Read Ыдыктыг Библия, 2011 Псалтирь 144 Bible Online

Псалтирь 144 - Ыдыктыг Библия, 2011 bible

Псалтирь 144

¹Бурганым болгаш Хааным, Сени кымдан арттыр мактаар мен, Сээң адыңны кезээ мөңгеде алгап-йөрээр мен.

²Хүннүң-не Сени алгап-йөрээр мен, кезээ мөңгеде Сээң адыңны алгап-мактаар мен.

³Дээрги-Чаяакчы өндүр улуг, алдар-макталга дыка төлептиг. Ооң өндүр бедиин билип аары болдунмас.

⁴Салгалдан салгал дамчый улус Сээң ажыл-херектериңни алгап-мактаар база Сээң күчү-күжүңнү медээлээр.

⁵Олар Сээң өндүр бедик ат-алдарыңны медээлээр, мен база Сээң кайгамчык ажыл-херектериңни угаап бодаар мен.

⁶Улус Сээң сүртенчиг ажыл-херектериңниң күчү-күжүн чугаалажы бээр, мен база Сээң өндүр бедииңни чарлап чугаалаар мен.

⁷Улус Сээң буянныыңның элбээн үргүлчү алдаржыдып чугаалай бээр, Сээң чөптүүңнү алгап ырлай бээр.

⁸Дээрги-Чаяакчы килеңнээчел эвес, кээргээчел, ээ көрнүүчел болгаш элбек энерелдиг.

⁹Дээрги-Чаяакчы бүгү улуска буянныг, Ооң чаяаганы бүгү чүүлдерге ээ-хайыралы илереп кээр.

¹⁰Дээрги-Чаяакчы, чаяалгаң шуптузу Сени алдаржытсын, Сеңээ бердинген улус Сени алгап-йөрээзин,

¹¹Сээң Чагыргаңның алдарын суртаалдазын, Сээң күчү-күжүңнү дамчыдып чугаалазын.

¹²Кижи төрелгетен олардан Сээң күчү-күжүң дугайында база Сээң Чагыргаңның алдарлыг өндүр бедииниң дугайында билип алзын.

¹³Сээң Чагыргаң кезээ мөңгеде турар, кижи төрелгетенниң бүгү салгалдарын хааннаар сен. Дээрги-Чаяакчының чугаалааны бүгү сөстерге бүзүреп боор, Ол Бодунуң чаяап кааны бүгү чүүлдеринге энерелдиг [115].

¹⁴Кээп ужуп чыдар бүгү улуска Дээрги-Чаяакчы чөленгииш болур, бүшкүйтүр бастырган бүгү улусту дорттай хөндүрер.

¹⁵Бүгү улустуң карактары Сенче ынаныштыг көөр, Сен оларга аъш-чемни чогуур өйүнде бээр сен:

¹⁶холуңну чада сунгаш, бүгү амылыгларның күзээн чүвезин хандырып, оларны тоттурар сен.

¹⁷Дээрги-Чаяакчы Бодунуң бүгү оруктарынга чөптүг, Бодунуң бүгү ажыл-херектеринге энерелдиг.

¹⁸Дээрги-Чаяакчы Ону кый деп мөргүүр бүгү улуска — шынныы-биле Ону кый деп мөргүүрлерге — чоок.

¹⁹Оон коргар улустуң күзээн чүүлүн Ол күүседип бээр, оларның дуза дилээн кыйгызын дыңнап кааш, камгалаар.

²⁰Дээрги-Чаяакчы Аңаа ынак бүгү улусту карактап-кадагалаар, а бузуттуг шупту улусту узуткап каар.

²¹Мээң аксы-сөзүм Дээрги-Чаяакчыны мактазын, бүгү амылыглар Ооң ыдыктыг адын кезээ мөңгеде алгап-йөрээзин.