Read Ыдыктыг Библия, 2011 Псалтирь 138 Bible Online

Псалтирь 138 - Ыдыктыг Библия, 2011 bible

Псалтирь 138

¹Хөгжүм башкарыкчызынга. Давидтии. Мизмор-ыр. [1] Дээрги-Чаяакчы, Сен мени шылгап көрген сен, эки билир сен.

²Олуруп алганымны-даа, туруп келгенимни-даа билир сен, бодалдарымны ырактан-на билип каар сен.

³Орукка чорумда азы дыштанып чыдырымда, мени шылгаар сен, мээң баар оруктарым шуптузу Сеңээ билдингир.

⁴Сөзүмнү чугаалап четтикпээнимде-ле, Сен ону долузу-биле билир сен, Дээрги-Чаяакчы.

⁵Артымдан, мурнумдан мени бүзээледиң, холуңну менче салып алдың.

⁶Сээң билииң меңээ кайгамчык онза, аажок бедик — ону билип аар харыым чок.

⁷Сээң Сүлдеңден ырап кай баар мен, Сенден дезип кай баар мен?

⁸Дээрже үне бээр-даа болзумза, Сен ында сен; алдыы оранга чыдып аар-даа болзумза, Сен база ында сен.

⁹Даң хаяазын чалгыннангаш, далай ындынче ужуп чеде берзимзе безин,

¹⁰Сээң холуң мени аңаа чедип аар, күштүг холуң мени орта тудуп аар.

¹¹«Дүмбей караңгы мени чажырып аар, хүн чырыы меңээ дүн бооп хуула бээр» деп бодаан дижик мен.

¹²Ынчалзажок дүмбей караңгы безин мени Сенден чажырып шыдавас, дүн безин хүн ышкаш чырыдар, дүмбей караңгы Сеңээ чырык дег болур.

¹³Мээң чүрээмни Сен чаяап каан сен, иемниң хырнының иштинге мени боттандырып тургускан сен.

¹⁴Ол хире кайгамчык тургузуум дээш [111] Сени мактап тур мен, Сээң ажыл-херектериң кайгамчыктыг деп сеткилим ылап-ла медереп билип тур.

¹⁵Кажан мени чажыт черге чаяап турда, черниң ханызынга [112] чогаадып тургузуп турда, мээң бүгү эът-сөөгүм Сеңээ илдең турган.

¹⁶Сээң карактарың мээң боттанып орарымны көрген; меңээ доктааткан хуусаа, чаңгыс-даа хүнү үнмээнде-ле, бүрүнү-биле Сээң номуңда бижиттинген.

¹⁷Сээң бодалдарыңны билип аарымның бергезин, Бурганым, оларның эмге-тикчогун!

¹⁸Оларны санап шенээр болзумза, черниң элезининден-даа хөй-дүр. Оттуп келгеш, Сээң-биле хевээр-дир мен.

¹⁹Бурганым, бузуттуг хейни өлүрүп каарың кай! А силер, өлүрүкчүлер, менден ырап чоруңар!

²⁰Олар Сеңээ удур кара сагыштыг чугаалар чорудуп тур; дайзыннарың хоозун меге чүүлдер чугаалап тур.

²¹Сени көөр хөңнү чок улуска мээң база хөңнүм чок. Дээрги-Чаяакчы, Сеңээ удурланып турар улусту көөр хөңнүм чок.

²²Оларны шуут-ла көөр хөңнүм чок — олар мээң дайзыннарым апарды.

²³Мени шылгап көр, Бурганым, сеткил-чүрээмни билип ал, мени шенээш, дүвүрелимни билип ал.

²⁴Човалаңга чедирер орукта [113] эвес-тир мен бе — көрүп көр, мөңге орук-биле мени эдертип көр.