Дээрги-Чаяакчыга Ооң энерелдии дээш, кижи төрелгетенге кылган кайгамчык чүүлдери дээш өөрүп четтирзин!

¹⁶Ол хүлер хаалгаларны буза шапкаш, демир дээктерни үреп каапкан болгай.

¹⁷Мелегей улус бачыттыг оруктары болгаш бузуттары дээш качыгдап турган.

¹⁸Олар кандыг-даа аъш-чемни чип албастап, өлүмнүң эжиин ажыдып киреринге чоокшулап келген.

¹⁹Олар кызагдаткаш, Дээрги-Чаяакчыдан дуза дилеп алгырган, Ол ынчан оларны түрегделден адырып каан.

²⁰Ол Бодунуң айтыышкыны-биле оларны экиртип каан, чевегге чыдарындан камгалап каан.

²¹Олар Дээрги-Чаяакчыга Ооң энерелдии дээш, кижи төрелгетенге кылган кайгамчык чүүлдери дээш өөрүп четтирзин!

²²Олар өөрүп четтириишкин өргүлүн Аңаа эккеп салзын, Ооң ажыл-херектериниң дугайында ырлашпышаан медээлезин.

²³Корабльдарга далайже эжиндирип үнген, сугларның делгемнеринге ажыл-үүлезин кылып чоруткан далайжылар

²⁴Дээрги-Чаяакчының ажыл-херектерин, кайгамчык чүүлдерин далайга чорааш, көрүп турган.

²⁵Ол дужаарга, күштүг шуурган хадып, далайның чалгыгларын бедидир диргелдирип турган.

²⁶Далайжылар дээрже өрү үнүп, далайның дүвүнче куду бадып турган, оларның тура-соруу айыыл-халаптардан эстип-хайлып калган;

²⁷эзирик улус ышкаш, ол-бо долганып, тендирээннер, оларның арга-мергежили херекчок чүве апарган.

²⁸Олар кызагдаткаш, Дээрги-Чаяакчыдан дуза дилеп кыйгырган, Ол ынчан оларны түрегделден адырып каан.

²⁹Ол дужаарга, шуурган шуут ыржымналдыр оожургап, чалгыглар ыыт-шимээн чок барган.

³⁰Чалгыглар дагжаваска, далайжылар өөрүп-хөглей берген, Дээрги-Чаяакчы оларны күзеп-чүткээн өртээлинге эккелген.

³¹Олар Дээрги-Чаяакчыга Ооң энерелдии дээш, кижи төрелгетенге кылган кайгамчык чүүлдери дээш өөрүп четтирзин!

³²Олар Ону чоннуң чыыжынга кымдан арттыр мактазын, баштыңнарның чөвүлелинге алдаржытсын!

³³Дээрги-Чаяакчы хемнерни ээн кургаг хову кылдыр, суг баштарын — кургаг чер кылдыр хуулдуруп турар;

³⁴үнүш-дүжүткүр черни, ында чурттаан улустуң бачыды дээш, кужурлуг чер кылдыр хуулдуруп турар.

³⁵Ол ээн кургаг ховуну хөлче, кадып кургаан черни — суг бажынче хуулдуруп,

³⁶аштаан улусту аңаа чурттадып каар. Олар боттарының чурттаар хоорайын тудуп алгаш,

³⁷шөлдерге тараазын тарып, виноград сыптарын олуртуп, элбек дүжүттү, чимистерни ажаап, чыып алыр.

³⁸Дээрги-Чаяакчы улуска ачы-буянын хайырлап турар, олар аажок өзүп-көвүдээр, оларның мал-маганын Ол немеп бээр.

³⁹А олар дарлалга, айыыл-халапка, качыгдалга бастырткаш, эвээжей бээрге,

⁴⁰Дээрги-Чаяакчы ызыгууртаннарны бак ат-биле бүргээш, орук-чирик чок ээн черге азып-тояарынче албадаптар.

⁴¹А ядыы кижини түрегделден ушта тыртып, ооң өг-бүлезин, кодан хойну дег, өстүрүп-көвүдедип турар.

⁴²Ак сагыштыг улус ону көргеш, өөрүп турар, а бузуттуглар шупту аксын хаап алыр.

⁴³Мерген угаанныг кижи бо чүүлдү чүрээнге кадагалап алзын, Дээрги-Чаяакчының энерелин бодап чорзун.