Read Ыдыктыг Библия, 2011 Псалтирь 32 Bible Online

Псалтирь 32 - Ыдыктыг Библия, 2011 bible

Псалтирь 32

¹Чөптүг-шынныг улус, Дээрги-Чаяакчы дээш өөрүп-байырлаңар! Бурганны алгап-мактаан сөстер ак сагыштыг улустуң аксы-дылынга эптежир.

²Дээрги-Чаяакчыны чадаган-биле үдеп, мактаңар, Аңаа эткир үннүг чанзы-биле үдеп, ырлап бериңер;

³Аңаа чаа ырдан ырлап бериңер, аянныг, ыыткыр үдеп, ырлажыңар.

⁴Дээрги-Чаяакчының сөглээн сөзү арыг шын, Ооң кандыг-даа ажыл-херээ ылап шынныг.

⁵Ол чөптүг чорук биле шын шииткелге ынак; Ооң энерели чер-делегейни бүргей алган.

⁶Дээрги-Чаяакчының сөзү-биле дээрлер, Ооң аксындан үнген тыныш-биле дээрлерде бар бүгү чүүлдер чаяаттынган.

⁷Ол далайның сугларын чаңгыс черге бөле чыып каан, дүп чок ээремнерни шыгжамырларже дег кылдыр шыгжай суп каан.

⁸Дээрги-Чаяакчыдан бүгү чер-делегей сүртезин; Ооң мурнунга өртемчейниң бүгү чурттакчылары коргуп сирилезин.

⁹Ол чугаалаарга, бүгү чүве тывылган, Ол дужаарга, бүгү чүве тургустунган;

¹⁰Дээрги-Чаяакчы аймактарның бодал-сагыжын күш чок болдуруп, чоннарның бодалдарын буурадып турар.

¹¹А Дээрги-Чаяакчының шиитпири кезээ мөңгеде артар, Ооң чүрээнге тывылган бодалдар салгалдан салгал дамчып чурттаар.

¹²Дээрги-Чаяакчы оларның Бурганы болган чон, Ооң өнчү кылдыр шилип алганы аймак амыр-чыргалдыг.

¹³Дээрги-Чаяакчы дээрлерден ээккеш көрүп, кижи төрелгетенни хайгаарап турар;

¹⁴Ол Бодунуң саадап орар дүжүлгезинден черде чурттаан бүгү улусче көрүп орар.

¹⁵Ол улустуң шуптузунуң чүректерин чаяап берген, оларның бүгү ажыл-херектерин өттүр көрүп турар.

¹⁶Хаан кижиге аг-шерииниң хөйү камгалал болбас, тулган мөге кижини улуг күш-шыдалы камгалавас.

¹⁷Тиилелге чедип алыр дизе, дайынчы аътка кордаан херээ чок, ол бодунуң кончуг улуг күжү-биле ээзин камгалап шыдавас.

¹⁸Дээрги-Чаяакчыдан коргар, Ооң энерелинге идегээр улусту Ол карактап-кадагалаар.

¹⁹Ол улусту өлүмден камгалаар, аш үезинде оларны ашкарып-чемгерер.

²⁰Бис Дээрги-Чаяакчыга сеткиливис ханызындан идегээр бис; Ол — биске дузалаар, бистиң дозуг-камгалалывыс болур;

²¹Бурган дээш, чүрээвис өөрүүр, Ооң ыдыктыг адынга ынаныр болгай бис.

²²Дээрги-Чаяакчы, Сеңээ канчаар идегээривис дег, энерелиң бисти ынчаар кадагалазын!