Read Ыдыктыг Библия, 2011 Псалтирь 131 Bible Online

Псалтирь 131 - Ыдыктыг Библия, 2011 bible

Псалтирь 131

¹Көдүрлүүшкүн ыры. [1] Давидти база ооң хамык човалаңын бодап кел, Дээрги-Чаяакчы.

²Ол Дээрги-Чаяакчыга даңгыраглап, Израильдиң күштүг Бурганынга мынчаар аазап туржук:

³[3-5] «Дээрги-Чаяакчыга турар чер — Израильдиң күштүг Бурганынга чурттаар өргээ тып бербээн шаамда, бодумнуң аал-оранымче кирбес мен, орун-дөжээмге чытпас мен; карактарым шийип, удумзуравас мен, карактарым хавыын хаап, удувас мен».

⁶Бис ыдыктыг аптара дугайында Эфрата деп черге дыңнаан бис, ону Иарим шөлдеринден ап алган бис [106].

⁷Бурганның чурттап турар өргээзинче бараалы, Ооң буттар салыр черинге [107] мөгейээли.

⁸Дээрги-Чаяакчы, туруп келгеш, амыр-дыжың черинче чедип кел — Сен Бодуң, күчү-күжүңнү демдеглээн ыдыктыг аптара база.

⁹Сээң бараалгакчыларың чөптүг чорукту хеп дег кедип алзын, Сеңээ бердинген улус өөрүп-байырлазын.

¹⁰Бодуңнуң чалчаң Давидти бода, Бодуңнуң шилип чагганың хаандан хая көрүнме.

¹¹Дээрги-Чаяакчы Давидке бүзүрелдии-биле даңгыраглап турган болгай, Ол мынча деп аазаан сөзүнден ойталавас: «Сээң үре-салгалыңны дүжүлгеңге олуртур мен.

¹²Сээң салгакчыларың Мээң оларга өөредип каарым чагыг-керээм биле дүрүм-хоойлумну сагыыр болза, оларның салгакчылары база кезээ мөңгеде дүжүлгеңни ээлээр».

¹³Дээрги-Чаяакчы Сион дагны шилип алгаш, ону Бодунуң чурттаар чери кылып алыксай берген:

¹⁴«Бо дээрге кезээ мөңгеде Мээң амыр-дыжым чери-дир, маңаа чурттаар мен, бо чер Меңээ тааржыр-дыр.

¹⁵Сионну элбек аъш-чем курлавыры-биле хандырар мен, ооң ядыы улузун тоттур чемгерер мен;

¹⁶мында турар бараалгакчыларымга камгалалды хеп дег кедирер мен, мында чурттап турар, Меңээ бердинген улус өөрүп-байырлаар.

¹⁷Давидке Сионга күчү-күштү өстүрер мен; Бодумнуң шилип чаап алганым хаанга өшпес чырыкты белеткеп каар мен.

¹⁸Ооң дайзыннарын бак ат-биле шывар мен, а ооң кеткен оваадайы чайынналдыр чырыыр».