Read Ыдыктыг Библия, 2011 Псалтирь 113 Bible Online

Псалтирь 113 - Ыдыктыг Библия, 2011 bible

Псалтирь 113

¹Израильчилер Египеттен үне бээрге, Иаковтуң салгалы хары чондан чоруй баарга,

²Иудея — Бурганның ыдыктыг чери, Израиль — Бурганның ээлээн чери болу берген.

³Далай Ону көрүп кааш, Оон дезип маңнап турган, Иордан хем дедир ага берген;

⁴даглар ынчан кошкарлар дег халып, тейлер хураганнар дег шурап турган.

⁵Далай, сен канчап бардың, чүге дезип маңнаарың ол? Иордан, чүге дедир агарың ол?

⁶Даглар, силер чүге кошкарлар дег халыдыңар, тейлер, силер чүге хураганнар дег шурадыңар?

⁷Дээргиниң мурнунга коргуп сириле, чер-делегей, Израильдиң Бурганының мурнунга коргуп сириле.

⁸Дээрги хаяны — терең хөл кылдыр, дашты — суг бажы кылдыр хуулдурган [94].

⁹Бисти эвес, Дээрги-Чаяакчы, бисти эвес, а Бодуңнуң адыңны алдаржыт; энерелдииң-биле, шынчы чорууң-биле Бодуңну алдаржыт.

¹⁰Өске чоннар улузу: «Оларның Бурганы кайдал?» — деп айтырар чүзүл?

¹¹Бистиң Бурганывыс — дээрлерде; Ол күзээн-не чүүлүн боттандырып турар.

¹²А ол чоннарның дүрзү-бурганнары — алдын болгаш мөңгүнден бүткен, кижи холу шуткаан чүүлдер-дир.

¹³Ол чүүлдер аастарлыг-даа болза, чугаалавас; карактарлыг-даа болза, көрбес;

¹⁴олар кулактарлыг-даа болза, дыңнавас; думчуктарлыг-даа болза, чыт тыртпас;

¹⁵олар холдарлыг-даа болза, суйбап билип албас; буттарлыг-даа болза, кылаштавас; оларның өктери үн үндүрбес.

¹⁶Ындыг дүрзү-бурганнарны кылып турар, оларга идегээр бүгү улус шак ол дүрзүлеринге дөмейлежи берзин.

¹⁷А израильчилер Дээрги-Чаяакчыга идегээр: Ол — оларга дузалап чоруур дозуг-камгалал.

¹⁸Аароннуң салгалы Дээрги-Чаяакчыга идегээр: Ол — оларга дузалап чоруур дозуг-камгалал.

¹⁹Дээрги-Чаяакчыдан коргуп чоруурлар Аңаа идегээр: Ол — оларга дузалап чоруур дозуг-камгалал.

²⁰Дээрги-Чаяакчы бисти бодап, ачы-буянын хайырлазын: израиль чонга ачы-буянын хайырлазын, Аароннуң салгалынга ачы-буянын хайырлазын,

²¹Оон коргуп чоруур улуска ачы-буянын хайырлазын — улуг-биче дивейн, ачы-буянын хайырлазын.

²²Дээрги-Чаяакчы ачы-буянын силерге-даа, ажы-төлүңерге-даа немей берзин.

²³Дээрги-Чаяакчы — дээр биле черниң Чаяакчызы силерни алгап-йөрээн-дир.

²⁴Дээр — Дээрги-Чаяакчыныы, а черни Ол кижи төрелгетенге хайырлаан.

²⁵Алдыы оранның шыпшыңынче бада берген өлүг улус Дээрги-Чаяакчыны алгап-мактаар эвес,

²⁶бис харын амдыгааштан эгелээш, кезээ мөңгеде Ону алгап-йөрээр бис. Аллилуйя!