Read Ыдыктыг Библия, 2011 Псалтирь 33 Bible Online

Псалтирь 33 - Ыдыктыг Библия, 2011 bible

Псалтирь 33

¹Давидтии. Давид Авимелехтиң мурнунга угааны солуу кижи бооп баажыланып, үндүр сывыртадып алгаш, чоруй барган үеге хамааржыр. [1]

²Кайы-даа үеде Дээрги-Чаяакчыны алгап-йөрээр мен, аксы-сөзүм ону үргүлчү алгап-мактаар.

³Дээрги-Чаяакчы дээш, мактаныр мен, базындырган улус ону дыңнааш, өөрүп-хөглээр.

⁴Дээрги-Чаяакчыны мээң-биле кады алдаржыдыңар, Ооң адын шупту чаңгыс аай кымдан арттыр мактаалы.

⁵Дээрги-Чаяакчыны кыйгырган мен — Ол мени дыңнады, коргар бүгү чүүлдеримден камгалап кагды.

⁶Олче көрүп турган бүгү улустуң шырайы чырый берген, оларның арыннары кыспас.

⁷Кээргенчиг кижи кыйгырды — Дээрги-Чаяакчы дыңнап кааш, ону бүгү айыыл-халавындан камгалап кагды.

⁸Дээрги-Чаяакчының төлээзи Бургандан коргар улустуң чанынга турлагжып туруп алгаш, оларны камгалаар.

⁹Амзангырлап шенеп көрүңер, Дээрги-Чаяакчының кайы хире ачы-буянныын билип каар силер. Хоргадалды Оон алыр кижи амыр-чыргалдыг.

¹⁰Дээрги-Чаяакчының улузу, Оон коргуп чоруңар; Оон коргар улус түрегдел билбес.

¹¹Арзылаңнар безин түрегдеп, аштай бээр, а сеткили Дээрги-Чаяакчыже чүткээн улус кандыг-даа буянның четпезин эскербес.

¹²Ажы-төлүм, мени дыңнаңарам: Дээрги-Чаяакчыдан коргарынга силерни өөредип каайн.

¹³Силерниң араңарда амыдыраарын күзээр, аас-кежиктиг хүннер көрүксээр кижи бар бе?

¹⁴Кара сагыштыг сөстер эдеринден кичээн, мегечи сөстер эдер дээш аксың ажытпа.

¹⁵Бузуттан чайла, буян тары; амыр-тайбыңны диле, олче чүткү.

¹⁶Дээрги-Чаяакчының карактары чөптүг-шынныг улусче көрнүр, Ооң кулактары оларның дуза дилээн кышкызын дыңнаар.

¹⁷А бузут үүлгедикчилеринче Ол сүртедир көрүп турар — оларның ады чырык чер кырынга шуут артпас.

¹⁸Дээрги-Чаяакчыны улус кый дээрге, Ол дыңнап турар, оларны бүгү айыыл-халаптардан адырып турар.

¹⁹Дээрги-Чаяакчы аажок муңгараан улуска чоок; сагыш-сеткили бастырган улусту камгалап турар.

²⁰Чөптүг-шынныг кижиниң таваржыр айыылы хөй-даа болза, Дээрги-Чаяакчы ону оларның шуптузундан камгалаар.

²¹Дээрги-Чаяакчы ооң бүгү сөөктерин кадагалаар — оларның чаңгызы-даа сыйылбас.

²²Бак кижини айыыл-халап сүрүп четкеш, өлүрүп каар; чөптүг-шынныг кижини көрбес улус кем-буруузу дээш кеземче алыр.

²³Дээрги-Чаяакчы Бодунуң чалчаларының амы-тынын адырып хостаар, хоргадалды Оон алыр улустуң кайызын-даа кем-буруузу дээш кезетпес.