Read Ыдыктыг Библия, 2011 Псалтирь 49 Bible Online

Псалтирь 49 - Ыдыктыг Библия, 2011 bible

Псалтирь 49

¹Мизмор-ыр. Асафтыы. [1] Дээрги-Чаяакчы — бурганнарның Бурганы чугаалап тур [41], чер-делегейниң чурттакчыларын хүн үнер чүктен хүн ажар чүкке чедир кыйгырып тур.

²Тергиин чараш-каас Сион дагда Бурган чырып турар.

³Бурганывыс чедип кээр, Ол ыыт чок болбас, Ооң мурнунда — оя чиир от, Ону долгандыр — күштүг шуурган!

⁴Ол Бодунуң чонун шиидип тура, өрүтен дээрни база черни херечилер боор кылдыр кыйгырып турар:

⁵«Өргүл салып тура, Мээң-биле керээ чарган улузумну чыып бериңер».

⁶Дээрлер Ооң чөптүүн медээлээр, Бурган — шииткекчи ол болгай. Сэла

⁷«Мээң чонум, Мени дыңна, сөс алыр деп тур мен; Израиль, сеңээ удур херечилээр деп тур мен. Бурган-дыр мен, Сээң Бурганың-дыр мен!

⁸Чемелелим чылдагааны — өргүлдериң эвес, бүрүн өрттеткен өргүлдериң үргүлчү Мээң мурнумда чыдар.

⁹Сээң аалыңдан буга албас мен, кажааларыңдан хуналар албас мен;

¹⁰арга-арыгда бүгү аң-мең, муң-муң тейлерде мал-маган база Мээңии болгай,

¹¹дагларда хамык куштарны, хову-шөлдерде шупту дириг амытаннарны билип, чагырар мен.

¹²Аштай-даа берген болзумза, сеңээ чугаалааш чоор мен, өртемчей-даа, ону ээлеп долган бүгү чүве-даа Мээңии болгай.

¹³Бугалар эъдин чиир ийик мен бе? Хуналар ханын ижер ийик мен бе?

¹⁴Бурганга өргүл кылдыр мактал-хүндүден эккел, Дээди Өрүкүнүң мурнунга даңгырактарың күүсет.

¹⁵Айыыл-халавың хүнү кээрге, Мени кый де — Мен сени камгалаар мен, а сен Мени алдаржыдар сен».

¹⁶А бузуттуг-бак кижиге Бурган мынча деп турар: «Мээң дүрүм-хоойлумну чүге үргүлчү чугаалаар сен, Мээң чагыг-керээмни чүге аксыңдан дүжүрбес сен?

¹⁷А бодуң Мээң өөредиимге хөңнүң чок-тур, Мээң сөстеримни херекчок дээш октапкан-дыр сен.

¹⁸Оор кижи көргеш, ооң-биле чоокшулажы бээр-дир сен, самыыраан улус-биле бир аай хуу-салымныг-дыр сен.

¹⁹Улусту бак сөглээр дээш, аксыңны сула салыптар-дыр сен, аксы-дылың кара сагыш үүлгедир-дир.

²⁰Ха-дуңмаңны үргүлчү нүгүлдээр-дир сен, аваңның оглунга удур хоп дажыыр-дыр сен.

²¹Сен ол бүгүнү кылып турдуң, а Мен ыыттавадым, сен ынчан Мени бодуңга дөмейлей бодапкан сен. Мен ам сени сойгалаар мен, бурууңну карактарыңга көргүзер мен.

²²Бурганны уттуп аар улус, ол бүгүнү билип алыңар, ынчанмас болзуңарза, үзе-чаза соп кааптар мен — ынчан кым-даа силерни Менден камгалап шыдавас.

²³Өргүл кылдыр Меңээ мактал эккеп турар кижи Менден коргуп турары ол; дорт орук-биле бар чыдар кижиге Бургандан кээр камгалалды көргүзер мен».