Read Ыдыктыг Библия, 2011 Псалтирь 64 Bible Online

Псалтирь 64 - Ыдыктыг Библия, 2011 bible

Псалтирь 64

¹Хөгжүм башкарыкчызынга. Мизмор-ыр. Давидтии. [1]

²Сион дагга Сени алгап ырлаарынга төлептиг сен, Бурганывыс, Сеңээ берген даңгыракты күүседиил.

³Мөргүлдү дыңнап турар Бурган, бүгү улус Сеңээ чедип кээр.

⁴Кемниг херектеривис биске алдыртпас-тыр; кем-буруувустан Сен бисти арыглап каар сен.

⁵Сээң шилип, чоокшуладып алган улузуң амыр-чыргалдыг! Ол улус Сээң өргээң чанынга чурттаар; бисти Сээң бажыңыңның — ыдыктыг оран-саваңның ачы-буяны тоттурар.

⁶Камгалакчы Бурганывыс, сүртенчиг ажыл-херектериң кылып, Бодуңнуң чөптүүңнү көргүзүп турар сен. Чер-делегейниң бүгү кыдыгларында, ырак далайлар ындында чурттаан улустуң идегели сен.

⁷Бодуңнуң күжүң-биле дагларны тургускан сен, күчү-күшке бүргедип алган сен;

⁸далайларның шимээн-даажын, чалгыгларның коолап мөөрээрин база чоннарның хөлзээзинин оожургадып турар сен.

⁹Чер-делегейниң кыдыгларында чурттаан улус Сээң кайгамчык демдектериң көргеш, Сенден коргар. Хүн үнер база ажар черлерде чурттаан улус Сени ырлап мактаар.

¹⁰Черни бодааш, ооң суксунун хандырып, элбээ-биле байыдып турар сен. Бурган, Сээң хемиң долу суглуг, үнүш-дүжүттү өзүп үнер кылдыр кылып турар сен;

¹¹аңдарган черни суггарып, хөрзүннү чаъс суу-биле чымчактап, өзүмнерни йөрээп турар сен.

¹²Чылды ачы-буяның-биле шаңнап турар сен, Сээң изээн орууңда эът-чаг элбек,

¹³ховуда одар-белчиирде оът-сиген элбек, тейлер өөрүшкүге бүргедир;

¹⁴шынааларны сүрүг малдар шыва алыр, хову-шөлдер тараа-биле шугланыр — олар шупту өөрүп-байырлап, ырлажып турар.