Read Ыдыктыг Библия, 2011 Псалтирь 58 Bible Online

Псалтирь 58 - Ыдыктыг Библия, 2011 bible

Псалтирь 58

¹Хөгжүм башкарыкчызынга. «Узуткава» деп аялга үдээр. Давидтии. Миктам-ыр. Давидти өлүрүп каар дээш, Саул ооң бажыңын кедээр кылдыр улус чорудупкан үеге хамааржыр. [1]

²Бурганым, дайзыннарымдан мени адыр, менче халдаан кижилер четпес черже мени аппар.

³Кем-буруу үүлгедир улустан адыр, ол өлүрүкчүлерден камгала.

⁴Амы-тыным үзер дээш, олар мени кедээр-дир; күштүг улус меңээ удур эвилел кылып турар-дыр, а күжүр мээң бузудум-даа, бачыдым-даа чок ийин, Дээрги-Чаяакчы.

⁵Кем-буруу чок менче халдап, белеткел кылып турар-дыр — көрүп көрем, Дээрги-Чаяакчы, оттуп келгеш, меңээ дузала.

⁶Бурганым, Аг-шериглиг Дээрги-Чаяакчы, Израильдиң Бурганы! Дүрген келгеш, бүгү чоннарны кезет. Сеңээ шынчы эвес, бузут кылып чоруур улуска өршээл бербе. Сэла

⁷Дайзыннарым кежээлерде ээп келгеш, ыттар ышкаш улуур-дур, хоорайны дескиндир кедеңгирлеп чоруур-дур.

⁸«Дыңнап турар кижи чок!» — деп бодап, чараазын сыырып, аастарында хылыш бар дег турарларын көр.

⁹А Сен оларны кочулап тур сен, Дээрги-Чаяакчы, ол чоннарның шуптузун сотка олуртуп тур сен.

¹⁰Күчү-күш — Сенде, Сээң дузаң манап тур мен — Бурганым мээң шивээм болгай.

¹¹Мээң энерелдиг Бурганым мени уткуп кээр, дайзыннарым буураарын көөр арганы бээр.

¹²Мээң чонум утпас кылдыр, дайзыннарны Сен өлүрбе; дозуг-камгалалывыс Дээрги, оларны Бодуңнуң күжүң-биле силгип, чыттыр шаавыт!

¹³Аксы-дылының бачыды дээш, аксындан үнген сөстери дээш, аксы-сөзүнүң каргыжы, оп-мегези дээш, дайзыннарым адыыргак чоруунуң дузаанга туттуруп алзын.

¹⁴Килеңнээштиң, оларны Сен буурат-ла, буурат, чок болуп, читсиннер-ле. Улус ынчан Бурганның чер-делегейни ооң кыдыгларынга чедир Израильден чагырып турарын билип алыр. Сэла

¹⁵Дайзыннарым кежээлерде ээп келгеш, ыттар ышкаш улуур-дур, хоорайны дескиндир кедеңгирлеп чоруур-дур;

¹⁶аъш-чем дилеп, чимзенир-дир, аштап-суксааш, хыйланып улуур-дур.

¹⁷А мен Сээң күчү-күжүң алгап ырлаайн, эртен эрте энерелиң алгап-мактаайн — айыыл-халап мени тавараан хүнде камгалалым, хоргадалым Сенде болгай.

¹⁸О, мээң Күчүм! Сени алгап ырлап көрейн — шивээм болур Бурганым сен, энерелдиг Бурганым сен!