Ыдыктыг Библия, 2011 bible online

Псалтирь 118

¹Бодунуң эртер оруктарынга кем-буруу үүлгетпес, Дээрги-Чаяакчының хоойлузун сагып чоруур улус амыр-чыргалдыг!

²Ооң доктаалдарын кадагалап, бүгү чүлдү-чүрээ-биле Олче чүткүп чоруур улус амыр-чыргалдыг!

³Ооң оруктары-биле чорааш, олар бузут үүлгетпес.

⁴Сээң чагыгларыңны быжыы-биле кадагалаарын дужааган сен.

⁵Мээң оруктарым Сээң дүрүмнериңни сагыырынче угланган болзун!

⁶Ынчан мен Сээң шупту айтыышкыннарыңче ылавылап көргеш, бак атка кирбес мен;

⁷Сээң чөптүг шиитпирлериңни шинчилеп, шынныг чүрээм-биле Сени мактаар мен;

⁸Сээң дүрүмнериңни кадагалаар мен — мени шуут кагбайн көр!

⁹Аныяк оол бодунуң оруун бачыттан канчап арыглап аарыл? Сээң сөзүңнү кадагалап чорааш!

¹⁰Бүгү чүлдү-чүрээм-биле Сенче чүткүп чор мен, Сээң айтыышкыннарыңны күүседиринден чайлаар арга меңээ бербе.

¹¹Сеңээ удур бачыт үүлгетпес дээш, Сээң сөзүңнү чүрээмде шыгжап чор мен.

¹²Дээрги-Чаяакчы, Сеңээ алдар! Бодуңнуң дүрүмнериңге мени өөредип каг,

¹³Сээң аксыңдан үнген шупту шиитпирлерни бодумнуң аксы-сөзүм-биле медээлээр мен.

¹⁴Сээң доктаалдарыңның айтып берген оруун эдерип, эртине-байлактың кандыызынга-даа дег, өөрүп чор мен.

¹⁵Сээң чагыгларың дугайында бодап, оруктарыңче топтап көөр-дүр мен.

¹⁶Сээң дүрүмнериң дээш өөрүп-хөглеп чор мен, сөзүңнү утпас мен!

¹⁷Бодуңнуң чалчаңга ачы-буяндан көргүс, ынчан дириг артып, сөзүңнү кадагалаар мен.

¹⁸Мээң карактарымны ажыдып бер — Сээң хоойлуңдан тыптыр кайгамчык чүүлдерни көрүп алыйн.

¹⁹Чер-делегейде түр када турумчуп алган кижи-дир мен, Бодуңнуң айтыышкыннарыңны менден чажырбайн көр.

²⁰Сеткил-сагыжым Сээң шиитпирлериңни үргүлчү күзеп, оларже доктаадыр аргажок чүткүп чоруур.

²¹Адыыргак улусту чемелээр сен, Сээң айтыышкыннарыңдан өскээр барган улус каргаттырар.

²²Дора көрүүшкүн биле бак атты менден ап каавыт — Сээң доктаалдарыңны кадагалап чоруур болгай мен.

²³Чагырыкчылар меңээ удур сүлчээ кылып тур, а Сээң чалчаң мен дүрүмнериңни хандыр бодап олур мен.

²⁴Сээң доктаалдарың — өөрүшкүм-дүр, дүрүмнериң — сүмелекчилерим-дир.

²⁵Довуракка хөмдүрүп каар деп бардым, Бодуңнуң сөзүң ёзугаар мени диргизип көр.

²⁶Мээң-биле чүү болганын Сеңээ чугааладым, а Сен меңээ харыыладың — ам меңээ дүрүмнериң өөредип каг.

²⁷Чагыгларың оруун угаап билип аар аргадан бер, ынчан Сээң кайгамчык чүүлдериң дугайында хандыр боданыр мен.

²⁸Сеткил-сагыжым ундаралдан эстип чидер деп тур, Бодуңнуң сөзүң ёзугаар мени быжыктыр.

²⁹Мегениң оруундан мени чайлат, хоойлуң-биле менче ээ көрүн.

³⁰Шынның оруун шилип алган мен, Сээң шиитпирлериң-биле чөпшээрежип чоруур мен.

³¹Дээрги-Чаяакчы, Сээң доктаалдарыңдан салдынмайн халбактаныр мен — адымны баксыратпайн көр!

