Read Ыдыктыг Библия, 2011 Псалтирь 54 Bible Online

Псалтирь 54 - Ыдыктыг Библия, 2011 bible

Псалтирь 54

¹Хөгжүм башкарыкчызынга. Хылдыг хөгжүм херекселдери үдээр. Маскил-ыр. Давидтии. [1]

²Бурганым, мөргүлүмнү дыңна, чаннып дилээн үнүмден чашты бербе.

³[3-4] Мени дыңнап, харыыдан бер. Дайзынның үнүн дыңнааш, бузуттуг хейге кызагдаткаш, хей-аъдым кудулап, качыгдалдан уё-човуурум төп тур мен. Олар шупту меңээ хора чедирип, килеңнеп база өжээргеп турлар.

⁵Хөрээмейде чүрээм күжүр сарыннай-дыр, өлүм-чидимден коргуушкун хөме ап тур;

⁶коргуп-сүртээн сеткилимге алзывыткаш, аймап калдым.

⁷Ынчангаш мен мынча дидим: «Көге-буга ышкаш чалгын-чүглүг болурум кай, ужуп үнгеш, оожум черге хонуп алза.

⁸Талыгырже ырай бергеш, ээн черге турумчуп алза. Сэла

⁹Шак-ла ынчан чайык-чаъстан, шуурган-хаттан шалып-дүрген чаштып-хоруй бээр ийик мен!»

¹⁰Дээрги-Чаяакчы, дайзыннарымны чок кылып, чугаа-дылын холуп-буда. Хоорайда мен чүгле алгыш-кырыш биле күчүлелди көрүп тур мен.

¹¹Хоорайның ханаларын дүне-хүндүс эргий кезип, хилинчекти, бузут-бакты нептереткеш туруптулар.

¹²Хоорайны хай-халап дола берген, кудумчулар, шөлдеринден оп-меге, кара сагыш ыравастаан.

¹³Мени бактап турар кижи — дайзыным эвес-тир, ындыг болза, шыдашкай мен; мени куду көрүп турар кижи — өжээтеним эвес-тир, ол турган болза, чашты бээр ийик мен.

¹⁴А ол дээрге сен-дир сен — сеткилимниң чамдыы болган, эргим, эң чоок эжим;

¹⁵аравыста ижин кара чок чугаалажып, мөөң чоннуң аразынга Бурганның өргээзинче кады барып турган эжим — сен-дир сен!

¹⁶Дээрги-Чаяакчы дайзыннарымче — аал-оранын-даа, сеткилин-даа кара сагыш ээлээн өжээтеннеримче өлүмнү салыпсын, оларны диригге-ле алдыы оранче киирипсин!

¹⁷Бурганымны кыйгырар мен — Дээрги-Чаяакчы мени камгалаар.

¹⁸Кежээликтей, эртен, дүъште ыглап-сыктап, дилег кылып кыйгырар мен: үнүмнү Ол дыңнап кааптар;

¹⁹менче халдаан дайзыннарым дескиндир эңдерик-тир — Дээрги-Чаяакчы мени олардан адырып, сагыш амыр арттырып каар.

²⁰Дүжүлгеге үе-дүптен бээр саадаан Бурган мени дыңнап каапкаш, дайзыннарны бакка сугар. Сэла Олар — черле экижип өскерилбес, Бургандан кортпас,

²¹эптиг-демниг кады чораан улузунче халдай бээр, эвилел туткан аксы-сөзүн үрээр улус-тур.

²²Чугаа-сөзү үстен чымчак, чүректерин чаа-дайын ээлээн улус ол-дур; аксы-сөзү өремеден хоюг, алыс боттары хылыш ышкаш айыылдыг улус ол-дур.

²³Дээрги-Чаяакчыга үүрге-чүъгүң хүлээдип бер, Ол сени деткиир деп бил. Чөптүг-шынныг кижини Ол кажан-даа тайып ушпас кылып каар.

²⁴О Бурганым, дайзыннарымны өлүм-чидимниң тамызынче дүжүр окта: өлүрүкчү, сагыжы кара хейлер өйлүг назын чартыы чедир чурттавазын. А мен Сеңээ идегээр мен!