Read Ыдыктыг Библия, 2011 Псалтирь 17 Bible Online

Псалтирь 17 - Ыдыктыг Библия, 2011 bible

Псалтирь 17

¹Хөгжүм башкарыкчызынга. Дээрги-Чаяакчы Бодунуң чалчазы Давидти ооң хамык дайзыннарының болгаш Саулдуң холундан адырып каарга, Давидтиң Дээрги-Чаяакчыга ырлаан ырының сөстери бо-дур. Ол мынча дээн: [1]

²Дээрги-Чаяакчы, мээң күчү-күжүм сен, Сеңээ ынак-тыр мен!

³Дээрги-Чаяакчы — мээң быжыг шивээм, хоргадалым, камгалалым. Мээң Бурганым — чалым-хаям. Ол — дозуг-камгалалым, мени камгалап турар күчү-күш, мээң чаглаам.

⁴Макталга төлептиг Дээрги-Чаяакчыдан дуза дилеп кый деп, дайзыннарымдан камгалалды алыр мен.

⁵Өлүмнүң четкилери мени ораап алган, өлүмнүг айыыл эккээр суглар мени сүртеткен;

⁶алдыы оранның кинчилери мени бектеп алган, өлүмнүң дузаа мурнумда салдынган.

⁷Кызагдалга алыскаш, Дээрги-Чаяакчыдан дуза дилеп кый дидим, мээң Бурганымдан дуза дилеп алгырдым. Ол Бодунуң өргээзинден мээң үнүмнү дыңнап кагды, дилег-кыйгым Ооң мурнунга чеде берди.

⁸Чер шимчеп, сирилээн, даглар дөжээнге чедир божаңнаан — Дээрги-Чаяакчының килеңинден сирилеш дээн.

⁹Ол килеңнээрге, думчуундан — ыш, аксындан — өрттендир чиир чалынныг от аттыгып үнүп, изиг көстер кызаңайндыр хып турган.

¹⁰Ол кудай-дээрни ээктир тырткаш, дүжүп келген, кара булут кырынга буттарын салып алган.

¹¹Дээрги-Чаяакчы херувимни [16] мунупкаш, хатты чалгын кылгаш, кылыйтыр ужуп чорупкан.

¹²Ол дүмбей караңгыны шугланып, дээрде чаъстыг кара булуттарже чаштып кире берген.

¹³Дээрги-Чаяакчының мурнунга чырык чайынналып, долу биле чаңныктарын чашкан булуттар көжүп турган.

¹⁴Дээрги-Чаяакчы кудай-дээрге диңмиттиг диңмирээн — Дээди Өрүкүнүң үнү, долу биле чаңныктар чажып, чыжыраан.

¹⁵Ол согуннарын салып, дайзыннарын тарай сывырыпкан, эмгежок чаңныктарын дүжүрүп, оларны девидедипкен.

¹⁶Дээрги-Чаяакчы, Сээң түрлүг үнүңден, Сээң эзиннээн тыныжыңдан далай-суглар дүвү көстүп, сыыгап, өртемчей өзээнге чедир ажыттынып келген.

¹⁷Бурган бедик дээрден ээккеш, мени сегирип алгаш, терең ээрем суглардан ушта тыртып каан;

¹⁸Ол мени күчү-күштүг дайзындан, күш-шыдалы менден ажыг өжээтеннерден камгалап каан.

¹⁹Дайзыннарым менче айыыл-халапка алысканым хүнде халдап келген, а Дээрги-Чаяакчы меңээ чөленгииш болган.

²⁰Ол мени шөлээн черже үндүрүп, камгалап каан — чүге дээрге мен Ооң сеткилинге кирген болган мен.

²¹Дээрги-Чаяакчы чөптүүм дээш меңээ ачы-буян көргүскен, холдарым арыы дээш мени шаңнаан.

²²Мен Дээрги-Чаяакчының оруктарындан соора барбаан мен, Бурганымның мурнунга бузутче чайгылбаан мен;

²³Ооң бүгү айтыышкыннарын эдерип чоруур мен, Ооң дүрүм-хоойлуларындан ойталаваан мен.

