Read Ыдыктыг Библия, 2011 Псалтирь 29 Bible Online

Псалтирь 29 - Ыдыктыг Библия, 2011 bible

Псалтирь 29

¹Өргээни чаартып турда, ырлаан мизмор-ыр. Давидтии. [1]

²Дээрги-Чаяакчы, Сени кымдан арттыр алгап-мактаар мен — Сен мени көдүрүп аппаргаш, дайзыннарымга мээң айыыл-халавым дээш өөрүп-байырлаар арга бербедиң.

³Дээрги-Чаяакчы, Бурганым! Сенден дуза дилеп турдум, мени ынчан сегиткен сен.

⁴Дээрги-Чаяакчы! Сен мээң амы-тынымны өлүглер оранындан үндүр тыртып эккелдиң, хөөрже кире бербезин дээш, дириг арттырып кагдың.

⁵Дээрги-Чаяакчыга бердинген улус, Ону алгап ырлаңар, Ооң ыдыктыг адын алдаржыдыңар.

⁶Ооң килеңи хензиг өйде кыптыгар, а эки көөрү — амы-тынны хайырлаар: кежээ ыглап-сыктазымза-даа, даарта эртен өөрүп-байырлаар мен.

⁷Сагыш човаар чүвем чок тургаш: «Кажан кезээде тендиш дивес мен» — деп чугаалап чордум.

⁸Дээрги-Чаяакчы, Сен менче ээ көрнүп, мени быжыг даг дег кылып кагдың. А менден өскээр көрнү бээриңге, коргуп турдум.

⁹Дээрги-Чаяакчы, ынчан Сенден диледим, Дээргим сеңээ мөргүдүм:

¹⁰«Өлү бээримге, ажыы чүл? Хөөрже кире бээримге, эки чүү боор? Өлген сөөк Сени канчап алдаржыдарыл? Алыс шыныңны канчап херечилээрил?

¹¹Дээрги-Чаяакчы, мени дыңнап, ээ көрүнем! Дээрги-Чаяакчы, меңээ дузаң көргүзем!»

¹²Ыы-сыымны өөрүшкүже хуулдуруптуң, качыгдалым хевин уштуп, хөглээшкинниң хевин меңээ кедириптиң —

¹³сеткил-чүрээм олчаан Сени алдаржыдып, черле ыыт чок барбас болзун. Дээрги-Чаяакчы, Бурганым, Сени мөңге шагда алдаржыдайн!