Read Ыдыктыг Библия, 2011 Псалтирь 76 Bible Online

Псалтирь 76 - Ыдыктыг Библия, 2011 bible

Псалтирь 76

¹Хөгжүм башкарыкчызынга. Идифунга. Асафтыы. Мизмор-ыр. [1]

²Бурганче үнүм чедирип, кыйгырар мен; Бурганга үнүм четсин, Ол мени дыңнап кагзын.

³Айыыл-халап келген хүнде Дээргиже чүткүп тур мен, дүннү өттүр холдарымны Олче сунгаш, бадырбас мен, сеткилим аргалалдан ойталап тур!

⁴Бурганны сактып ора, улуг тынып, човууртаар мен, бодап-бодап орарымга, сагыш-сеткил харыксыраар. Сэла

⁵Карактарым шийдирбейн тур сен, канчаар-даа аажок бергедээштиң, үнүм безин үнмейн тур.

⁶Эрте-бурунгу үелерни, эрткен-барган чылдарны-даа бодап ор мен,

⁷дүнелерде бадыра бээр ырларымны сактып тур мен, бодалдарым дойлуп, сеткилим харыы дилеп, айтырып тур:

⁸«Таанда-ла Дээрги бистен кезээ мөңгеде ойталаан бе, моон соңгаар ээ көрүнмес бе?

⁹Таанда-ла Ооң энерели кажан-даа эглип келбес бе, Ооң сөзү салгалдан салгал дамчып дыңналбас бе?

¹⁰Таанда-ла Бурган ээ-хайыралдыын уттупкан бе, килеңнеп тура, өршээл көргүзерин соксаткан бе?» Сэла

¹¹«Дээди Өрүкүнүң холу ачы-дуза чедирбестээн-дир! — аарышкы-човалаңым ында-дыр» деп бодандым.

¹²Дээрги-Чаяакчының ажыл-херектерин сактып кээр мен, үе-дүптен бээр кылып турар кайгамчык чүүлдерин сактып кээр мен.

¹³Сээң хамык ажыл-үүлеңни хандыр бодап, Сээң кылган ажыл-херектериң дугайында боданыр мен.

¹⁴Бурганым, Сээң орууң ыдыктыг-дыр! Бурганым ышкаш өндүр улуг бурган бар бе?

¹⁵Кайгамчык чүүлдер кылып турар Бурган-дыр сен, улус-чоннар аразынга күчү-күжүң көргүскен сен;

¹⁶Иаков биле Иосифтиң салгалын — Бодуңнуң чонуңну күжүң-биле камгалаан сен. Сэла

¹⁷Суглар Сени көрген болгай, Бурганым, олар Сени көргеш, девидей берген, дүп чок далайлар сирилей берген.

¹⁸Булуттардан чаъс суу куттулуп, дээрлерден дааш-шимээн дыңналып, Сээң согуннарың ужугуп турган.

¹⁹Сээң диңмирээшкиниң үнү дээрлерге дагжап, кызаңнааштар өртемчейни чырыдып, чер сирилеп, серт кыннып турган.

²⁰Сээң эрткен орууң — далайда, Сээң кокпаң — терең сугларда, Сээң истериңни кижи көрбээн.

²¹Бодуңнуң чонуңну Моисейниң база Аароннуң холу-биле, кодан мал дег, сүрүп аппар чыткан сен.