³²Сен мээң чүрээмге делгемнерни ажыдып бээриңге, айтыышкыннарың оруу-биле дүрген маңнаптар мен.

³³Дээрги-Чаяакчы, дүрүмнериң оруун меңээ айтып бер, төнчүзүнге чедир оон өскээр барбас мен.

³⁴Мени угаан киир сурга, ынчан Сээң дүрүм-хоойлуңну сагып, ону бүгү чүлдү-чүрээм-биле кадагалаар мен.

³⁵Айтыышкыннарың оруу-биле мени эдерт — күзээн чүвем ол-дур.

³⁶Мээң чүрээмни ажык-кончааже эвес, а Сээң доктаалдарыңче ээлдирип көр.

³⁷Хоозун чүүлдер көрбес кылдыр, карактарымны өскээр көрүндүрүп көр, Бодуңнуң орууңга мени амы-тынныг арттырып көр.

³⁸Чалчаң Сенден коргуп чорзун дээш, Бодуңнуң сөзүңнүң шынныын аңаа көргүс.

³⁹Сээң шиитпирлериң ачылыг болгай, ынчангаш бак атка киреринден мени чайлат — коргар чүвем ол-дур.

⁴⁰Сээң чагыгларыңны күүседирин күзеп тур мен, Бодуңнуң чөптүүң-биле мени тынгарып көр.

⁴¹Сээң энерелиң мээң-биле кады болзун, Дээрги-Чаяакчы, Сээң сөзүң ёзугаар камгалалың меңээ келзин.

⁴²Ынчан мени дора көрген кижиге харыылаар аргалыг болур мен — чүге дээрге идегелим Сээң сөзүңде болгай.

⁴³Аксы-дылымдан чүгле шынныг сөстер үнер кылдыр кылып каг — Сээң шиитпирлериңге идегеп турар болгай мен.

⁴⁴Сээң хоойлуңну кезээ шагда, кезээ мөңгеде кадагалаар мен;

⁴⁵Сээң чагыгларыңче чүткүп чораан болгаш, хостуг-шөлээн чоруур мен;

⁴⁶Сээң доктаалдарың дугайында хааннар мурнунга ыятпайн чугаалаар мен;

⁴⁷ынакшааным айтыышкыннарың өөрүшкүнү хайырлаар;

⁴⁸ынакшааным айтыышкыннарыңче холдарым сунар мен, дүрүмнериң дугайында хандыр боданыр мен.

⁴⁹Бодуңнуң чалчаңга чугаалааның, идегелди меңээ берип келген сөзүңнү бодап келем —

⁵⁰Сээң сөзүң мени тынгарар болду — түрегдээн үемде аргалалды ынчангаш ап турдум.

⁵¹Адыыргак улус мени аажок кочулап турган-даа болза, Сээң хоойлуңдан өскээр барбаан мен.

⁵²Шаг шаанда берген шиитпирлериңни бодап келгеш, аргалалды ап турдум, Дээрги-Чаяакчы.

⁵³Сээң хоойлуңга чагыртпайн турар бузуттуг улус көргеш, хөлзеп хорадаар-дыр мен.

⁵⁴Түр када турумчуп алганым чер-делегейге Сээң дүрүмнериң дугайында ырлап чордум.

⁵⁵Дээрги-Чаяакчы, дүне када Сээң адыңны бодап, хоойлуңну кадагалап келдим.

⁵⁶Сээң чагыгларыңны кадагалап чоруур боорумга, мээң салым-чолум ындыг болуп турар.

⁵⁷«Дээрги-Чаяакчы, мээң хуу-салымым Сээң сөстериңни сагыырында» — деп чугаалаан мен.

⁵⁸Бүгү чүлдү-чүрээм-биле Сенден ээрежип дилеп тур мен: Бодуңнуң сөзүң ёзугаар менче ээ көрнүп көр.

⁵⁹Бодумнуң оруктарым дугайында бодангаш, буттарымны Сээң доктаалдарыңче углап келдим.

⁶⁰Сээң айтыышкыннарыңны сагыыр дээш далажып, бичии-даа саадавадым.

⁶¹Бузуттуг улустуң четки-дузаа мени ораап-баглап алза-даа, Сээң хоойлуңну утпаан мен.

