Read Ыдыктыг Библия, 2011 Псалтирь 77 Bible Online

Псалтирь 77 - Ыдыктыг Библия, 2011 bible

Псалтирь 77

¹Маскил-ыр. Асафтыы. [1] Мээң чонум, өөредиимни тооп дыңна, чугаа-сөзүмче кулааң ээктир.

²Аксымны угаадыглыг чугаа-биле ажыдайн, эрте-бурунгу тывызык чугааларны медээлээйн.

³Ол чугааларны дыңнаан база билир бис — оларны биске өгбелеривис дамчыткан.

⁴Ол чугаалар бистиң ада-өгбевистиң ажы-төлүнге чажыт чүүл эвес турган — а олар келир салгалга Дээрги-Чаяакчының алдары биле күчү-күжүнүң дугайында, Ооң кылганы кайгамчык чүүлдер дугайында дамчыдып чугаалаан.

⁵Дээрги-Чаяакчы Иаковка дүрүмнерни доктааткан, Израильге ыдыктыг хоойлуну тургускаш, «Ажы-төлүңерге дамчыдыңар» деп, ада-өгбелеривиске чагып каан.

⁶Келир салгал — алызы барып төрүттүнер ажы-төл ону билип алзын, боттарының ажы-төлүнге база дамчыдып чугаалап,

⁷Бурганга идегезин, Ооң ажыл-херектерин утпазын, айтыышкыннарын сагызын.

⁸Олар боттарының ада-өгбелери — хай-чагырга чок, чөрүү, чүректери Бурганга бердинмээн, сеткил-сагыжы-биле Аңаа шынчы эвес салгалдың улузу дег болбазын.

⁹Эфремниң ук-салгалы дайын шөлүнден чепсектиг, чаларын атпышаан, дезипкен.

¹⁰Олар Бурганның берген чагыг-керээзин кадагалап албааннар, Ооң дүрүм-хоойлузун эдерерин күзевээннер.

¹¹Ооң ажыл-херектерин база оларга көргүскен кайгамчык чүүлдерин уттупканнар.

¹²Бурган Египетке, Цоан деп черге, оларның ада-өгбелериниң мурнунга кайгамчык чүүлдерни көргүскен:

¹³далайны ийи чарыпкаш, улусту кежире берген, сугну ханалаштыр тургузупкан;

¹⁴оларны хүндүс — булут-биле, а дүннү өттүр — оттуң чырыы-биле эдертип бар чыткан;

¹⁵ээн кургаг ховуга хаяны оя каккаш, оларны, дүп чок далайдан дег, суггарып каан;

¹⁶ол хаядан сугну аксырга, суг хемнер бооп агып бада берген.

¹⁷Ынчалзажок олар Дээди Өрүкүнүң мурнунга бачыт үүлгедирин уламчылап, ээн кургаг ховуга Ооң сеткилин хомудадып турганнар.

¹⁸А олар боттарының чүрээнге Бурганны шенеп, күзелин хандыр чиир аъш-чем айтырып турганнар.

¹⁹Аңаа хамаарыштыр: «Бурган ээн кургаг ховуга аъш-чем-биле хандырып шыдаар бе?

²⁰Ол хаяны оя кагарга, суг аттыгып үнүп, агым суглар бадып эгелээни шын болгай, ынчалзажок Ол далган-тараа берип шыдаар бе, Бодунуң чонун эът-биле чемгерип шыдаар бе?» — деп турганнар.

²¹[21-22] Дээрги-Чаяакчы ону дыңнааш, аажок килеңнээн: Бурганга бүзүревейн, Оон кээр камгалалга идегевейн барганы дээш, Иаковка удур от кыпкан, Израильге удур килең кыптыккан.

²²

²³Ол өрү көшкен булуттарга дужаап, дээрниң эжиин ажыдыпкаш,

²⁴улуска аъш-чем кылдыр маннаны чагдырыпкан — оларга дээрден баткан тарааны берген.

²⁵Дээрниң төлээлериниң аъш-чемин кижи амытан чип турган, Дээрги-Чаяакчы кижилерге хүнезинни сагыш хандыр бадырып берген.

²⁶Ол чөөн чүктен хатты дээрге хадыдыпкаш, мурнуу чүктен хатты Бодунуң күжү-биле доюлдурупкан.

²⁷Оон оларже доозун дег хөй эътти, далай элезини дег хөй чалгынныг куштарны чагдырыпкан.

²⁸Куштарны чоннуң турлааның ортузунче, чадырлар чанынче бадырып берген.

²⁹Улус куш эъдин пөккүже чип алган — Дээрги-Чаяакчы оларның күзээн чүвезин хайырлаан.

³⁰Ынчалзажок олар күзээн эът-чемин дайнавышаан турда,

³¹Бурганның килеңи оларже көдүрүлгеш, эң семис-шыырак улузун өлүрүп, Израильдиң аныяк эрлерин чок кылып каан.

³²Ол хиреде-ле олар бачыт үүлгедирин уламчылап, Ооң кайгамчык чүүлдеринге бүзүревейн турганнар.

³³Дээрги-Чаяакчы оларның назынын хей-бус дег чок кылып, чуртталгазын айыыл-халап-биле үзүп каан.

³⁴Бурган израиль чонну узуткап эгелээрге, олар Оон дилег кылып, дедир эглип кээп, Олче чүткүп,

³⁵Бурган оларга чаштыр хая дээрзин, Дээди Өрүкү оларның Камгалакчызы дээрзин сактып кээп турганнар.

³⁶Олар Аңаа аксы-сөзү-биле авыяастап, Ооң мурнунга аксы-дылы-биле мегелеп турганнар,

³⁷оларның чүректери Бурганның мурнунга шынныг эвес бооп, Ооң-биле чарган чагыг-керээзинге шынчы эвес болганнар.

