Read Ыдыктыг Библия, 2011 Псалтирь 26 Bible Online

Псалтирь 26 - Ыдыктыг Библия, 2011 bible

Псалтирь 26

¹Давидтии. [1] Дээрги-Чаяакчы — меңээ чырык, меңээ камгалал — кымдан коргар деп мен? Дээрги-Чаяакчы — амыдыралым шивээзи — кымдан сүртээр деп мен?

²Өжээтеннерим, удурланыкчыларым, дайзыннарым бажым чиир дээш менче халдап келгеш, боттары-ла илдигип, калырлар.

³Эңмежок аг-шериг мени бүзээлеп кээр болза, мээң чүрээм коргуп-сүртевес; меңээ удур дайын-даа үнер болза, идегелим ышкынмас мен.

⁴Дээрги-Чаяакчыдан чаңгыс-ла дилеглиг мен, чүткүп чеде бериксээн чүвем чүгле бо: назынымның дургузунда Ооң бажыңынга туруп аары, Ооң өндүр чырыын хайгаарап көөрү, Ооң ыдыктыг өргээзинге кээри, Ооң күзел-соруун билип аары.

⁵Ол мени айыыл-халап хүнүнде Бодунуң майгынынга хоргададып аар, Бодунуң чадырының ажыт черинге чажырып каар, хая кырынче көдүрүп үндүре бээр болгай.

⁶Ам мени бүзээлээн дайзыннарым кырынга мээң бажым көдүрлү бээрге, Ооң майгынынга өөрүшкүлүг үнүм-биле өргүлдерим эккеп салыр мен, ырлавышаан, Дээрги-Чаяакчыны алгап-мактаар мен.

⁷Дээрги-Чаяакчы, Сени кыйгырган үнүмнү дыңна, менче ээ көрнүп, харыылап көр.

⁸Мээң чүрээм Сээң өмүнээңден дег: «Менче чүткүп келиңер!» — деп тур [22]. Дээрги-Чаяакчы, мен ам Сенче чүткүп чеде бээр мен.

⁹Бодуңну менден чажырбайн көр, килеңнээштиң, Бодуңнуң чалчаңдан ойталава! Сен меңээ дузалап турдуң, ам мени тоовайн барба, Бурганым, мени кагба, Камгалакчым!

¹⁰Авам биле ачам-даа мени каапкаш баар болза, Дээрги-Чаяакчы мени хүлээп алыр.

¹¹Дээрги-Чаяакчы, мени Бодуңнуң орууңга өөредип каг, дайзындан камгалап, мени дорт оруктап эдерт.

¹²Мени туразында аажылаар кылдыр дайзыннарымга хүлээдип бербе — мегелеп херечилээр улус менче халдап, өжү ханмайн турар болгай.

¹³А мен дириглер оранынга Дээрги-Чаяакчының ачы-буянын көрүп каарымга бүзүрээр мен.

¹⁴Дээрги-Чаяакчыга идеге — кадыг-быжыг бол, чүрээң эрес-дидим болзун — Дээрги-Чаяакчыга идеге!