Read Ыдыктыг Библия, 2011 Псалтирь 34 Bible Online

Псалтирь 34 - Ыдыктыг Библия, 2011 bible

Псалтирь 34

¹Давидтии. [1] Дээрги-Чаяакчы, меңээ удурланган кижилерге удурланып, меңээ удур тулушкан улус-биле чаалаш;

²дайынчы дозуг-камгалалың ап алгаш, меңээ дузалап, туруш;

³хылыжың хындан уштуп, чыдаң аннып, мени сүрген улуска удур турувут, меңээ: «Камгалакчың-дыр мен!» — деп чугаала.

⁴Мээң амы-тынымны үзүксээн улус ыядып човазын, адын баксыратсын, меңээ бак чүве бодап алган улус дедирленип дессин, бак атка кирзин;

⁵олар хатка доюлган довурак-доозун дег болзун, Дээрги-Чаяакчының төлээзи оларны сывырыпсын;

⁶оларның оруу караңгы, тайгыр болзун, Дээрги-Чаяакчының төлээзи оларны истеп-сүрзүн.

⁷Олар чылдагаан чок черге меңээ четки салды, буруу чок черге меңээ оңгар казып алды.

⁸Манавааны өлүм оларны таварзын, меңээ чажыра салып каан какпазы частып, аңаа кактыргаш, өлүмүн тыпсыннар.

⁹А мээң сеткилим Дээрги-Чаяакчы дээш өөрүүр, Оон кээр камгалал дээш хөглээр.

¹⁰Мээң ишти-хөңнүм: «Дээрги-Чаяакчы, Сен ышкаш кым барыл? Кошкак кижини күштүг кижиден, ядыы-түреңгини — үптекчизинден камгалап турар сен!» — деп чугаалаар.

¹¹Кара сагыштыг херечилер меңээ удурланып тур: билбес чүвемни айтырып, мени байысаар-дыр,

¹²буяным дээш бузут-биле харыылап, сеткилимни өскүссүредип тур.

¹³А мен, олар аарып турда, качыгдал хевин кедип, мага-бодумну шеглээшкин-биле харыксыраттым; олар дээш мөргүлүм бодумга ачылыг болзун [27].

¹⁴Мен оларга бодумнуң эш-өөрүмге азы ха-дуңмамга дег хамаарылга көргүзүп: авазының ажыын ажаан кижи дег муңгарап, бажым халайтыпкан чоруп турдум.

¹⁵А кажан мен илдигип кээп дүжеримге, олар аажок өөрээн — бужар хейлер меңээ удур чыглып турду, мен билбээнимде, мени бак сөглеп, соксаал чокка халдады;

¹⁶каржызы-биле мени кочулап, диштерин кыжырадып, кыжанып шаг болду.

¹⁷Дээрги-Чаяакчы, ол бүгүже чежеге дээр анаа көрүп кээр сен? Оларның бузуттуг үүлгедиглеринден амы-тынымны камгала, ол араатаннардан дың чаңгыс тынымны камгала.

¹⁸Мен улуг чыышка Сеңээ өөрүп четтирер мен, эңмежок чон аразынга Сени алгап-мактаар мен.

¹⁹Мээң-биле хей черге өжээннежип турар, чылдагаан чок черге мени көрбес, карак басчып, дошкуураан улус, мени тиилээш, өөрүп-байырлавазын.

²⁰Оларның чугаазында эп-найырал сөзү дыңналбас, олар чер-делегейде тайбың улуска удур кара бодалдарлыг болгай;

²¹менче аксын калбаңнадып: «Таптыын, таптыын! Караавыс-биле көрдүвүс!» — дижип турлар.

²²Дээрги-Чаяакчы, ол бүгүнү Сен көрдүң, ыыт чок эрттирбе, Дээргим, ырап чорба, мени кагба!

²³Оттуп кел, мээң чаргымга шын шиитпир үндүрер дээш туруп кел, Дээрги Бурган!

²⁴Дээрги-Чаяакчы, меңээ шиитпириңни чөптүүң ёзугаар үндүрүп көр, Бурганым, дайзыннарым мени кочулап, өөрүвезин;

²⁵боттарының чүректеринге: «Таптыын, ол боор! Сеткиливис ханып тур!» — дишпезин. «Бис ону сыырыптывыс!» — дишпезин.

²⁶Мээң айыыл-халавым дээш өөрүп турар шупту улустуң ады баксырап, ыядып човазын; «Сенден артык бис» — дишкен шупту улус бак атка кирип, арны кыссын.

²⁷Мээң агартыышкынымны күзээн улус өөрүп-байырлазын, олар үргүлчү: «Бодунуң чалчазынга чаагай чорук күзээн Дээрги-Чаяакчы өндүр улуг!» — деп чугаалазын.

²⁸Мээң аксы-сөзүм база Сээң чөптүүңнү суртаалдаар, Сени хүннү бадыр алгап-мактаар!