³⁸А Ол ээ-хайыралыг болгаш, улустуң бачыттарын өршээп, узуткавайн турган, Бодунуң килеңин хөй катап чайладып, күштүг килеңин бүрүнү-биле хайныктырбайн келген.

³⁹«Олар — анаа-ла эът-мага-бот-тур, үндүр үрүптерге, ээп келбес тыныш-тыр» деп, Ол бодап турган.

⁴⁰Олар Ону чеже катап ээн кургаг ховуга тооп дыңнаваан дээр, кижи чок черге Ооң сеткилин чеже катап хомудаткан дээр?

⁴¹Оон база-ла Израильдиң ыдыктыг Бурганын шенеп, хорададып,

⁴²Ооң күштүг холун, дарлалдан оларны хостап каан хүнүн уттупканнар.

⁴³Дээрги-Чаяакчының Египетке, Цоан деп черге, оларга көргүскен кайгамчык демдектерин уттупканнар.

⁴⁴Ол үеде Ол, египетчилер суг ижип шыдавас кылдыр, оларның хемнерин ханче хуулдурупкан.

⁴⁵Оларны чиир кылдыр — ызырар сээктерни, узуткаар кылдыр — бөзүр-пагаларны оларже салыпкан.

⁴⁶Оларның үнүш-дүжүдүн — шергилерге, күш-ажылының үре-түңнелин — мөөң шартылаага дойлаттырып каапкан.

⁴⁷Дээрги-Чаяакчы оларның виноград шөлдерин — долу-биле, чимистиг ыяштарын — борбак доштар-биле соп каапкан.

⁴⁸Мал-маганынче долу чагдырыпкан, сүрүг малынче чаңныктар бадырыпкан.

⁴⁹Египетчилерже Бодунуң килеңиниң чалбыыжын, кылыктанып хорадаан сагыжын, айыыл-халапты, дээрниң хора чедирер төлээлерин ыдыпкан.

⁵⁰Бодунуң килеңинге орук ажыдып, оларның амы-тынын өлүмден кадагалаваан, мал-маганын [61] хамчык аарыгга хүлээдип берген.

⁵¹Египетке төрүттүнген дун төл бүрүзүн, Хаамның [62] чадырларында баштай төрүттүнген оолдарны узуткап каан.

⁵²Оон Дээрги-Чаяакчы Бодунуң чонун хойгулаштыр сүрүп алгаш, ээн кургаг ховуга, сүрүг мал дег, хай деп бар чыткан.

⁵³Ол чонунга айыыл халдатпайн эдертип бар чыткан, Ооң улузу коргуп-сүртевээн, а дайзыннарны далай хөме апкан.

⁵⁴Бурган Бодунуң чонун ыдыктыг девискээринче, Бодунуң холунуң ээлеп алганы ыдыктыг дагже эдертип эккелген.

⁵⁵Улузу чедип кээрге-ле, өске чоннарны үндүр сывырып, оларның ээлээн черин Бодунуң улузунга хувааглыг өнчү кылдыр үлеп бергеш, Израильдиң аймактарын ол чоннарның чадырларынга чурттадып каан.

⁵⁶Ынчалза-даа израильчилер Дээди Өрүкү Бурганны шенеп, хомудадырын уламчылап, Ооң хоойлуларын сагывайн турганнар.

⁵⁷Боттарының ада-өгбелери дег, Бургандан ойталап, Аңаа өскерлип, ыргак-дагыр согуннарга дөмейлежи бергеннер.

⁵⁸Бурганның хүннээшкинин дүрзү-бурганнары-биле оттуруп, оларга мөгеер бедигээштери-биле Ону хорададып турганнар.

⁵⁹Бурган ону дыңнап кааш, килеңнеп, Израильге дыка хөңнү чок болу берген.

⁶⁰Ол Силомга турган майгынын — кижилер аразынга чурттап турган өргээзин каапкаш барган;

⁶¹Бодунуң күчү-күжүн туттуруушкунга берипкен, Бодунуң алдарын дайзынның холунга хүлээдипкен [63].

⁶²Бодунуң чонун хылыш-биле узуткаар кылдыр берипкен, Бодунуң өнчүзү болур улузунче килеңней берген.

⁶³Ооң чонунуң аныяк эрлерин от чипкен — аныяк кыстарны мактап, куда ырлары куттулбастаан.

⁶⁴Бурганның бараалгакчыларын хылыш хыдып турган, а дулгуяк кадайлары оларның ажыын ажып ыглашпаан.

⁶⁵Ооң соонда Дээрги, уйгузу чаштай берген дег, оттуп келген, арагага эзирээш, сергей берген мөге кижи дег, туруп келген.

⁶⁶Ол Бодунуң чонунуң дайзыннарын артындан кээп узуткап каан, оларның адын кезээ мөңгеде бакка суп каан.

⁶⁷Ол Иосифтиң үре-салгалын хүлээп көрбээн, Эфремниң аймаан шилип албаан,

⁶⁸а Иуданың аймаан база ынак даа Сионну шилип алган.

⁶⁹Бодунуң ыдыктыг өргээзин Сионга, бедик дээрлерге дег, тудуп үндүргеш, чер дег быжыг кылдыр кезээ мөңгеде тургузуп каан.

⁷⁰Ол Давидти Бодунга чалча кылдыр шилип алгаш, ону хой кажаазындан эккелген;

⁷¹Давидти мал аразындан Бодунуң чону — Иаковту, Бодунуң өнчүзү — Израильди кадарар кылдыр ап алган.

⁷²Давид чонну арыг чүрээнден кадарып, мерген холдары-биле баштап чораан.