Read Ыдыктыг Библия, 2011 Псалтирь 70 Bible Online

Псалтирь 70 - Ыдыктыг Библия, 2011 bible

Псалтирь 70

¹Дээрги-Чаяакчы, хоргадалым Сенде, адым кажан-даа баксыравазын.

²Чөптүүң ёзугаар мени хостап, камгала, кулааңны менче ээктирип, кадагала.

³Кажан-даа бол чашты бээрим хая бол; мени камгалаарын аазаан болгай сен, быжыг чалым-хаям, шивээм — Сен сен.

⁴Бурганым! Бузуттуглар, бак улус, кызагдакчылар холдарындан мени адыр.

⁵Аныяамдан идегелим, ынаныжым — чүгле Сен сен, Дээрги-Бурган-Чаяакчы.

⁶Төрүттүнүп кээримден-не чөленгиижим Сенде турду; төрээн ием хырнындан Сен-не мени ужулдуң. Үргүлчү-ле Сени алгап-мактап чор мен.

⁷Хөй улуска элдептиг чүүл болу бердим, а Сен меңээ — ылап быжыг хоргадал сен.

⁸Аксы-дылым Сени алдаржыдар сөстерден бүткен, хүннү бадыр Сени алгап-мактаар-дыр мен.

⁹Кырып-чөнүй бээримге, тоовайн барба; шыдал-күжүм суларай бээрге, мени кагба.

¹⁰Меңээ удур дайзыннарым сүлчээлешти; амы-тыным үзүксээн улус сүмележип:

¹¹«Бурган ону каапкан-дыр; истеп-сүрүп, тудуп алыылы, аңаа болчур кижи чогул» — дижип тур.

¹²Бурган, менден ырап чорба; мээң Бурганым, дүрген дузалап кел.

¹³Меңээ удурланып турар улус бак атка кирип, читсин; меңээ бак чүве күзээн улус ыядып, дора көрүүшкүнге бүргетсин.

¹⁴А мен кезээде Сеңээ идегеп, Сени мактаан сөстеримни ам-даа немээйн.

¹⁵Аксы-сөзүм хүннү бадыр чөптүг чорууң биле камгалалыңны медээлезин — оларны көргүскен ажыл-херектериң көвей, сан-түңүн-даа билбес мен.

¹⁶Дээрги-Бурган-Чаяакчы, өндүр улуг ажыл-херээңниң ачызында Сеңээ чедип кээр мен, Сээң, чүгле Сээң чөптүүңнү медээлээр мен.

¹⁷Бурганым, чажымдан бээр сургап келдиң. Амдыгаа дээр кайгамчыктыг ажыл-херээң чарлап чор мен.

¹⁸Буурарып, кырыыжемче мени кагба, Бурганым — амгы база келир салгалдарга күчү-күжүң медээлеп четтигиптейн.

¹⁹Чөптүг чорууң дээрлерге четкен дег-дир, Бурганым. Өндүр бедик ажыл-херек кылган Бурган, Сеңээ дөмей кым-даа чогул.

²⁰Эңмежок айыыл-халапты, аар-бергени менче салып-даа тургаш, кезээде мени катап тынгарып, черниң ханызындан катап үндүрүп кээп турдуң.

²¹Алдар-адымны улгаттырып, аргалалды база катап берип тур сен.

²²А мен Сени, Сээң шынныыңны чадаган-биле алдаржыдып ырлаар мен, Бурганым. Израильдиң ыдыктыг Бурганы, чанзы-биле Сени алгап ырлаар мен.

²³Сени мактап тура, аксы-сөзүм амырап ырлаар, Сээң адырып хостааның сеткил-сагыжым өөрүй бээр.

²⁴Чөптүг чорууңну хүннү бадыр медээлээш, аксы-дылым могап шылавас; меңээ хора чедирерин күзээн улус ыядып човап, бак атка кирген болгай.