Read Ыдыктыг Библия, 2011 Псалтирь 30 Bible Online

Псалтирь 30 - Ыдыктыг Библия, 2011 bible

Псалтирь 30

¹Хөгжүм башкарыкчызынга. Мизмор-ыр. Давидтии. [1]

²Дээрги-Чаяакчы, хоргадалым Сенде, адым кажан-даа баксыравазын, Бодуңнуң чөптүүң ёзугаар мени камгалап көр.

³Кулааңны менче ээктир, меңээ болчуп, дүрген чедип кел, быжыг чалым-хаям, хоргадаар шивээм бооп, мени камгала.

⁴Чалым-хаям, шивээм-дир сен, Бодуңнуң адың алдаржызын дээш мени эдертип, башкар.

⁵Мээң шивээм болгай сен — дайзыннарымның меңээ бүдүү салып каан какпазындан мени чайлат.

⁶Амы-тынымны Сээң холуңга хүлээдип тур мен — Сен мени хостап турар болгай сен, алыс шынныг Дээрги-Бурган-Чаяакчы.

⁷Хоозун меге дүрзүлерге мөгеер улуска хөңнүм чок, а бодум Дээрги-Чаяакчыга идегээр мен.

⁸Сээң энерелиң дээш өөрүп-хөглээр мен — Сен мээң айыыл-халавымны көрүп кагдың, аар-бергеге алысканымны билип кааптың,

⁹дайзынымның холунче мени киирбедиң, буттарымны шөлээн черге тургузуп кагдың.

¹⁰Дээрги-Чаяакчы, менче ээ көрнүп көр — кызыышкынга таварыштым, качыгдалдан карактарым, сеткилим, ишти-хөңнүм соглуп кагды.

¹¹Амыдыралым муңгаралдан, назыным уё-човуурдан үстүп төнер четти, кем-буруумдан [25] күжүм төнүп, сөөктерим кургап кагды.

¹²Хамык дайзыннарым мени дора көөрге, кожаларым безин мени бактап турлар, таныш өөрүмге-даа коргунчуг амытан апардым, кудумчуга мени көрген улус дезип маңнажы бээр-дир.

¹³Улустуң чүректеринде, өлген чүве дег, уттундура бердим, чарык сава дег апардым.

¹⁴Хөй улустуң бак сөглээрин дыңнап шаг болдум, долгандыр — коргуш-ла, коргуш; дайзыннар меңээ удур бөлүглежип, амы-тыным үзүп каарын бодап тур.

¹⁵А мен Сеңээ идегээр мен, Дээрги-Чаяакчы, «Бурганым сен» деп чугаалап тур мен.

¹⁶Мээң назыным хуусаазы — Сээң холуңда; дайзыннарым холундан, истеп-сүрген улустан мени камгала.

¹⁷Чырыткылыг арныңны Бодуңнуң чалчаңга көргүс: энерелдииң-биле мени камгала.

¹⁸Дээрги-Чаяакчы, Сени кыйгырдым, адым баксыравазын, бузуттуглар харын бак атка кирзин, өлүглер оранынче дүжүп, ыыт чок артсын.

¹⁹Чөптүг-шынныг кижиге удур туразы улгадып, ону куду көрүп, бак чүве мегелеп чугаалаар аастардан үн үнмес апарзын.

²⁰Сенден коргар улуска кадагалап турарың, кижи амытандан дезип, Сеңээ хоргадап кээр улуска белеткеп алганың ачы-буяныңның арбын, хөйүн!

²¹Сен оларны Бодуңнуң шывыыңның адаанга улустуң кара сагыжындан чажырар сен, Бодуңнуң оран-саваңга аас-дылдан хоргададыр сен.

²²Быжыглалдыг хоорай-шивээге Бодунуң энерелин кайгамчык арга-биле меңээ көргүскен Дээрги-Чаяакчыга алдар!

²³Хөлзеп дүвүрээш: «Сээң көрүжуңден шөлүттүрген-дир мен» деп бодап турдум, ынчалзажок Сенден дуза дилеп кыйгырарымга, мөргүл кылган үнүмнү дыңнап кагдың.

²⁴Дээрги-Чаяакчыга бердинген бүгү улус, Аңаа ынак болуңар, Дээрги-Чаяакчы Аңаа шынчы улусту кадагалаар, а туразы улуг улустуң кеземчези эриин ажар.

²⁵Дээрги-Чаяакчыга идегээр бүгү улус, кадыг-быжыг болуңар, чүрээңер эрес-дидим болзун.