Read Ыдыктыг Библия, 2011 Псалтирь 16 Bible Online

Псалтирь 16 - Ыдыктыг Библия, 2011 bible

Псалтирь 16

¹Мөргүл. Давидтии. [1] Дээрги-Чаяакчы, мээң актыымны дыңна, дуза дилээн алгы-кышкымче кичээнгейден сал, мегелевес аксы-дылымдан үнген мөргүлүмнү дыңна.

²Сен мени чөптүг шииткел-биле шиит, карактарың чөптүг шынны көрүп турзун.

³Сен мээң чүрээмни шенеп, дүне када кээп чордуң; шенеп көргеш, бузуттуг бодал тыппайн бардың.

⁴Кижилерниң кылып чорууру ышкаш, аксы-дылымдан бачыттыг сөс үнмеди, Сээң сөстериңниң аайындан эртпейн, каржы-бак кижиниң оруун эдереринден кичээнип келдим.

⁵Сээң айтып бергениң оруктардан мээң буттарым өскээр барбас, чандыр баспас.

⁶Сени кыйгырып тур мен, дыңнап каарыңны билир мен, Бурганым: кулааң менче ээктирип, сөстеримни дыңнап көрем.

⁷Кайгамчык арга-биле энерелиң көргүзүп көр, Сен Бодуңнуң күчүлүг холуң-биле хоргадал дилээн улусту дайзыннардан камгалаар сен;

⁸Сен мени карак огу дег кадагала, чалгыннарың адаанга мени чажырып ал.

⁹Менче халдап турар бузуттуглардан, мени бүзээлеп алган, амы-тынымга кыжанган дайзыннардан кадагала.

¹⁰Олар дээрге чүректери доңгун, адыыргак сөстер чугаалаар улус-тур.

¹¹Базым санай мени ам бүзээлеп турлар, черже чыттыр базып аарын күзеп, менче кезе кайгаарлар-дыр.

¹²Олар олча хайдынып, чимзенген арзылаң дег-дир, ажыт черлерде кеденип орар араатан аңга дөмей-дир.

¹³Дээрги-Чаяакчы, дүрген келем, оларже уткуй үнүп, дискек кырынга олуртувут. Бодуңнуң хылыжың-биле мээң амы-тынымны бузуттуг кижиден камгалап көр;

¹⁴өлүр тынныг улустан Бодуңнуң холуң-биле камгалап көр, Дээрги-Чаяакчы; олар дээрге дашказы бо чуртталганың хөреңги-байлаа-биле долдунган улус-тур, а Сен оларның хырнын Бодуңнуң шаңналың-биле [15] долдурар сен; оларның ажы-төлү тоткаш, артыкшылын боттарының ажы-төлүнге арттырып каарлар.

¹⁵А мен актыг болуп, Сээң шырай-арныңче көөр мен, оттуп келгеш, Сээң арның көргеш, таалап ханар мен.