Read Ыдыктыг Библия, 2011 Псалтирь 143 Bible Online

Псалтирь 143 - Ыдыктыг Библия, 2011 bible

Псалтирь 143

¹Давидтии. [1] Дээрги-Чаяакчыга алдар! Ол — чалым-хаям; Ол мээң холдарымны дайылдажырынга, салааларымны — тулчурунга өөредип турар;

²Ол меңээ шынчы, Ол — мээң шивээм, хоргадалым, камгалакчым, дозуг-камгалалым; Оон хоргадал алыр мен, Ол мээң чонумну [114] меңээ чагыртып берип турар.

³Дээрги-Чаяакчы, кижи деп кымыл ол, Сен ол дээш чүге сагыш човаар сен; кижи амытан деп кымыл ол, Сен чүге ону бодап чоруур сен?

⁴Кижи — хей-бус ышкаш, ооң назыны — чидип бар чыдар хөлеге дег.

⁵Дээрги-Чаяакчы! Кудай-дээриңни ээктир тырткаш, дүжүп кел; дагларга дээвит — ышталы бээр;

⁶чаңныыңны кызаңнадыпкаш, дайзыннарны тарадыр сывырывыт; Бодуңнуң согуннарың адыпкаш, оларны девидедивит;

⁷Бодуңнуң холуңну бедиктен сунгаш, мени терең сугдан ушта тырт, хары улустуң холундан камгала.

⁸Олар — мегечи, аксы-сөзү шынныг эвес улус-тур.

⁹Бурганым, Сеңээ чаа ырдан ырлап берейн, эткир үннүг чанзыга үдеткеш, Сени алгап ырлаайн —

¹⁰Сен хааннарга тиилелге шаңнап, Бодуңнуң чалчаң Давидти хайыра чок хылыштан чайладып турар сен.

¹¹Мени камгалап, хары улустуң холундан адыр — олар — мегечи, аксы-сөзү шынныг эвес улус-тур.

¹²Чалыы назынында оолдарывыс частып үнген үнүштер дег болзун, кыстарывыс — ордунуң уранчыды чазаан адагаштары дег болзун.

¹³Аңмаарларывыс эриин ажыр янзы-бүрү тараа аймаа долзун, одар-белчиирлеривиске кодан хоювус муң, түмен бооп өзүп-көвүдезин,

¹⁴инек малывыс семирзин; дайзыннарывыс бисти туттуруушкунче аппарбазын, кудумчуларывыска ыы-сыы дыңналбазын.

¹⁵Шак ындыг чол эдилээн чон амыр-чыргалдыг. Дээрги-Чаяакчы оларга Бурган болган чон амыр-чыргалдыг.