⁶²Чөптүг шиитпирлериң дээш, дүн ортузунда Сеңээ өөрүп четтирип туруп кээр-дир мен.

⁶³Сенден коргуп, чагыгларыңны кадагалап чоруур кандыг-даа кижиге эш боор мен.

⁶⁴Сээң энерелиң чер-делегейни бүргей алган, мени дүрүмнериңге өөредип каап көр, Дээрги-Чаяакчы.

⁶⁵Бодуңнуң сөзүң ёзугаар чалчаңга ачы-буянны көргүскен сен, Дээрги-Чаяакчы.

⁶⁶Сээң айтыышкыннарыңга бүзүрээр болгай мен — шын билип алыышкынга база билигге мени өөредип каг.

⁶⁷Базындырып аарым бетинде будалып чораан мен, а ам Сээң сөзүңнү кадагалап чор мен.

⁶⁸Буянныг-дыр сен, ажыл-херектериң-даа буянныг-дыр, Бодуңнуң дүрүмнериңге мени өөредип каг.

⁶⁹Адыыргак улус мени нүгүлдеп турар-даа болза, бүгү чүлдү-чүрээм-биле Сээң чагыгларыңны кадагалаар мен.

⁷⁰Ол улустуң чүректери чагланып, дөгейлени берген, а мен Сээң хоойлуң дээш өөрүп чор мен.

⁷¹Базындырганым меңээ буян болду, ооң ачызында Сээң дүрүмнериңни өөренип аар мен.

⁷²Сээң аксыңдан дыңнааным хоойлу меңээ муң-муң алдын, мөңгүн чоостардан дээре.

⁷³Сээң холдарың мени чаяап, боттандырып каан; ам мени угаан киирип каг — айтыышкыннарыңга өөренип аайн.

⁷⁴Сенден коргар улус мени көрүп кааш, Сээң сөзүңге идегелим дээш өөрүп-байырлаар.

⁷⁵Дээрги-Чаяакчы, сээң шиитпирлериңниң чөптүүн, мени базынганыңның шынныын билир мен.

⁷⁶Сээң энерелиң Бодуңнуң сөзүң ёзугаар чалчаң меңээ аргалал болзун.

⁷⁷Мени тынгарып, өршээлиң меңээ чедип келзин, Сээң хоойлуң мени өөртүп чоруур болгай.

⁷⁸Адыыргак улустуң ады баксыразын — оларның мени дарлап турары чөптүг эвес-тир, а мен Сээң чагыгларың дугайында хандыр бодап чор мен.

⁷⁹Сенден коргар, Сээң доктаалдарыңны хүлээп көөр улус менче ээп келзин.

⁸⁰Сээң дүрүмнериңге хамаарыштыр чүрээм буруу чок болзун, ынчан мээң адым баксыравас.

⁸¹Сээң хайырлаарың камгалалды манааш, сеткил-сагыжым ийлеп, Сээң сөзүңге идегеп чор мен.

⁸²Сээң сөзүңнүң боттанырын манааш, карактарым имистелип өштү, кажан мени аргалап кээр сен?

⁸³Отка дырыштыр каткан көгээржик дег апардым, ынчалзажок дүрүмнериң утпадым.

⁸⁴Чалчаң мээң манаар үем ам кайы хире артканыл? Мени истеп-сүрген улусту шиидер үең кажан кээрил?

⁸⁵Адыыргак улус Сээң хоойлуңга чөрүштүр меңээ оңгарлар казып кагды.

⁸⁶Сээң шупту айтыышкыннарың шынныг, а демги улустуң мени истеп-сүрүп турары чөптүг эвес-тир — меңээ дузала!

⁸⁷Мени чер кырынга узуткап каар частылар, ынчалзажок Сээң чагыгларыңны тоовайн барбаан мен.

⁸⁸Бодуңнуң энерелиң ёзугаар мени амы-тынныг арттырып көр, ынчан Сээң аксыңдан үнген доктаалдарны кадагалаар мен.

⁸⁹Дээрги-Чаяакчы, Сээң сөзүң дээрлерде кезээ мөңгеде тургустунган.

⁹⁰Сээң шынчы чорууң салгалдан салгал дамчып артып каар. Сен чер-делегейниң үндезинин салып каарыңга, ол турбушаан хевээр-дир.

