Read Ыдыктыг Библия, 2011 Псалтирь 67 Bible Online

Псалтирь 67 - Ыдыктыг Библия, 2011 bible

Псалтирь 67

¹Хөгжүм башкарыкчызынга. Давидтии. Мизмор-ыр. [1]

²Дээрги-Чаяакчы туруп кээр — Ооң дайзыннары тарадыр маңнажы бээр, Ону көөр хөңнү чок улус Оон дезип ыңай боор.

³Ыштың тарай бээри дег, оларны тарадыр сывырыптар сен; чуктуң отка эстири дег, бузуттуглар Бурганның мурнунга кырлып каар.

⁴А чөптүг-шынныг улус хөглээр, Бурганның мурнунга өөрүп-байырлаар, аас-кежиинге таалаар.

⁵Бурганывысты алгап ырлаңар, Ооң адын мактаңар. Ээн ховуда бар чыдар Бурганга оруктан белеткеңер [51]; Ооң ады — Дээрги-Чаяакчы, Ооң мурнунга өөрүңер.

⁶Өскүстерге Ада болур, дулгуяк кадайларга болчуп, чөптүг шиитпир үндүрер Бурган Бодунуң ыдыктыг өргээзинде турар.

⁷Бурган чааскаанзыргай улуска өг-бүлени хайырлаар, хоругдаттырган улусту хостап, аас-кежикче үндүре бээр, а Аңаа удурланган улус дунааргай изиг ээн ховуга артып каар.

⁸Бурганывыс, Бодуңнуң чонуңну баштап алгаш, үнүп бар чыдырыңда, ээн кургаг ховулап эртип бар чыдырыңда, Сэла

⁹Сээң мурнуңга чер шимчеп, дээрден чаъс куттулуп турган ийик, Синай даг безин Израильдиң Бурганының мурнунга сирилеп турган ийик.

¹⁰Бодуңнуң өнчү-чериңче элбек чаъсты чагдырып турган сен, Бурганывыс, ол чер могап туруптарга, быжыктырып турган сен.

¹¹Бодуңнуң чонуңну ол черге чурттадып каан сен, Бурганывыс. Бодуңнуң ачы-буянныың-биле түрегдээн улусту быжыктырып каан сен.

¹²Дээрги бо сөзүн чугаалап, буянныг медээлер чедирер улуг аг-шериин айбылап чоруткан:

¹³«Өжээтен аг-шериглерниң хааннары дезип-ле, дезип-ле тур, а бажыңнарында кыс улус олча-тывышты үлежип тур.

¹⁴Аал-ораныңарга хой кадарып артып калгаш безин, чалгыннарын мөңгүн-биле, чүглерин арыг алдын-биле шап каан көге-бугалар дег болу бээр силер».

¹⁵Күчүлүг Бурган шак ол черниң хааннарын тарадыр сывырыптарга, чер боду Селмон дагның бажында хар дег агара берген.

¹⁶Аажок бедик Васан даг, хөй баштыг Васан даг!

¹⁷Хөй баштыг даглар, чүге Сион дагже адааргап көрүп тур силер? Ол даг дээрге Бурганга чурттаксанчыг чер-дир, Дээрги-Чаяакчы аңаа кезээ мөңгеде чурттаар.

¹⁸Бурганның дайынчы тергелери муң-муң, дүк-түмен, Дээрги оларның аразында, ыдыктыг чер Синайда.

¹⁹Сен бедидир өрү көдүрүлген сен, хөй улусту тудуп алгаш, кижилерден албан-үндүттү хүлээп алган сен; Дээрги-Бурган-Чаяакчы ам Аңаа удурланган улус аразынга безин чурттаар.

²⁰Дээргиге алдар! Бурган хүннүң-не бистиң үүрге-чүгүвүстү чүктээр, Боду бисти камгалаар. Сэла

²¹Бурган биске камгалал эккээр Бурган болур, өлүм Дээрги-Бурган-Чаяакчының эргезинде.

²²Бурган Бодунуң дайзыннарының бажын, буруузунга алзып алган улустуң дүктүг тейин буза шаап каар.

²³Дээрги мынча деп чугаалаан: «Дайзыннарны Васан дагдан сүрүп эккээр мен, далай дүвүнден-даа сүрүп эккээр мен;

²⁴ынчан буттарың дайзыннарың ханын сүзер, ыттарың оларның мөчү-сөөгүн чылгаар».

²⁵Бурган, улус-чон Сээң бар чыдарыңны көрүп тур — мээң Бурганымның, Хаанымның ыдыктыг өргээже бар чыдарын көрүп тур.

²⁶Мурнунда — ырлашкан улус, ортузунда — тимпаннар [52] соп ойнаан аныяк кыстар, а соонда — хөгжүмчүлер шуужуп бар чыдыр.

²⁷Израильдиң үре-салгалындан укталган улус бодунуң чыыштарынга Дээрги-Бурган-Чаяакчыны алгап-йөрээп тур.

²⁸Шуушкан чон аразында: хеймер Вениаминниң аймаа — оларны баштап бар чыдар аймак; Иуданың аймааның чагырыкчылары мөөңнежип алган бар чыдар; Завулон биле Неффалимниң аймактарының чагырыкчылары база.

²⁹[29-30] Бурганың күчү-күштү сеңээ сиңирип берген. Бурганывыс, Иерусалимде турар Бодуңнуң өргээңден биске бодарадып берген күчү-күжүңнү быжыглап көр! Хааннар Сеңээ албан-үндүдүн эккеп бээр.

³¹Кулузунда турар аңны [53] чемеле — инек мал дег чоннар аразында мөңгүн былаажып үскүлешкен кодан баштыңы бугаларны сойгала; чаа-дайын күзээн чоннарны тарадыр сывырывыт.

³²Египеттен элчиннер чедип кээр, эфиоп чон Бурганче холдарын сунар.

³³Черниң күрүнелери, Бурганга ырлап бериңер, Дээргини алгап ырлаңар! Сэла

³⁴Дээрги эң бедик, эрте-бурунгу дээрде чоруп тур. Дыңнаңар — Ооң үнү чаңгыланып тур.

³⁵Бурганның күчү-күжүн хүлээп үнелеңер. Ооң өндүр бедии — Израильдиң кырында, Ооң күчү-күжү — булуттардан-даа бедикте.

³⁶Бурган, Бодуңнуң ыдыктыг өргээңге сүрээденчиг сен. Израильдиң Бурганы Бодунуң чонунга күчү-күштү хайырлап турар. Бурганга алдар!