Read Ыдыктыг Библия, 2011 Псалтирь 73 Bible Online

Псалтирь 73 - Ыдыктыг Библия, 2011 bible

Псалтирь 73

¹Маскил-ыр. Асафтыы. [1] Бурганывыс, чүге бистен кезээ шагда ойталадың, чүге Сээң килеңиң кодан хоюңче кыптыгып турарыл?

²Эрте шагда бистиң аймаавысты Бодуңга өнчү кылдыр садып хостап алгаш, Сион дагга чурттап туруп алган сен. Ам ол чонуң дугайында бодап көр.

³Бүрүнү-биле бузуп каапкан өргээңче базымнарың шиглеп, кылашта даан, ыдыктыг черге турган бүгү чүвени дайзын кайы хире үреп бузуп каапкан-дыр!

⁴Дайзыннарың Сээң тодарадып каан чериңге хөректенип турду, аңаа бодунуң туктарын киискидип азып алды.

⁵Шыргай аргаже балды аннып, ыяш кезер диген кижилер-биле дөмей болуп,

⁶Сээң өргээңниң оюп сиилбээн каасталгазын маска болгаш балды-биле чуура шаап каапты.

⁷Ыдыктыг өргээңни өрттедипкеш, ат-алдарың ээлээн черни таваан карартыр бужартадып каапты.

⁸«Оларны шуут таптай базып кааптаал» — дээн соонда, дайзыннарың Сээң тодарадып каан шупту черлериңни бүгү чуртта өрттедипти.

⁹Бистиң туктарывыс ам киискип көзүлбестээн; Бурганның медээчизи ам чок, кажанга дээр ындыг боорун билир кижи база чок!

¹⁰Бурганывыс, дайзын Сени кажанга дээр бак сөглээрил? Өжээтен Сээң адыңны кезээ мөңгеде дора көөр бе?

¹¹Холуңну чүге бистен чайладыр сен? Күштүг холуңну хойнуңдан ужулгаш, дайзыннарны чок кылып каавыт!

¹²Бурганывыс, эрте-бурунгудан бээр Хаанывыс, Сен чер-делегейге камгалалды боттандырып турар сен.

¹³Далайны Сен күчү-күжүң-биле чылча шаптың, күчүтен моостарның баштарын сугга чуура шаптың.

¹⁴Сен Левиафанның [56] баштарын ууй шапкаш, ээн ховунуң аң-меңинге [57] чемиш кылдыр октап бердиң.

¹⁵Сен суг бажын, соглуучал хемнерни аксып бадырыптың, үргүлчү агып чыдар хемнерни кургадыптың.

¹⁶Дүн-даа Сээңии, хүн-даа Сээңии, ай биле хүннү дээрге быжыглап кагдың.

¹⁷Сен чер-делегейде шупту кызыгаарларны, хемчээлдерни тургускан сен; чай биле кышты бар кылып каан сен.

¹⁸Мону сактып келем, Дээрги-Чаяакчы! Дайзыннар Сени бак сөглеп турду, угаан чок хейлер Сээң адыңны дора көрүп турду.

¹⁹Көге-бугаңның амы-тынын араатанга каап бербе, кээргенчиг улузуңну долузу-биле утпайн көр.

²⁰Чагыг-керээңни бода — черниң дүмбей булуңнарын күш дөгээр улус ээлээн болгай.

²¹Дарлаткан чоннуң ады баксырап артып калбазын, ядыы-түреңги чон Сээң адыңны алгап-мактазын.

²²Бурганым, дүрген келем, чаргыңны удуп ап көр, угаан чок хейниң хүннү бадыр Сени бак сөглеп турганын бода даан.

²³Дайзыннарыңның алгы-кышкызын, Сенче халдап турар улустуң үзүк-соксаал чок шимээн-даажын утпайн көрем.