⁹¹Дээр биле чер Сээң шиитпириң ёзугаар амга чедир туруп турар, бүгү чүве Сеңээ бараан бооп турар болгай.

⁹²Сээң хоойлуң мени өөртүп чорбаан болза, базындырыышкындан өлүп каар турган мен.

⁹³Чагыгларыңны кажан-даа утпас мен — олар-биле мени тынгарып турар сен.

⁹⁴Сээңии мен, камгалап көр — Сээң чагыгларыңче чүткүп чоруур болгай мен.

⁹⁵Бузуттуг улус мени узуткаар дээш кедеп турду, а мен Сээң доктаалдарыңны топтап көрүп турдум.

⁹⁶Кандыг-даа болбаазыраңгай чүүл кызыгаарлыг дээрзин көрүп турдум, а Сээң айтыышкының хемчээл билбес делгем-дир.

⁹⁷Сээң хоойлуңга ынаамны чүү дээр! Ооң дугайында хүнзедир хандыр боданыр-дыр мен.

⁹⁸Сээң айтыышкының мени дайзыннарымдан мерген угаанныг кижи кылып кагды — ол үргүлчү мээң-биле кады болгай.

⁹⁹Сээң доктаалдарың дугайында хандыр бодап чоруур болгаш, мен шупту башкыларымдан угаанныг болу бердим.

¹⁰⁰Сээң чагыгларыңны сагып чоруур болгаш, кырганнардан шыырак билиглиг мен.

¹⁰¹Сээң сөзүңнү кадагалаар дээш, кандыг-даа бак орукче буттарымны баспайн чоруур мен.

¹⁰²Сээң шиитпирлериңден өскээр барбас мен — Сен мени өөредип турар болгай сен.

¹⁰³Сээң сөстериңниң дылымга амданныын — олар аксымга ары чигиринден-даа чаагай-дыр.

¹⁰⁴Сээң чагыгларың ачызында угаан кирдим, ынчангаш мегениң кандыг-даа оруунга хөңнүм чок.

¹⁰⁵Сээң сөзүң — мээң оруумга чырыткы-дыр, мээң кокпам чырыдар чырык-тыр.

¹⁰⁶Мен Сээң чөптүг шиитпирлериңни кадагалаар бооп даңгыраглаан мен — аазаан сөзүмнү күүседир мен.

¹⁰⁷Дыка-ла базындырып келдим, Дээрги-Чаяакчы, Бодуңнуң сөзүң ёзугаар мени тынгарып каг.

¹⁰⁸Мээң аксымдан үнген мөргүлдү хүлээп ап көр, Дээрги-Чаяакчы, Бодуңнуң шиитпирлериңге мени өөредип каг.

¹⁰⁹Амы-тыным үргүлчү айыыл адаанда, ынчалзажок Сээң хоойлуңну утпаан мен.

¹¹⁰Бузуттуг улус меңээ дузак салып каан, ынчалзажок Сээң чагыгларыңдан өскээр барбадым.

¹¹¹Сээң доктаалдарың кезээ мөңгеде мээң өнчүм болду, олар — мээң чүрээмниң өөрүшкүзү болгай.

¹¹²Чүрээмни Сээң дүрүмнериңни күүседир кылдыр кезээ мөңгеде, бүрүнү-биле ээлдирип алдым.

¹¹³Сеңээ бүрүнү-биле бердинмээн улуска хөңнүм чок, а Сээң хоойлуңга ынак мен.

¹¹⁴Сен — мээң чаштыр черим, дозуг-камгалалым сен; Сээң сөзүңге идегээр мен.

¹¹⁵Менден ырап чоруңар, бак хейлер! Бурганымның айтыышкыннарын кадагалаайн.

¹¹⁶Тынгарлыр кылдыр, Бодуңнуң сөзүң ёзугаар мени детки, идегелим хоозун куруг болбазын;

¹¹⁷камгалал алыр кылдыр, меңээ дузала, Сээң дүрүмнериң үргүлчү кичээнгейим төвүнде.

¹¹⁸Сээң дүрүмнериңден ойталаар бүгү улусту херекке албас сен, чүге дээрге оларның оп-мегези — Сеңээ удур өскерликчи чорук-тур.

¹¹⁹Чер-делегейниң бүгү бузуттуг улузун паштың кагы кылдыр санаар сен, ынчангаш Сээң доктаалдарыңга ынак мен.

