Read Ыдыктыг Библия, 2011 Псалтирь 5 Bible Online

Псалтирь 5 - Ыдыктыг Библия, 2011 bible

Псалтирь 5

¹Хөгжүм башкарыкчызынга. Үрер хөгжүм үдээр. Мизмор-ыр. Давидтии. [1]

²Дээрги-Чаяакчы, мээң сөстеримни дыңна, бодалдарымны билип ап көр.

³Алгы-кышкымны тооп дыңна, Хааным база Бурганым! Сеңээ мөргүп турарым бо.

⁴Дээрги-Чаяакчы, эртен эрте үнүмнү дыңна — даң хаяазында Сеңээ кээп, манагзынып туруп аар мен.

⁵Бузутка хөңнүң чок Бурган болгай сен; бак кижи Сээң-биле чоок аралажып шыдаар эвес.

⁶Турамык улус Сенче удур көрүп шыдавас, бүгү бачыт үүлгедикчилерин көөр хөңнүң чок.

⁷Мегелеп чугаалаарлар Сеңээ узуткаттырар, өлүрүкчүлерден, кара сагыштыг улустан Дээрги-Чаяакчының хөңнү калыр.

⁸А мен Сээң өндүр улуг энерелиң ачызында Сээң ордуңче кирип кээр мен, Сенден коргуп, ыдыктыг өргээңге мөгеер мен.

⁹Дээрги-Чаяакчы, дайзындан камгалап, чөптүүң-биле Бодуң мээң оруумну башта, Бодуңнуң айыткан орууңну мээң мурнумга дорттап бер.

¹⁰Дайзыннарымның чугаа-сөзүнде шынныг чүве чок-тур, оларның ишти-хөңнү — тамы-дыр, өгү — ажык чевег-дир, аксы-дылы-биле авыяастаар хейлер-дир.

¹¹Бурганым, олар кем-буруузун чүктээр кылып каг. Боттарының бодалдарындан буурап калзыннар, эмгежок кем-буруузу дээш, оларны хүлээп көрбе — Сеңээ удур үймээн үндүрген улус — олар болгай.

¹²А Сенден хоргадал алыр бүгү улус өөрүп-хөглээр, кезээ мөңгеде байырлаар, Сен оларга болчур сен. Сээң адыңга ынак улус Сеңээ чоргаарланыр.

¹³Дээрги-Чаяакчы, чөптүг-шынныг кижиге ачы-буянны хайырлаар-дыр сен, дозуг-камгалал-биле дег, ээ көрнүүшкүнүң-биле бүргээр-дир сен.