Read Ыдыктыг Библия, 2011 Псалтирь 48 Bible Online

Псалтирь 48 - Ыдыктыг Библия, 2011 bible

Псалтирь 48

¹Хөгжүм башкарыкчызынга. Корахтың оолдарыныы. Мизмор-ыр. [1]

²Бүгү чоннар, мону дыңнаңар! Өртемчейде чурттаан бүгү улус, кулактарыңар ээктириңер!

³Кижи төрелгетен, бүгү улус, бай-даа, ядыы-даа кижилер, дыңнаңар!

⁴Мээң аксы-дылым мерген угаанныг чүүл чугаалаар, мээң бодалдарым — угаан-сарыылдыг.

⁵Кичээнгейимни угаадыглыг чугааже салыйн, чадаганга тывызыымны ажыдып ойнаайн.

⁶Айыыл-халап үезинде корткан херээм чүл? Мени бастып турар улустуң кем-буруузу мени үглеп тур [38].

⁷Ол улус боттарының күжүнге идегээр, эртине-байлааның эмгежогу-биле мактаныр.

⁸Ынчалзажок кижи канчап-даа бодунуң ха-дуңмазын өлүмден садып хостап, ол дээш төлевирни Бурганга берип шыдавас.

⁹Улустуң амы-тынын садып хостаары угдунмас аар өртектиг, ындыг херек кажан-даа болдунмас:

¹⁰кым-даа мөңгези-биле амыдыравас, өлүглер оранын көрбейн барбас.

¹¹Билдингир болгай: мерген угаанныг-даа улус өлүп каар, олар-биле дөмей — мелегей улус база өлүп каар; кандыг-даа кижи чок апаарга, эртине-байлаа өске улуска артып каар.

¹²Олар сагыжынга: «Бажыңнарывыс мөңгеде турар, оран-саваларывыс салгалдан салгал дамчыыр» деп бодаарлар, чурттап турар черлерин боттарының аттары-биле адап аарлар [39].

¹³Ынчалзажок кижи алдар-хүндүнү үр эдилеп шыдавас — ол өлүр тынныг мал-маганга дөмей болу бээр.

¹⁴Мелегей улустуң эртер оруу база мактанырынга ынак улустуң салым-чолу мындыг боор-дур: Сэла

¹⁵оларны өлүглер оранынга хой ышкаш кажаалап каар, өлүм оларны кадарар. Эки мөзүлүг улус эртен оларны чагырып эгелээр [40], алдыы оран оларга оран-сава болу бээр, оларның мага-боду өлүглер оранынга ирип каар.

¹⁶А Бурган мени хүлээп көрүп, амы-тынымны өлүглер оранының холундан адырып хостаар. Сэла

¹⁷Өске кижи байый берген дээш, ооң бажың-балгадының каас-коязы дендеп турар дээш, кортпайн көр.

¹⁸Ол кижи өлүп калгаш, бодунга чүнү-даа ап шыдавас, каас-коязын ол чевегже алгаш барбас;

¹⁹ол кижи дириг чорааш, мага ханып, ажыл-херектери эки чоруп турган дээш, улуска мактадып турган-даа болза,

²⁰кезээ мөңгеде чырык көрбес оранче ада-өгбелериниң соондан чоруй баар.

²¹Алдар-хүндүлүг-даа болза, угаан чок кижи өлүр тынныг мал-маганга дөмейлежир.