Read Ыдыктыг Библия, 2011 Псалтирь 40 Bible Online

Псалтирь 40 - Ыдыктыг Библия, 2011 bible

Псалтирь 40

¹Хөгжүм башкарыкчызынга. Мизмор-ыр. Давидтии. [1]

²Ядыы-түреңги улусту бодап билир кижи амыр-чыргалдыг. Айыыл-халап хүнүнде Дээрги-Чаяакчы ону камгалаар.

³Дээрги-Чаяакчы ону кадагалаар база амы-тынныг арттырып каар; ол кижи чер-делегейге амыр-чыргалдыг чурттаар. Сен ону ооң дайзыннарының эргезинге хүлээтпес сен.

⁴Дээрги-Чаяакчы ол кижини, аарып чыдырда, быжыктырар. Сен аарыг кижини бүрүнү-биле кадык кылып каар сен.

⁵«Дээрги-Чаяакчы! Мени өршээп, экиртип көр, Сээң мурнуңга бачыт үүлгеткеним шын» — деп чугааладым.

⁶Дайзыннарым мени бак сөглеп: «Бо кижи кажан өлүп каарыл, ооң ады кажан балалып чидерил?» — дижип тур.

⁷Оларның бирээзи мени көрүп келгеш, мегелеп чугаалаар-дыр, ол кижи чүрээнге кара сагышты чыып аар-дыр, а үне бергеш, хоп-меге тарадыр-дыр.

⁸Мени көөр хөңнү чок бүгү улус меңээ удур аразында кара сагыш бодап алган:

⁹«Аарыг-хайга алыскаш, харыксыраан амытан-дыр, бир-ле чыдыпканда, ол ам катап туруп кээп шыдавас-даа» — деп сымыранчып тур.

¹⁰Мээң-биле эп-найыралдыг турган, идегеп чорааным, мээң хлевим чип турган кижи безин менче таваңгайын карартты.

¹¹А Сен, Дээрги-Чаяакчы, мени өршээп, көдүрүп көр, дайзыннарымны кезедиптейн.

¹²Сээң сеткилиңге киргенимни дайзынымның мээң айыыл-халавым дээш байырлаваанындан билип алыйн.

¹³А мени, кем чок болганым дээш, деткип, Бодуң-биле кады кезээ мөңгеде арттырып каар сен.

¹⁴Израильдиң Бурганынга — Дээрги-Чаяакчыга кезээ мөңгеде алдар! Аминь, ындыг-ла болзунам!