¹²⁰Сенден сүртээш, мага-бодум сирилеп тур, шииткелдериңден база коргар-дыр мен.

¹²¹Мен шынчы база чөптүг чорукту боттандырып келдим, бастып чоруур улустуң холунга мени арттырбайн көр.

¹²²Чалчаң мен дээш дагдынып көр — бүгү чүве меңээ ачылыг болзун, адыыргак улус мени базынмазын.

¹²³Сээң камгалалың биле чөптүг сөзүңнү манааш, карактарым имистелип өжер четти.

¹²⁴Чалчаң меңээ энерелдиг хамаарылгаң көргүзүп, дүрүмнериңге мени өөредип каг.

¹²⁵Чалчаң болур мени угаан киир сурга, Сээң доктаалдарыңны билип алыйн.

¹²⁶Дээрги-Чаяакчының хөделип үнер үези келген-дир — улус Сээң хоойлуңну үреп каан болгай.

¹²⁷А мен Сээң айтыышкыннарыңга холумак чок арыг алдындан артык ынак мен.

¹²⁸Ынчангаш Сээң шупту чагыгларыңны шынныг кылдыр хүлээп көөр мен, кандыг-даа меге орукка хөңнүм чок.

¹²⁹Сээң доктаалдарың кайгамчык онза, ынчангаш оларны кадагалап чор мен.

¹³⁰Сээң сөстериңниң илерээшкини улусту чырыдар, кенен кижилерни угаан киирер.

¹³¹Сээң айтыышкыннарыңны манаарым аажок болгаш, аксым ажыдып, сөстериңни суг дег ижип тур мен.

¹³²Көрүжүңнү менче углап, ээ көрнүп көр — Сээң адыңга ынак улусче ынчаар ээ көрнүрүн шиитпирлээн болгай сен.

¹³³Мээң базымнарымны Бодуңнуң сөзүң-биле быжыктыр, кандыг-даа бузутка мени башкартпа.

¹³⁴Кижилерниң базымчазындан мени адыр — ынчан Сээң чагыгларыңны кадагалаар мен;

¹³⁵Чырыткылыг арныңны Бодуңнуң чалчаңга көргүс, дүрүмнериңге мени өөредип каг.

¹³⁶Сээң хоойлуңну кадагалавас улус бар боорга, караам чажы суг дег агып тур.

¹³⁷Чөптүг сен, Дээрги-Чаяакчы, Сээң шиитпирлериң шынныг.

¹³⁸Сээң айтып-чагаан доктаалдарың шуут чөптүг, шуут шынныг.

¹³⁹Дайзыннарым Сээң сөстериңни уттупкан боорга, сеткилимде килеңим хайнып-хөлзеп тур.

¹⁴⁰Сээң сөзүң дыка арыг, чалчаң аңаа ынак.

¹⁴¹Бичии ынай, куду көрдүрген кижи мен, ынчалзажок чагыгларың утпайн чор мен.

¹⁴²Сээң чөптүүң — мөңге турар чөптүг чорук-тур, Сээң хоойлуң — шынныг-дыр.

¹⁴³Айыыл-халап биле түрегдел мени сүрүп келди, а Сээң айтыышкыннарың — өөрүшкүм-дүр.

¹⁴⁴Сээң доктаалдарың кезээ мөңгеде чөптүг бооп артар, амы-тынныг артсын дээш, мени угаан киир сурга!

¹⁴⁵Бүгү чүлдү-чүрээм-биле мөргүп, Сени кыйгырдым, харыылап көр, Дээрги-Чаяакчы, Сээң дүрүмнериңни сагыыр мен.

¹⁴⁶Сени кый деп тур мен, камгалап көр, ынчан Сээң доктаалдарыңны кадагалаар мен.

¹⁴⁷Даң атпаанда-ла тургаш, кыйгырып тур мен, Сээң сөстериңге идегедим.

¹⁴⁸Сээң сөзүңнү хандыр бодаар дээш, чер кыры чырываанда оттуп кээр мен.

¹⁴⁹Энерелдииң-биле мээң үнүмнү дыңна, Дээрги-Чаяакчы, шиитпириң ёзугаар мени тынгар.

¹⁵⁰Кара сагыштыг улус халдап келди; олар Сээң хоойлуңдан ырай бергеннер-дир.

