Read Ыдыктыг Библия, 2011 Псалтирь 36 Bible Online

Псалтирь 36 - Ыдыктыг Библия, 2011 bible

Псалтирь 36

¹Бузуттуг улуска хорадап, хөлзеве, бак чүве үүлгедир улуска адааргава —

²олар удавайн оът-сиген дег оңуп каар, ногаан үнүш дег кадып каар.

³Дээрги-Чаяакчыга идеге, буяндан тары, чериңге чурттап, мал-маганыңны доктаамал кадар.

⁴Дээрги-Чаяакчы-биле харылзааң дээш таала, Ол сээң чүрээңниң күзелдерин күүседип бээр;

⁵Дээрги-Чаяакчыга амыдыралың оруун хүлээдип, Аңаа идеге — Ол чогууру-биле кылып бээр;

⁶сээң актыыңны Ол чырык дег чайнадыптар, сээң чаргыңның шынныын Ол дал дүъш дег чырыдыптар.

⁷Дээрги-Чаяакчының мурнунга хөлзеве, Аңаа ынан. Амыдыралының оруунга чедиишкинниг болган, кара сагыштыг бодалдарын боттандырып чоруур кижи дээш хорадава.

⁸Килеңнээриң соксат, калчаарааже ажынма, бузут үүлгедиринге чедир хорадава;

⁹бузут үүлгедикчилери узуткадып каар болгай, а Дээрги-Чаяакчыга ынаныр улус чер-чуртту салгап алыр.

¹⁰Ам бичии болгаш, бузуттуг кижи чок апаар, ооң турган черин көөрге, ол чиде берген болур.

¹¹А биче сеткилдиг улус чер-чуртту салгап алгаш, чаагай чоруктуң элбээнге таалаар.

¹²Бузуттуг кижи чөптүг-шынныг кижиге удур кара сагыш бодап, олче диштерин кыжырадыр,

¹³а Дээрги бузуттуг кижини кочулаар, чүге дээрге ооң буураар хүнү кээрин көрүп турар.

¹⁴Бузуттуглар хылыжын хынындан уштуп, чаларын хере тыртып алганнар — ядыы-түреңги кижини узуткаар, дорт орук-биле бар чыдар улусту чок кылыр деп турарлары ол.

¹⁵Оларның хылыштары боттарының-на чүректеринче кадалыр, чалары сыйлып каар.

¹⁶Чөптүг-шынныг кижиде бар бичии эт-хөреңги эңмежок бузуттуг улустуң эгээртинмес эртине-байлаандан дээре;

¹⁷бузуттугларның күчү-күжү суларап каар, а чөптүг-шынныг улусту Дээрги-Чаяакчы деткиир болгай.

¹⁸Дээрги-Чаяакчы кем-буруу чок улустуң амыдыраар хүннерин билир, өнчүге алган чери оларга кезээ мөңгеде артып каар;

¹⁹айыыл-халап-даа үезинде оларның идегели хоозун болбас, олар аш-чут-даа хүннеринде тодар.

²⁰А бузуттуг улус узуткаттырып каар, Дээрги-Чаяакчының дайзыннары шөлдерде чечектер дег оңуп каарлар, ыш дег эстип чиде бээрлер [29].

²¹Бузуттуг кижи чээлиге акша алгаш, дедир эгитпес, а чөптүг-шынныг кижи өршээлдиин көргүзүп, хайырлал бээр.

²²Дээрги-Чаяакчының йөрээген улузу чер-чуртту салгап аар, а Аңаа каргаткан улус кырдырып аар.

²³Дээрги-Чаяакчыга кижиниң оруу тааржыр болза, Ол ооң буттарын быжыглаар;

²⁴ол кижи ужар деп баргаш, кээп дүшпес — Дээрги-Чаяакчы ооң холундан тудуп аар.

²⁵Мен аныяк турдум, ам кырый бердим, а чөптүг-шынныг кижиниң Бурганга кагдырыпканын, ооң ажы-төлүнүң аъш-чем диленип турганын черле көрбедим.

²⁶Шак ол кижи хүннү бадыр улуска өршээлдиин көргүзүп, чээли бээр; ооң салгалы алгадып-йөрээдир.

²⁷Бузуттан чайла, буяндан тары, ынчан чериңни кезээ мөңгеде ээлеп чурттаар сен;

²⁸Дээрги-Чаяакчы чөптүг чорукка ынак. Ол Бодунга бердинген улусту кагбас болгай, олар кезээ мөңгеде кадагалаттынып артар, а бузуттугларның салгалы узуткаттырар.

²⁹Чөптүг-шынныг улус чер-чуртту салгап алгаш, ону кезээ мөңгеде ээлеп чурттаар.

³⁰Чөптүг-шынныг кижиниң аксындан үнген чугаа-сөс мерген угаанныг болур, ооң аксы-дылы шынны чугаалаар.

³¹Бурганның дүрүм-хоойлузу — ол кижиниң чүрээнде, ынчангаш ол тайып ушпас.

³²Бузуттуг кижи чөптүг-шынныг кижини кедеп көөр, өлүрер дээш чүткүүр,

³³а Дээрги-Чаяакчы чөптүг-шынныг кижини бузуттугнуң холунга киирбес; ооң херээн сайгарып турда, ол буруулуг деп санатпас.

³⁴Дээрги-Чаяакчыга идеге, Ооң оруун эдер, Ол ынчан сени чер-чуртту салгазын дээш өрү көдүрер: бузуттугларның узуткаттырып турарын көрүп каар сен.

³⁵Быжыг дазылдыг, дөстелип чечектелген ыяш ышкаш түрлүг бузуттуг бир-ле кижини көрген мен [30].

³⁶А оон ооң үези эрте берген, ол ам чок — дилээримге-даа, тывылбайн барды.

³⁷Кем-буруу чок кижини хайгаарап көр, ак сагыштыг кижиже топтап көр, шак ол кижиниң келир үези — амыр-чаагай.

³⁸А кем-буруулуг улустуң шуптузун узуткап каар, бузуттугларның келир үезин чок кылып каар.

³⁹Чөптүг-шынныг улустуң камгалалы Дээрги-Чаяакчыдан кээр, айыыл-халап үезинде Дээрги-Чаяакчы оларның шивээзи болур;

⁴⁰Дээрги-Чаяакчы оларга дузалаар, оларны камгалаар — бузуттуглардан камгалап, карактап-кадагалаар, чүге дээрге олар Дээрги-Чаяакчыдан хоргадал дилеп келген.