²⁴Мен Ооң мурнунга кем-буруу чок мен, бачыт үүлгетпес дээш кичээнип чор мен;

²⁵Дээрги-Чаяакчы мээң чөптүүм көргеш, Ооң мурнунга холдарымның арыын көргеш, мени шаңнаан.

²⁶Сеңээ шынчы улуска Сен база шынчы сен, ак сеткилдиг кижиге ак сеткилдиг сен;

²⁷арыг улуска арыг сен, а бузуттуг улуска хамаарылгаң багай;

²⁸биче сеткилдиг улусту камгалап турар сен, а адыыргак улусту куду көрүп турар сен.

²⁹Дээрги-Чаяакчы, чырыткымны кыпсып турар сен, дүмбей өттүр меңээ чырыдып турар сен, Бурганым Дээрги-Чаяакчы.

³⁰Сээң ачыңда аг-шеригни базып каар мен, Бурганым ачызында шивээлер ханаларын ажа халыыр мен.

³¹Бурган! — Ооң оруу болбаазыраңгай, Дээрги-Чаяакчының сөзү арыг шынчы; Оон хоргадал алган бүгү улуска Ол — дозуг-камгалал.

³²Дээрги-Чаяакчыдан өске, Бурган кымыл; Бурганывыстан өске, чалым-хая бар бе?

³³Бурган күш-шыдалды мээң шыңганнарымга сиңирип, ак орукту меңээ айтып берип турар;

³⁴буттарымны сыынныы дег кылып, мени бедиктерже үндүрүп турар;

³⁵холдарымны чаа-дайынга өөредип турар, хүлер чаны хере тыртыптар күштүг мен.

³⁶Сен меңээ Бодуңнуң дозуг-камгалалыңны тутсуп берген сен, ушпазын дээш, мени холуң-биле туткан сен, Сээң деткимчең мени өндүр улуг кижи кылып турар.

³⁷Сен мээң оруумдан доктар-моондакты чайладып, балдырларымны сирилевес быжыг кылып каан сен.

³⁸Дайзыннарымны истеп-сүргеш, чыпшыр чедер мен, оларны узуткап кагбаан шаамда, дедир эгбес мен.

³⁹Оларны чыттыр шаварымга, олчаан туруп шыдавастар — буттарым адаанга калырлар.

⁴⁰Сен дайын чорудар күш-шыдалды шыңганнарымга сиңирдиң, менче халдап келгеннерни мээң буттарым адаанга салып тур сен.

⁴¹Дайзыннарымның ооргазын меңээ көргүзүп, дезеринче албадаптың, өжээтеннеримни узуткап кагдым.

⁴²Олар алгырып турду, ынчалза-даа камгалакчызы чок-тур; Дээрги-Чаяакчыдан дуза дилээрге, оларга харыы бербес-тир.

⁴³Оларны, хатка бөөлдеткен довурак дег, тарадыр эстедиптер мен, кудумчуда малгаш дег, таптай базып кааптар мен!

⁴⁴Сен мени чонумнуң үймээнинден камгаладың, аймак-чоннарның бажынга олуртуп кагдың; безин билбес турганым чон ам меңээ бараан болуп турар;

⁴⁵олар мээң дугайымда дыңнап кааш, дораан-на чагыртты, өске чер чурттуглар меңээ чашпаалап турар.

⁴⁶Өске черлер улузунуң сузу бастынып, шивээлеринден сириңейнип үнүп турду.

⁴⁷Дээрги-Чаяакчы дириг! Мээң чөленгииш-хаямга алдар! Мени камгалап турар Бурган кымдан-даа арттыр мактатсын!

⁴⁸Ол — мен дээш өжээн негээр, чоннарны меңээ чагыртып турар,

⁴⁹дайзыннарымдан мени камгалап турар Бурган-дыр. Мени Сен меңээ удурланган улустан бедидир көдүрүп, каржы-дошкун кижиден камгалап турар сен.

⁵⁰Ол дээш, Сени өске чоннар мурнунга алдаржыдар мен, Дээрги-Чаяакчы, Сээң адыңны алгап ырлаар мен.

⁵¹Дээрги-Чаяакчы шилип алган хаанынга өндүр улуг тиилелгелерни шаңнап турар, Ол Давидке болгаш ооң үре-салгалынга кезээ мөңгеде энерелдиг!