¹⁵¹А Сен меңээ чоок-тур сен, Дээрги-Чаяакчы, Сээң шупту айтыышкыннарың шынныг-дыр.

¹⁵²Шагдан тура Сээң доктаалдарың дугайында, оларны кезээ мөңгеде күштүг кылып кааның дугайында билип алган мен.

¹⁵³Базындырган мени көргеш, камгалап көр, чүге дээрге Сээң хоойлуңну утпайн келдим.

¹⁵⁴Мээң чаргымны шиитпирлежип, меңээ болуш, Бодуңнуң сөзүң ёзугаар мени амы-тынныг арттырып көр.

¹⁵⁵Дүрүмнериңни күүседир чүткүл бузуттуг улуста чок болгаш, Сээң камгалалың олардан ыракта.

¹⁵⁶Сээң өршээлиң өндүр улуг болгай, Дээрги-Чаяакчы, Бодуңнуң шиитпириң ёзугаар мени тынгар.

¹⁵⁷Мени истеп-сүрген дайзыннар хөй-дүр, ынчалзажок Сээң доктаалдарыңдан ойталаваан мен.

¹⁵⁸Сенден ойталаан улус көргеш, олар Сээң сөзүңнү кадагалавас боорга, бужарзынарым аажок.

¹⁵⁹Сээң чагыгларыңга ынаамны көр даан, Дээрги-Чаяакчы, Бодуңнуң энерелдииң-биле мени тынгарып каг.

¹⁶⁰Сээң сөзүңнүң алыс ужур-утказы шынныг-дыр, Сээң кандыг-даа чөптүг шиитпириң кезээде мөңгеде доктааттынган.

¹⁶¹Чагырыкчылар мени чылдагаан чок черге истеп-сүрүп тур, ынчалзажок мээң чүрээм чүгле Сээң сөзүңден сүрээдээр.

¹⁶²Аажок хөй олча-ажык алган кижи дег, Сээң сөзүңге өөрүп тур мен.

¹⁶³Мегени көөр хөңнүм чок, оон ческинер мен, а Сээң хоойлуңга ынак мен.

¹⁶⁴Чөптүг шиитпирлериң дээш Сени хүнде чеди катап алгап-мактаар мен.

¹⁶⁵Сээң хоойлуңга ынак улуска өндүр улуг-чаагай чорук доктаар, оларга чүү-даа чүве моондак болбас.

¹⁶⁶Сээң хайырлаарың камгалалга идегеп турдум, Дээрги-Чаяакчы, айтыышкыннарыңны күүседип келдим.

¹⁶⁷Сеткил-сагыжым Сээң доктаалдарыңны кадагалап келди, оларга аажок ынак мен.

¹⁶⁸Сээң чагыгларың биле доктаалдарыңны кадагалап келдим, мээң шупту оруктарым Сеңээ көскү болгай.

¹⁶⁹Мээң кыйгым Сеңээ четсин, Бодуңнуң сөзүң ёзугаар мени угаан киирип көр, Дээрги-Чаяакчы.

¹⁷⁰Мээң чалынган үнүм Сеңээ дыңналзын, Бодуңнуң аазаашкының ёзугаар мени камгалап көр.

¹⁷¹Бодуңнуң дүрүмнериңге мени өөреткениң дээш, аксы-дылым мактал сөзүн сөглээр.

¹⁷²Шупту айтыышкыннарың чөптүг боорга, мээң дылым Сээң сөзүңнү алгап ырлаар.

¹⁷³Сээң холуң меңээ дузалазын — күүседир дээш, чагыгларыңны шилип алган болгай мен.

¹⁷⁴Сээң хайырлаар камгалалыңны күштүү-биле күзеп чор мен, Дээрги-Чаяакчы, Сээң хоойлуң — өөрүшкүм-дүр.

¹⁷⁵Сени алдаржытсын дээш, мени амы-тынныг арттырып каг, Сээң шын шиитпирлериң меңээ дузалазын.

¹⁷⁶Аза бергеш, читкен хой дег апардым, Бодуңнуң чалчаңны дилеп тып ал — айтыышкыннарың утпаан болгай мен.

Read Ыдыктыг Библия, 2011 Псалтирь 118 Bible Online

Псалтирь 118 - Ыдыктыг Библия, 2011 bible

Псалтирь 118