Read Ыдыктыг Библия, 2011 Псалтирь 2 Bible Online

Псалтирь 2 - Ыдыктыг Библия, 2011 bible

Псалтирь 2

¹Чоннар чүге килеңнеп хөлзеп турарыл, аймактар чүге хоозун чүүлдер бодап турарыл?

²Чер-делегейниң хааннары тура халчып, чагырыкчылар демнежип, Дээрги-Чаяакчы биле Ооң шилип алган хаанынга удур тулчуп үнер деп барган-дыр:

³«Оларның кинчи-бегин үзе соккаш, дарлалын дүжүр октаптаалы!»

⁴Дээрлерде саадаан Бурган оларны кочулап тур, Дээрги оларны кыжырып тур.

⁵Дээрги-Чаяакчы ынчан оларга ажынып, күштүг килеңи-биле коргудуп, мынча дээр:

⁶«Бодумнуң шилип алган хаанымны ыдыктыг Сион даамда дүжүлгеге олуртуп каан мен».

⁷Дээрги-Чаяакчының шиитпирин медээлээйн. Ол меңээ: «Сен — Мээң оглум сен, Мен бөгүн сээң Адаң апардым.

⁸Менден диле, ынчан бүгү чоннарны сеңээ өнчү кылдыр бээр мен; чер-делегейни, ээлээр чериң кылдыр, ужу-кыдыынга чедир бээр мен.

⁹Сен оларны демир мерге-биле чылча шавар [1] сен, дой сава дег чуура шавар сен» — дээн.

¹⁰Ындыг болганда, хааннар, угаан кирип көрүңер, чер-делегейниң чагырыкчылары, мээң чемелелимни хүлээп алыңар.

¹¹Дээрги-Чаяакчыга коргуушкун-биле бараан болуңар, коргуп-сүртеп-даа тура, өөрүп-байырлаңар.

¹²Ооң оглун хүндүлеңер [2], оон башка Ол килеңней бээр, а силер орууңарга өлүп каар силер — Ооң килеңи карак чивеш аразында кыптыгар болгай. Оон хоргадал алыр бүгү улус амыр-чыргалдыг.