Read Ыдыктыг Библия, 2011 Псалтирь 72 Bible Online

Псалтирь 72 - Ыдыктыг Библия, 2011 bible

Псалтирь 72

¹Мизмор-ыр. Асафтыы. [1] Бурганның израиль чонга, арыг чүректиг улуска ачы-буянныын!

²А мээң буттарым бичии-ле болза, тендирий бээр часты, таваңгайларым бичии-ле болза, тая бээр часты.

³Чүге дээрге бузуттуг улустуң чаагай амыдыралын көргеш, шак ол турамык улуска адааргай берген мен.

⁴Олар өлүр үезинде хилинчек көрбес, чүге дээрге кадык-шыыраа кончуг-дур.

⁵Бүгү улус ышкаш, чилчик үзер күш-ажыл кылбас-тыр, өскелер ышкаш хилинчек көрбес-тир.

⁶Ынчангаш олар адыыргак чорукту, моюнга азар каасталга дег, азып алганнар, каржы-дошкун чорукту, хеп дег, кедип алганнар.

⁷Оларның семирээн чүректеринден бузут үндүр агып турар [55], олар бузуттуг бодалдарынга бүрүнү-биле алзып алганнар.

⁸Ындыг улус кочулажып чугаалап, нүгүлдү өш харап тарадып, улуургап турдулар.

⁹Дээрлерже өгү-дылын караңнаттылар, аксы-дылын чер кырынга кызаңнаттылар.

¹⁰Ынчангаш Бурганның чону база ол улусту эдерип, оларның сөстерин, аяк долдур суг кудуп ишкен дег, хүлээп ап турар.

¹¹Бузуттуглар: «Бурган канчап билип каарыл? Дээди Өрүкүнүүнде бүгү-ле чүвени билир деп бе?» — дижип турар.

¹²Шак мындыг — кезээ мөңгеде сагыш амыр, эртине-байлакты эңдере чыып ап чоруур бузуттуг улус турар боор-дур.

¹³Чүрээмни хей-ле арыглап ап, холдарымны кем-буруу чок чоруумга хей-ле чуп ап чораан мен бе?

¹⁴Хүннү бадыр хинчек көрүп, эртенниң-не кижизидилге ап келдим.

¹⁵Ынчалза-даа: «Бузуттуглар дег боданыйн» — деп чугаалаар болзумза, Сээң ажы-төлүң болур чоннуң мурнунга буруудаар ийик мен.

¹⁶Ол бүгүнү билип аар дээш, боданып турдум, ынчалзажок меңээ бергези кончуг болду —

¹⁷Бурганның ыдыктыг өргээзинче кире бергеш, бузуттугларның салым-чолунуң канчаар төнерин чүгле ынчан билип алдым.

¹⁸Шынап-ла, Сен оларны тайгыр орукка тургузуп, кооргалче киир идип турар-дыр сен.

¹⁹Карак чивеш аразында олар буурап дүжүп, чиде берди, коргунчуг айыыл-халаптардан кырлып калды.

²⁰Оттуп келген кижиниң уттуптары дүш дег, Сен оларның дүрзүлерин Бодуңнуң хоорайыңга херекке албас сен, Дээрги.

²¹Мээң чүрээм хөлзеп-дойлуп турда, ишти-хөңнүм ажып-саргып турда,

²²чүнү-даа билбес, мелегей кижи турган мен, Сээң мурнуңга мал-маган дег турган мен.

²³Ындыг-даа болза, мен кезээде Сээң-биле кады мен, Сен мээң холумдан чедип ап турар сен;

²⁴Бодуңнуң сүмең-биле меңээ орук айтып чор сен, алызы барып, мени алдаржыдып, хүлээп аар сен.

²⁵Дээрде меңээ Сенден өске кым барыл? Сээң-биле кады тургаш, чер-делегейниң чүзүн-даа күзевес мен.

²⁶Мага-бодум биле чүрээм харыксырап турду, а Сен — чүрээмниң быжыгланыр күжү сен, меңээ кезээ мөңгеде онаашкан үлүүм сен, Бурганым.

²⁷Сенден ырай берген улус өлүп каар, Сеңээ өскерилген кандыг-даа кижини узуткап турар болгай сен.

²⁸А меңээ — Бурганче чоокшулаары ачылыг. Дээрги-Бурган-Чаяакчыны хоргадалым кылып алдым — Сээң хамык ажыл-херектериң дугайында медээлээр мен.